By: Ramhluna Hnamte

 Chhiartute ‘Kumthar Chibai ule.’ Hriatloh karin kum 2010 chu kan lo thleng leh ta reng mai a, kum 10 liam ta kum 2000 lo thlen dawn lai,1999 kum a kan in sawi thaih nasat zia kha in la hre hlawm in ka ring.Engtizia teh reng emawni Mizo zingah mai pawh nilo,khawvel ram dang mite zingah pawh 1999AD a ral chiah a 2000AD a lo her chhuah lai tak khan khawvel tawp dawn emaw Pathian lo kal dawn emaw a rinna kha kan nei fur mai a nih kha! Kei he thu ziaktu ngei pawh hi ka bang chuang lo.Mahse  2000 AD ah Pathian a lo kal dawn emaw khawvel a tawp dawn emaw,hei kum 10 zet a liam leh tawh hnu ah pawh chu thil chu a lo la thleng ta rih lo chu a ni a,khawvel tawp lam aiin keini lam hi kan tawp tam tawh zawk chu a nih awm si hi! Kan Pathian thu in min hrilh ang khan Pathian lo kal emaw khawvel tawp emaw hun hi chu Pa chauh lo chuan Fapa pawh in a hrelo a ti kha a ni a.Pa chauh hriat tur thil hi keini thi thei mihring derdep lutuk te hian lo hriat ve phet hi tum lo ila a tha mai awm e.Hei tunah pawh 2012 kum an sawi hrang leh tan tawh a, a ti awihawm tur tingin film ah te an siam zui a,hralh a tla em em mai leh nghal! Tun tum phei chu a tahrik ni nen lam an hrilhlawk a, December ni 21,2012 te an la ti ta lai a nih hi.Heng an thu lakna te hi Mayan ho hrilhlawkna leh sakhaw lam thil atang ten a la ni zui leh nghal.Mayan ho ai chuan kan Pathian thu hi keini Mizo Kristian te hian in nghah nan i hmang zawk phawt ang u, a fuh zawk ang. Ni 7.7.1977 kha Shillong a lehkha kan zir lai a ni a, kan unau Khasi ho khu puithuna la lungrun ve tak an ni awm e.Kha ni lo thleng tur kha an han la ulh nasa khawp a.Ni 7.7.1977 zing dar 7 minute 7 second 7 ah lir nasa tak a nghing dawn a,kan thi mang vek dawn ni awm khan an sawi nasa a, mi tam tak, mithiam leh thiamlo te pawh an chiai nasa mai. Vanneih thlak takin keini thian zaho kha chu kan chiai lo khawp mai. Ka thiante chu ka hrelo,kei chu kan practical exam lai a ni a, Motinagar a ka in luah ‘Xanadu’ ah khan ni 6.7.1977 zan ah thiante lehkhathawn ka ziak a, a tuk exam tur a tan ka in enlawk a,dar 10 velah ka mu a, a tuk ni 7.7.1977 zing dar 8 dawnah ka harh ni in ka hria.Zing dar 7, minute 7 leh second 7 chuan eng tin min ti buai ta lo chu a nih kha.

            Shillong te kan sawi kai ta sa sa,lung hlui te pawh a leng a lawm le.Keini lehkha zir lai leh kan rual u te ho hun lai kha chuan lehkha zirna lamah chuan Shillong hi Zofate ‘Mecca of Studies’ a ni.Khawpui dang kan ngai bik lo,Shillong kha a nuam a,a thianghlim a,a changkang a,kan zalen a,kha khawpui atanga zir chhuakte kha kan in dah hniam ngailo. 2009 kumhlui thlah zan a broadcast tur khan AIR hotuten ‘Sulhnu leh Lunglen’ sawi turin contract min pe a. ‘Sulhnu leh Lunglen’ hla kha nilo in keini thian ho hun lai,mahni tawk a kan vanglai ve lai,Shillong khawpui dung leh vang kan chhir ve lai thu kha sawi tur a min duh chu niin ka hria a.Minute 12 chauh hun min pe si a, sawi tur a tam si, ka sawi senglo nasa mai,mahse hmanlai hunah khan suangtuahna leh mitthla a let vawn vawn chung a sawi ka ni bawk a, keimah chauh khan ka lung a leng thar hle a,kan thian thenkhat ten chatuan ram min lo pan san nual tawh bawk nen,min record tu kha zah viau lo ila chu,aw lawi ruai ruai in ka sawi mai thei a ni!Chutia ka ‘radio talk’ chu Pi K.C.Zovi of Chaltlang in a lo ngaithla fuh tlat mai,a pasdal duh tak lo sun tawh, Shillong khawpui a lo tualleng ve hrep tawh ni bawk, sulhnu leh lunglen vang a lo van ve ruai ruai mek Pi Zovi chuan radio a ka thu sawi a lo ngaihthlak fuh thu leh a lunglen a zual nasat zia min hrilh duhin ka phone number a lo dap ruai ruai a. A lo petu in a lo pe diklo nge,nasa fe a min biak pawh a tum hnu pawhin a beidawng duh mai lo. Midang hnen atangin ka phone number a neih leh hmang chuan ni 9.1.2010,tlai dar 5:30 vel khan min rawn be fuh ta a nih kha.Ka thusawi a ngaihthlak atanga ni 9-naah kan in be fuh ta a nih chu.Hetia ka han ziak vak na chhan hi uan thil emaw intihtheihna lam emaw nilo in kan thu leh hla chhiar leh ngaithlatute atang a feedback hmuh leh dawn nawm zia leh min tih phur zia sawi ka tum na mai a nia. A tha lam a dawn phei chu a nuam leh zual a,a sawisel lam te pawh dawng ila,in siamthat ngai lai te pawh kan in siam tha dawn a ni. Chu chu a ni kum thar atan a ka thu leh hla min chhiar sak thintu te ka chah che u chu.Pi Zovi nen pawh kan la inkawm ang,di ngaih nilo,sulhnu leh nunhlui ngaih lunglen hi chu a nuam chem chem tlat a sin!

            Nikum hmasa,2008 kumhlui thlah zan khan FM Zoawi(AIR) in hranghlui zaimite pual hun a siam a, ‘live’ ngei in an kawm a,kha mi tum khan sawmna ka dawng ve a,mahse rokhawlhna dang vangin ui takin ka tel ve thei ta lova.Tun tum 2009 kumhlui thlah zan hma chiah ni 30.12.09 zan dar 7:30 a tan turin hranghlui zaimite pual hun hi FM Zoawi bawk hian a buatsaih leh a.Min rawn sawm ve leh tlat mai,a kum hmasa pawh a kal silo kha min rawn sawm nawn leh takah chuan kal lo thei ka nita lo.Ka kal ta ngei a,ka inchhir lo kher mai.Radio a an aw chauh ka hriat thangthar thupuan thiam Lalmalsawmi leh Ruth-i te a LIVE in ka hmu in kan inkawm ta.Ruth-i phei chu local TV English news ah nal leh mawi taka rawn puang thin kha a lo ni nghe nghe.An hna an hneh em em a,kei phei chu min chhaih lai mai dawn! Hemi zan hian thian hlui ngaihawm em em te Lalhungchhungi Pachuau,Laltlanthangi Pachuau,Sailothangi Sailo,Vanlalruati,C.Vansanga,Liandailova Chhangte,Lalnunmawia leh C.Dinthanga te nen hun kan hmang ho a,a nuam in kan khamlo tlang ngei mai, AIR Aizawl, FM Zoawi nge nge!

            Bugles ho in an hla hit pakhat ‘Video Kills the Radio Stars’ an tih hi heng laiah pawh a dik thawkhat viau in ka lo hre thin a,zai ah ngat phei chuan radio atanga lar chhuah hi a har tawh viau ten ka lo ring thin a.mahse a lo ni ngawt lo tawp mai.AIR Aizawl artiste belhchian dawl tak tak hi an lo la kuh tul mai,an lar lah a tlo zawk em em bawk si.An announcer te zei zia leh chhuanawm zia te hi kan hria em aw?FM Zoawi te hi ngaithlatu an lo tam hle thin a ni tih kan programmme neih atang ringawt pawh khan a hriat theih a,kei a kar a thusawi te kha ngaithla fuhtu an lo awm a,feed back te min la han pe zui leh nghal a,kan AIR Aizawl station hi ngaithlatu tam tak an lo la awm reng a,an pung tual tual dawn ni te pawhin a lang e.Radio hi chu ramhnuai pilril deuh ah pawh a ngaihthlak theih a,thlam ah te lui kalna ah te,power supply awmlo mahse battery a down loh phawt chuan programme awm lai na na chuan Siampuii Sailo pawhin ‘A leng em mai’ a CHI vawng vawng thei reng tlat a!