By: Allenby Sela, Israel

Nazareth Nulain nau neih nana a pan vang vang Bethlehem khua hi duh ang angin kan tlan tlang thei ta lova, a ngaihawm thin hle mai. Tun hmate kha chuan Makpela Puk, kan pu Abrahama'n a nupui duh tak Sari a phumna leh amah ngei pawh a faten an phumna hmun tlawh tura han kal chang te hian, Bus in emaw, Car in emaw pawh kal i la, Bethlehem khua hi kan tlan tlang thin a, mahni Car a kal phei chuan kan pi Rakili thlanahte kan han chawl khawmuang a, Sâm te kan han chhiar a, chutah, a piah lawka Bawng In tlawm tak chhunga ran chawpekna thlenga Marin Isua a hrinna hmun, Biak In lian leh ropui em em mai nita te pawh han tlantlang san vang vang mai chu har kan ti thin a, hmanhmawh deuh changte pawhin a thlirin kan thlir vawng vawng tal thin a ni.
    Bethlehem khua hi Kristiante leh Judate tan tunhma atanga khaw pawimawh leh hlu em em mai a ni a, Jakoba nupui hmangaih em em Rakili chuan he khuaah hian fapa a hring a, a boral nghal tih kan Bible atangin kan chhiar a, helaia kan pi Rakili thlan hi tun thlengin a la awm a, Juda leh Kristian mipui tam takin tawngtai nan an la hmang mur mur reng thin a ni. He Bethlehem khuaah hian Jakoba nupui Rakili chuan kawnglaiah fapa a hring a, a hnu kum sang chuang liam hnuah Mari chuan Bawng In tlawm taka Ran chaw pekna thlengah Fapa a lo hring ve leh ta a, chu mai chu ni lovin, Israel-te lal, Lal Davida ngei pawh he lai hmunah hian a piang a, fahrah leh riang ngawih ngawihin Beram vengin a lo khawsa thin a ni.
    Tunhma atangin he Bethlehem khua hian ropuina sawi tur tam tak a nei a, chung zinga pakhat chu hei hi a ni. Juda mi hausa tawntaw, tunlai tawng chuan Multi-millionaire tih hial tur Elimeleka chuan, tam tlak avangin, tam avanga ei tur nei tawh loten a neih an eizawh pui ang tih hlauvin a nupui Naomi leh a fapate pahnih chu hlate khuaah a sum leh pai zawng zawngte nen a pem bo pui ta daih mai a, chu a pemna ram chu Moab ram a ni nghe nghe a, tichuan, a fapate pahnih Mahlona leh Kilionate pawh chu mihausa tawn taw Elimeleka fapate anni ang ngeiin Nupui hmeltha tak ve ve an nei a, chung mite chu Ruthi, Moab nula leh, Orpi-i te anni. Mahse, Lalpan a thil tih dan a duh lo a ni ngei ang, Elimeleka chu reiloteah boralin an khawsakna pawh a lo rawp telh telh a, ei tur tak ngial pawh an nei ta mang lova, a fapate pahnih pawh chu fa nei lovin an boral ve ta mai a. Naomi chu kutbengin, rethei takin Judai rama Bethlehem khaw lamah chuan a let leh ta hna hna mai a ni. Tunlaia West Bank ti a kan hriat hi Samaria & Judea tih a ni a, chu chu Samari ram leh Judai ram tih thin kha a ni.
     Judai rama Bethlehem khuaa haw leh tura a in siam mawlh mawlh lai chuan Naomi chuan a monute pahnih chu hruai ve a tum hauh lo va, Orpi-i chuan a pi chu a fawp a, a kalsan ta a nih kha. Mahse, a monu pakhat zawk Ruthi chuan a zui haw thung a, tichuan, Bethlehem khuaah ngei chuan pasal a lo nei ta a ni. Ruthi kha Maob mi a ni a, Maob chu eng hnam nge tih kan chhui chuan, Lalpan Sodom leh Gomora a hrem laia Lota leh a chhungte a hum khan, a nupui khan hnunglam a hawi let avang khan Chi Lungah a chang tih kan hria a, tichuan, Lota leh a fanu pahnihte chu Pukah an tawm a, a fanu upa zawk chuan khawvelah hian mihring dang reng reng awm tawh lova a ngaih avangin a nau hnenah an pa chu Wine hrai ruih sauh sauh va, chithlah pui tura mut pui turin a sawm a, tichuan, a ti hmasa a, a tukah Wine in ruih tir lehin a nau chuan a pa chu a mutpui ve leh tih kan Bible thianghlim atangin kan chhiar a ni. Juda mithiamte chuan khatih laia a u zawkin a pa a mutpui khan Lota khan a hre hauh lo va, mahse, a nau zawkin a mutpui ve erawh kha chuan, a hria a, mahse, a hre lo der vel ta mai mai a ni an ti. Chutichuan, a fanu upa zawkin fapa a hrin chuan Moaba a sa a, chu chu Moab hnam thlahtu a ni a, a fanu naupang zawkin fapa a hrin ve thung chuan Ben-ammia a sa a, chu chu Ammona thlahte thlahtu hi a ni thung a. 
    Moab leh Ammon hnam chuan chi an lo thlah pung zel a, Moab hnam zingah chuan Ruthi a lo piang ta a, nula hmeltha leh fel tak a ni tih chu kan tlangrin vek thei awm e. amaherawhchu Ammon nula Opri-i ve thung erawh kha chu a fel ta lutuk lo deuh nge ni, a pi Naomi pawh a zui ve duh ta lo a nih kha, a chanchin pawh kan hre zui ta lo reng a!!. Tichuan, hun a lo kal zel a, Ruthi chu Israel fate zingah, a pi Naomi bulah a khawsa a, buhphalte a zawng thin a, tin, Boaza nen pawh lo in hmelhriatin tumkhat phei chu a pi thupek angin, a inbualfai a, rimtui a in chulh a, thawmhnaw fai a in bel a, zanlaiah, zan thiangreh lai takin Baoza mutna hruihzawlah a rizai a va sinpui ve zal zal mai a nih kha. Tichuan, reiloteah Boaza leh Ruthi chu an lo innei ta a, Bethlehem khuaah ngei chuan fapa a nei a, an lo inthlah chhawng zel a, Lal Davida hial a lo piang ta a, Kristiante chuan Jesaia fapa Davida thlah atang hian Isua kha a lo piang a ni an ti a, tin, Judate pawhin Lal Davida thlah atang ngei hian Messia a lo piang (dawn) a ni an ti bawk. He Judai rama Bethlehem khua ngei hi Zawlnei Samuela'n Davida, lal ni tura hriak a thihna hmun kha a ni nghe nghe a ni.
    Davida khan a tleirawl lai hun chhung zawng zawng chu he Judai rama Bethlehem dai velah hian Beram a veng thin a ni an ti a, a chang chuan a pi leh pu, Boaza leh Ruthi te Lo hlui, an khaw chhimchhak lama mual pharh thla raih lamahte pawh hian a beramte chu a hruaiin a thlah thin ngei ang. He Judai rama Bethlehem dai vela beram a ven lai hian a lawm Davida khan Sâm tam ber hi a phuah hial nghe nghe ni!! Hun a lo kal zel a, Davida thlah kal zel, chhuan tam tak hnuah, Luka min hrilh danin, Josepha leh Mari chu Judai rama Davida khua Bethlehem an tihah an kal a, nau an va nei ta a ni. Heta tang hian Bethlehem leh Davida hian inkungkaihna thuk tak an nei ngei niin a lang. Tin, Isua Krista, Bawng In tlawm taka ran chaw pekna thlenga Marin a hrinna hmun kha Baoza leh Ruthi-te, Nupa tuak thar an lo ni ve tak hnuah anmahni Nupa puala chenna In atana an dinna hmun ngei kha a ni an ti tlat mai a, tin, Isua pian zana Berampute hnena thil ropui tak lo thlen laia beram pute riahna hmun kha Boaza leh Ruthi-te in tawnna hmun hruizawl kha a ni e an ti bawk.
    Israel fate, an sual leh bawhchhiatna avanga Lalpan ram pawna kum 2000 chuang zet a hnawhchhuah hlan khan hnam dang dangin Israel ram an luah a, Bethlehem khua ngei pawh hnam dangten kum sang hnih chhung zet an luah a ni. Lalpan Israel fate, a hnawhdarhna ram atanga a hruaikhawm leh hnuah pawh, hnam dang lo awm sate chu hnawt chhuak mai lovin Israel sorkar zaidam tak mai chuan a awm ngheh tir zui ta zel a, tichuan, remna leh muanna a awm theihna turin, Israel sorkar chuan Bethlehem khua ngei pawh chu Palestinian ho awm tamna a nih avangin, anmahni leh anmahni inenkawl tirin a sipaite a la chhuak ta a. Makpela Puk awmna Hebron-Kiryat Arba kawng pawh hmun dangah a sial ta daih mai a. Chuvang chuan, a bika tlawh tura inbuatsaih a nih loh chuan Bethlehem khua chu tlawh a remchang ta lo hle mai a, Abrahama leh Sari, Isaaca leh Rabeki, Jakoba leh Leaii te phumna Makpela Puk tlawh tura Jerusalem atanga han chhuah changte hian Bethlehem kan paltlang thei ta si lo va,  chuti chuang chuan, a lan theihna hmun atang chuan kan thlir vawng vawng zel  thin a, "O! Bethlehem ka ngai a che, Beram pute ram tuanna…," tih hla sain kan zai zui vawng vawng thin.