By: Biakthansanga Khiangte

Chanchinbu-ah Sap hming pu ni a kan ngaihte kan sawisel a, kan chuk rawn luai luai lai hian Sap hming ni a kan ngaih zawng zawngte hi Sap hming an ni vek em? tih hi ngaihtuah tel a tha hle in ka hria. Hebrai leh Grek-te Khawvel a hnam fing hmasa an ni a, an tu leh fate hmingah an invuah a, chu chu sap hming bik emaw kan lo ti mai a ni lo maw?
    Entirnan Hebrai tawnga Moshe/Moseh tihchu Sap ho te’n Moses an ti a, Yehosua chu Joshua, Greek tawnga Petraw/Petrou chu Peter tiin hmingah an pu ta niin a lang. Sap hote’n Hebrai leh Greek hming an put ve na chhan hi anhming putna hnam te ngaisanna lam ai mahin hnam fing leh changkang hmasa zawk an nih vang anih a rinawm. British Prime Minister hlui John Major khan a hming bulah Greek hming a pu nain, tute mahin English suakah an ngailo ni tur a ni, an ram a dinhmun pawimawh ber Prime Minister-ah an thlang tlat. Chutiang bawkin US President Abraham Lincoln khan Hebrai hming Abraham a pu nain, President atana anthlan danah hnam a chiangah an ngai tho a ni ang.
    Hming bul a hnam dang hming pute hian an hming putna hnam te nundan leh zia ngaisang em em tur anga kan ngai a nih chuan adik ber lo mai thei. Kan hming tehi nausen laia phuahte a ni thin a, aputute hian an hming hi mawi leh tha an tih vanga pu an ni lova, a nu leh pa te’n an hming atan an phuah vang zawk a pu te an ni. Sap ngaihsan hrim hrim vanga Sap hming invuah leh ta te chu mi tlem a zawngte chu an awm mahna. Nuleh pa tam ber te’n an fate hminga Rebeki, Isaka, Daniala an phuah nachhan hi Sap emaw Greek emaw an ngaihsan vang ni lovin Kristian kan nih vang zawkin Bible miropuite hming an phuah a ni. Hnam dangte hian keini ai mahin Kristianhmingah Bible a hming chuangte invuah an uar hle.
    Tin, mithenkhat te’n kan ngaih thupui ang em em hming hian a putu rilru leh ngaihtuahna chuti lutukin an hruai thui lo a ni ang, Vanlalzuia ni si rui thlep reng tepawh a awmtheih tho mai.
    Khawvel thang chho zelah kan ramah ngei pawh Mizo nisi Kristian nilo tepawh kan la awm thei chutiang hunah chuan Kristian hming atan Bible a hmingte inphuah kan la uar hun tepawh a la thleng lovang tih a sawi theih loh a. Miin Kristian hming atan hnam dang hming a invuah duh anih hrim chuan lo invuah ta mai se, a pawina em em ka hre lo. Mahse Mizo kan nih angin Sap ziak leh dam dan nilovin, Ruth  ti lovin Ruthi, Rebecca  ti lovin Rebeki, Isaac ni lovin Isaka, Moses ni lovin Mosia  tiin inphuah ila a Mizo raih mai dawn a, tu tan pawh lam a nuam zawk ngeiin a rinawm.