By: VL-a

Kumthar puala article ziak hmasa zingah ka han tang tlat teh ang. Kum 2009-a ka hun hman dan ka han thlir kira ngaihtuahna tam tak ka rilru-ah lutin, thil ka lo tih loh avanga inchhirna tam tak ka neih laiin tih loh tur ka tih avanga tun huna a rah thalo tak ka seng tan mek a awm bawk. Zirlai tam tak ka zir chhuak a, chutih laiin zir tur tam tak ka la nei tih leh chumi atan chuan ka inbuatsaih chhoh zel a ngai tih ka chiang bawk.
    Chutianga ka lo khawsak dan leh awmdan ka thlirlet atang chuan kumthar 2010-a ka khawsak dan turah thil tha zawk ka nuna thleng turin zirlai ropui tak zir ka tum ta a ni. He khawvelah hian mihringte hi vawikhat chauh piang kan ni a, kan thih hnuah khawvel-ah kan piang nawn tawh lo tih chu Kristiante thurin, kan pawm dan a ni a. Kan damchhung kum a rei loh avang hian kan khawsak dan uluka fimkhur hi a tul hle a ni.
    Vawiin-a ka hun hmandan, ka thil tih leh ka thil tih loh te, ka chi tuh hi nakinah keimah ngei hian ka la seng leh dawn a. Keimah mai nilovin midangte pawhin an lo seng ve chang a awm fo bawk. Mahni mai ni lova midangte leh zelin ka chi tuh rah an lo seng telve fo avang hian rah seng lungchhiatthlak leh hrehawm tur ‘chi thalo’ chu he kumtharah hi chuan tuh ka tum tawh tur a ni lovang. He chi tuh leh a rah seng hi tute mahin kan pumpelh theih hauh loh, kan tawn ngei ngei thin a nih avangin chi tuh hi fimkhur a tul hle a ni.
    Kum 2009 chu a ral ta ... Kumhluia kan chituh rah kan seng chhoh mek lai hian kum 2011-a rah kan seng tur chi pawh he kumthar 2010 chhung hian kan tuh tan nghal tih hi hrenawn leh teh ang u. Kum 2009 chhung khan zirlai tam tak kan zir tawh a, khang atang khan tih tawh loh tur leh tih thar turte chu chiang takin kan hmu a kan hre tawh e.
    Hun liam tawha kan thil tih chhiat avanga inchhira indawm kun reng a sawt tawh lova, chu ai chuan rilru leh thinlung thar insiama kawng dik leh tha zawha ke kan pen a ngai zawk a ni. Kan lo tih dik tawh lohna khuh tur khan a letin thil tha ti tura tumruhna kan neih a tul a, harsatna hneh let tura beih let zawk tur a ni ang. Inchhir em em ringawt-a insiamthat tum chuan si loh chuan awmzia a nei lo.
    Beidawn loh phawt hi a ngai a. Beidawnna hi hmelma hlauhawm tak a ni.Vawiin, kumin-a mi hlawhtling leh mi awhawm tak takte zingah hian nimin leh nikum lama rahbi tleu leh che chhe ve tak takte an awm nawk a ni tih hriat a tul. Lo che chhiain kawng diklo kan lo zawh tawh anih pawhin insiamthat leh theih a ni a, mi hlawhchham mekte khan rilru thar leh thinlung thar insiam ula, inpuanven sawi chhingin hun tha pek belh kan nih leh chhung hian kawng thar han zawh teh u le.
    Engpawhnisela, he kum bulah hian tum nghet chet chawt, goal tlem tepawh han nei phawt mai la, chu i thil tum chu a hlawhtlin ngei theih nan beidawng duh miah lovin han bawhzui teh.Kum 2010 tawp lamah chuan a rah seng tur chhenfakawm takin a hmuak ngei ang che. Mizote hi a tlangpuiin kan nun hi a nghet lo khawpa tum mumal tak leh goal mumal tak nei lemlo, a tla chawp leh kan tawn ang anga khawsa mai mai hi kan tam khawp mai. Kan thil tawn ang anga tum dan thlak kual zung zung chi hi a tam zawk chu kan la ni awm e. He kan zia hi a tha lova thlak a hun ta a ni. Hmalam hun tur kum engemawzatte hi thlir nachang kan hriata chumi hun atana ruahmanna lo siama lo inhmakhua lawk hi i zir chho tak tak tawh ila.
    He kumthar atanga insiam danglam lehna atana thil pawimawh tak dang lehah chuan, mahni hmasialna paiha midangte dinhmun  hriatthiampuina leh thlir thiam puina neih hi a ni. Mizote hian hnam dang ze tha lo lai kan la chho ta zeuh zeuh a, kan Mizo nunze mawi thenkhat kan hloh mek tlat mai. Vairam-a mahni thenawm pawh an inhrelo ang mai khuan kan inkharkhip chho ve hret hret niin a lang. Chhungtin leh mitinte kan buai tawh a, hna pawh kan thawk tam ve tial tial a tunhma anga inlen pawh dur dur kha chu kan kalsan then zawng a ngai tawh teh meuh mai. Amaherawhchu, chu chuan kan in unauna leh kan inngaihsak tawnna ze mawi leh hlu tak kha erawh a len bo tur a ni lovang.
    Engtikawngmaha kohkir theih tawh loh, siamtha tura kohkir theih tawh hauhloh kumhlui avanga inchhira indawm kun reng lovin he kumthar atang hian bul tanna tha tan turin mitinte i inpeih theuh ang u le.