By: C.T.Lalrinawma, Phnom Penh, Cambodia

MNF ten Zoramin zalenna famkim nei tura an ram mut a, thi leh thau pawlha Zoram zalenna tur an sual lai khan tam tak chu East Pakistan (tuna BANGLADESH)ah awmin,

khatih laia West Pakistan (tuna PAKISTAN) sipaite zingah ''Pathan" sipai an tih mai, Bangladeshi-ho aia pa lian leh hrawl, Muslim zingah pawh Punjabi/Sardarji ho ang deuhva diar buk khim awm hliah hliaha hmul phurh nei, sam zuah leh biang/bek hmur chhur mai, huaisen si, thih hlau hauh lova an ram tana India sipai lo do lettute an awm thu an sawi thin a. Chung "Pathan sipai" tia an sawite chu, tunlaia  Pakistan leh Afghanistan rama PASHTUN hnam, TALIBAN-ho thlawptute leh an hruaitu pawimawhte khu an ni a. Chung hnamte chu Israel Hnam Bo 10 zinga Ephraim-a thlahte niin an hria!
   

Tunlaiin Israel scientists te leh mihring chanchin chhuibingtu (anthrolologists)te chuan, kum 2,700 lian tawha 'Israel Hnam Bo' te an chhui (genetic study) zelna lamah PASHTUN hnamte chu Israel thisen kai leh hnambo nia hria in an chhui bing mek a. Fiahna mumal tak la awm lo mahsela, history chuan chiang kuang, mumal takin Pashtuns hnamte chu Israel Hnam Bo ngei niin asawi a ni. Mizote rilruah "ÏSRAEL" han tih ringawt pawh hian, Lalchhungkawho Hla thu "... a che a pai lai nau..."tih ang deuhvin, Israel lam khuan lung min len a. Rih Dil aia rinnaa Jordan lui kan dai kai hnu phei chuan, thlarau lam Israel nih duh tawk mai lovin, serh vun hmawr tana lo inti 'Juda saphun'' duh pawh kan awm ta nawk mai! Israeli anthropologists thenkhat chuan, Pashtun/Pathans hnamte chu Israel Hnam 10 bote zinga mi ni ngeiin an ring a. Chutih laiin heng Pashtuns/Pathans hnamte erawh chu Islam sakhua, an lehkhabu thianghlim 'Koran'-in a zirtirna anga ruh leh fir (ultra-conservative Islamic Taliban movement) taka zui duhtute an ni lawi si a ni. Rory McCarthy (The Observer newspaper) chuan, "Pashtuns hnam, anmahni ngei pawhin a chang chuan Israel te nena an in zawm an nih thu an sawi a, mahsela,  tunlai Israel rama pem duhna emaw, Israeli te lainatna erawh an lantir tlem hle a ni", a ti. Islam sakhaw zuitu fir Muslim ram thenkhat chuan, tuna Israel ram lo piang khu an pawm thei bur lo va, khawvel Map atanga nuaibo an duh a ni; chumi tur chuan an theih ang angin tawngka leh thiltihin an lan tir a; chungah zingah chuan Al-Qeada hruaitute, Iran President te, Palestininian- Hamas hruaitute leh Lebanon- Hizbollah te leh Syria ramte an tel a ni.
   

Tunah hian Indian researcher Shahnaz Ali, National Institute of Immuno-haematology,  Mumbai chuan,  heng Pashtun / Pathans hnam peng pakhat 'AFRIDI" an tih mai, "Awi ka nu, Lucknow.." an tih thin bula Malihabad khuaa chengte thisen leh khawsak phungte en dik hna thawkin, a research beiha a hmuh chhuah chu Technion, Israel Institute of Technology, Haifa-ah endik turin a thawn leh dawn a ni. Tun hma deuha heng laia cheng Afridi hnamte endiknaah chuan, Israel hnam bo ngei an ni tih chianna ala awm lo a ni.
   

Kum 2,730 kaltaa Assuria-hoten Israel Lalram an run khan Israel Hnam 12 zinga Hnam 10 chu tlandarhin, thenkhat chuan Sambation River an tih lui ral kan in himna zawngin an tlanchhia (exile) in an sawi a. Judate history-ah chuan, tunlaia Juda-ho/Israel-ho kan tih maite khu Benjamina leh Juda thlahte kal zel kha an ni berin an sawi a ni. Israel Hnam Bo te zawn hna hi uluk tak leh ngawrh takin ala kal zel a, Mizoram te pawh an rawn chhui thleng ta hial a! Chung hnam bo te chu tunlai China, Burma, Nigeria leh Central Asia leh Ethiopia leh West ram thenkhatah hmu chhuakin an sawi bawk. Chutih lai chuan hnam (tribes) thenkhat erawh chu tunlaia Iraq hmar lam leh Afghanistan ramah awmin an ring a, chung hnam chuibing zingah chuan Pashtuns/Pathans te hi Israel hnam bo te ni ngeia rinna chak tak alo awm ta a ni. Shalva Weil (anthropologist & senior researcher), Hebrew University of Jersualem chuan, "Heng hnam bo nia hriat hrang hrang chhui bing zingah Pashtun/Pathans-hote chu Israel thisen kai ngeia hriatna a awm ngei a; mahse Pathans/Pashtuns te chu tunlaia Israel duhlo bura hnawltute zinga mi an ni a; hei hian thlum kara kha nasa tak a siam a ni"  tiin, DNA test atangin Pashtun hnamte chu khawi ram atanga chhuak nge an nih tih a hriat chian chauh dawn a ni, a ti. Pashtun hnamte hian chhuang takin Israelte thlah kal zel niin an sawi thin, an ti bawk.
   

Heng Pashtuns/Pathans hnam( tribe) te hian Israel thlahte hming "Josefa fa te..."tihna ang chi, Yusufzai tihte leh Ephraim-a thlahte kan ni tih ang chi, Afridi tih tawngkamte an nei a ni.Tin, an thil lo chin than (customs practices)ah pawh Juda-hote thil chin  thin ang, Sabbath nia eng ( candle) chhit te,  Judate anga  thei ei thianglo serh an neih te leh inneih ni khuaa an chin thin dan te leh thawmhnaw thu-ah pawh in an na lai an ngah a ni, an ti.
   

Shahnaz Ali chuan, "Ngaihdan ringawt chuan kum tam tak liam ta thil a ti fiah zo lova. Ka beisei zawk chu ngun taka scientific bihchiana (analysis) atangin Afridi-Pathans te chu Israel thlah dik tak an ni em tih a tifiah thei a ngem tih hi a ni. Thudik tak chu kan la hre mai thei lo.." a ti. Lucknow University-a thawk Navras Aafreedi chuan, Pashtun- Afridi thlah anih thu leh, an chhungkua chu tun hma Pakistan hmar thlang lam Khyber Agency vel atanga lo kal an nih thu a sawi a. Chung lai vel chu Israel- EPHRAIM a thlahte bona lai vel nia sawi a ni. Judate, Kristian leh Muslim- scholars thenkhat chuan Pathans/Pashtuns te chu Israel hnambo zinga mi ngei niin an ring hlawm a, mahse, fiahna mumal tak erawh ala awm thei si lo a ni. Israel thlah kal zelte nia an hriat zingah "Bnei Menashe"(Mansea thlahte) inti te chu India ram leh Ethiopia-ah hmuh chhuah an ni a, chungte chu ram tiam "ISRAEL"ah an pem lut tawh a. Nimahsela, Pashtuns/Pathans hnamte chu chutianga tur chi niin an lang lo. Pashtun/Pathans hnamte chu Israel Hnam bo an lo ni reng a nih chuan, Islam kul muk Taliban-ho zingah Israel thlahte an lo awm reng tihna a ni dawn a ni.

Comments (0)

Subscribe to this comment's feed