By: C. Lalhruaitluanga

He khawvel hi ‘Thalaite khawvel’ a ni tih hi sawi nawn kher ngai niin ka hre lo. Mahse, thil awmsa leh nisa pawh hi sawi nawn lovin kan awm thei lo thin si chu a nih hi. ‘Computer Age’-ah kan cheng tawh tia kan insawi theih viau laiin Mombati zuar te erawh an la hlâwk viau thung lawi si! Mahse, ‘Computer Age’-ah chuan kan cheng tho tho.
    2009 kum tâwp lam khan thingtlang khaw pakhatah ka va zin e ka ti a. Khawpui inchhawng sang khir eih uaih, vaivut khu leh hnawmhnawk chitin rengin a bawm khah chuai te nen chuan khai khin chi a ni lo khawp mai. Chu khaw chhim lam tlang tâwpa râp In sawi tleih tluih leh Zawlkhawpuia ‘Millenium Centre’ phei chu inthlau haih haih tak a ni!
    Ka iptepuiah chempui hriam tha ver vawr tak ka pai a, ramhnuai lam pan turin ka chhuak phei ngauh ngauh a. Khua ka kal pel tep tawh tih chuan, khaw hmawr tâwp ber In pakhat, a bang chu dâp hlui tawh tak, a chung pawh di, a chhuat phah chu a hminga thingphel ni ve chang chang, varanda-ah chuan ‘Pioner’ ho hman hnu tih hriat reng reng, ‘Alkatra Barrel’ tan bun, a chhunga tui tlemte awm, a lan dan chuan In chhuanawm lem loh tak chhung atang chuan, khawvela rimawi tunlai ber chi ‘Rap music’ ngei mai chu a rawn ri chhuak chuai chuai a! Mak ti deuhin ka’n thlek zui hram a. Tlangval pakhat.? hian naupan lai pawh a mumang lam ramah pawh kan la hmelhriat ngai hauh loh ‘Mobile Handset’ changkang ber chi chu kengin tukverh lam chu hawiin a lo bukpui nghauh nghauh a.
    Chu ka thil hmuh leh hriat chuan ka ngaihtuahna chu a hrut thui tak zet  a ni. Kan nau tleirâwl pakhat pawhin a ek pah  hian a ‘handset’ hmanga ‘Rap music’ ngaihthlâk chu a sim theih chuang miah loh dan te, kan tleirawl ve laia ‘Tape Recorder’ zuna kan uai ve nasat zia te thleng chuan ka suangtuahna chu hruai kawiin a awm ki kawi kual vel ni berin ka hria. ‘Telephone’ hmanga ‘Radio’-a hla thlang nalh nalh thei kha chu thingtlang lamah kha chuan biak that kha an hlawh deuh bik thin a ka’n hriat tlat pek chu! Mahse, tunah erawh thingtlang hmun kilkhâwr ber thleng pawhin khawvel ram changkang ber berin an lo hum kawi thin chu an lo hmelhriat ve tlat tawh si. Ni, kan ram pawh hian tihdanglam chu a tâwk ve ta chiang a ni!
    Mahse, kan danglam dan hi a tha meuh em? Tunlai thangthar khawvel zet hi zawng ka hrilhfiah thiam theih dan ber tur chu ‘A turu’ ni ta berin ka hria. Ropui erawh a ni hauh lo! Kan changkan dan hi bihchian deuh kan ngai niin a lang. Kha Râp In chhe tawh tak leh ram changkanga kan lo hmuh thin ‘Handset’ manto  tak kha in hmeh kan ti thei tak tak em? Khawvel ‘fashion’ chang kang ber ber chi iangin kan thuam hi chei hnum ni mah se, kan khawsakna leh ei leh bar kan zawnna hmun hian changkanna rahbi a la rah theih loh chhung chuan kan changkanna kha ‘Changkanna lem’ a ni ti ila dâwt ka sawi kan la ti fo thei ang em?
    ‘Mobile World’-ah kan cheng a. ‘Korean Virus’ in min run bawk a. Eng ang pawhin heng thil mak tak takte hian min run teh mahse, sachek kan ngainatnate, Vawksa leh Saum kan ngaihsanna te hi a bo mai mai rih hauh lovang tih ka hria. A chhan chu “Mizo’ kan ni tlat a lawm!  Amaherawh chu, heng kan changkanna themlem tak takte hi belhchian chet chet a, ngaihtuah deuh cheuh cheuh  a tul viau tawh a ni.
    Ram changkang (Developed Country) te dungthulin kan ‘fashion’ te hmang hian kan phei hi khai dial dial tawh mah ilang, châwm hlawm state-a cheng leh châwm hlawm fanu leh fapate kan la nih chhung chuan midum kawnglaite nen kan danglamna a lem chuang lo? Nitina kut hnathawka inhlawhfa, khawlaia thawmhnaw bal tak takte nena kal khu rum rumte hmuh laia thawhchhuah neih tum lem lo, hawi pir bawk, sam pir bawk, pawisa aia ‘khaw maw..!” tih pai tam zâwk tih hriat reng reng te inlâk changkanna hi eng ang changkanna chu nge?
    A dik tak chuan, heng kan thalaite’n kan entawn ‘Korean Celebrities’ te leh khawthlang lam mi, zai paha tual-sumsu ang maia su bu tlut tlut te thleng hian an chanchin han chhui chiang ngat ila, nu leh pate thawhchhuah sa hmanga sam ti phir a, ti kikawi kual kum khawlo mai mai an lo ni ve hauh hlei nem. A tam zâwkte khu harsatna tam tak paltlang hnua hlawhtlinna chang theite an ni chauh zâwk asin! Engkimah hian tuarna hmasak huam mi chauh te tan hlawhtlinna tlâng chhipah mutbu a phah theih chauh tih hi keini aiin an lo hrechiang zawk daih a nih hmel! Tu emaw chu harhchhuah kan ngai a ni.
    Kan sam a lo phir  emaw, ‘barakhaih thut ila pen nga vel lekah a tlu tawp thei ang...!’ tih tur khawpa kekawr kan lo ha fual a nih pawhin emaw, khawchhak ho dungthulin a no thei ang bera kan lo inchei ing euh vel a nih pawhin, hei hi i hria ang u. Kan ‘Fashion hian ram ropui min thlen dawn lo tih hi hria ila.  Sam phir chunga lei laih emaw,  cement chawh emaw pawh a mawi lutuk tlat tho! He thu mawi leh ril tak, “Hnaah chuan te lua a awm lo..” tih hi kan thinlungah hian kui tiah ni  thei hram se. ‘Master Degree’ nei thawh tur hrelote aia dumka ‘labour’-te thawhchhuah inhlut hleih ziate hi chhutpui ve bawk thin ila.
    A dik tak chuan, he kan changkanna hian a bikin keini thalaite chungah hian eng ang thil tha nge a thlen? Thil tha aiin, kan hringnuna sengluh chi miah loh thil thalo tam tak hi he thil avanga kan nunah hian thleng ta a ni zâwk hial lo maw? Nu leh pate hian, kan fate duhsak taka kan leisak ‘Mobile Phone’ -in an ‘Moral’ a chawh chhiat nasat zia hi kan ngaihtuah ve ngai em le? Kan hmangaihna lanchhuahtir nana kan hmatheh ‘Western Egg!?’ hi kan luchunga meisa chhemalh tu ala ni dawn tih hi kan dâwn pha ngai em le?
    Kan hmuh leh hriat miah loh hlan khan, kan fanu leh fapate khan hmeichhiat mipatna (Sex) chungchang hi keini ai mahin an hmelhriat zâwk  hial ta ve ang! Naute cheia kan chei  kan fanu leh fapate hian khawthlang ho nun pawlawh tak mai, serh leh sang nei hauh lote lemchan (Adult only...) , mumang lama hmuh atân pawha kan duh hauh loh tur kha tim eih lovin, blanket hnuaiah emaw, toilet chhungah emaw a khat tâwkin a thlirru veng veng thin tiin hrilh hriat nita ila..?  Nu leh pa thenkhat erawh hi chuan kan awih phal leh meuh ang em aw..?! Ngaihtuahna thar kan hman a ngai tawh a ni. 
    Talhfiak tellova kan rila rahte hmangaihna lanchhuahtir kan intihhmuhna ‘policy’ hi kan hnamin a thatpui meuh dawn lo niin a lang. Tam tak phei hi chuan kan fate hi kan duat lutuk a, ‘naupang an nia, hriatthiam tur a lawm...’ tiin an thlavang kan hauh chamchi a. Kan fate sualna lianpui hmuh loh der a, thenawm fate sualna erawh tlang tiata hmuh leh si erawh kan thiam ta hlawm riau emaw ni? Hei hi a ni ngei ang kan thalai tam tak thinlung ti awngrawp thintu chu? Suahsualna khura hnuh luh an nihin anchhia hial kan lawh leh duh bawk si a ni em?
    Hetianga ka rawn ziah chiam nachhan nia ka hriat chu. Kan thalaite khawvel, ti khawvel leh zualtu chu keini nu leh pate hi kan ni thei mai nia ka hriat vang a ni. He leia thing phun, a hunte a rahchhuak tur lo nita ila, kan zâr-te chu kan fate hi an ni mai dawn lawm ni? Kan zârte hi duh duh a uaikur leh kawih tliah mai mai kan phal fo a nih teh chuan, eng tikah mah rah duhawm kan chhuah hauh lovang le. Rah tha tak chhuah chu sawi loh, kan zar thenkhat tliak avang hian kan damchhungin kan natna hian dam tih ni a a nei ngai dawn lo a ni.
    Tumkhat chu lehkhabu dawr lian deuhah hian tihian ka zawt a. “ Lehkhabu rotling tak tak, khawvel chanchin ziahnate hi thalai lamah hian in hralh tha viau em..?” ka ti a. Dâwr nghaktute chuan, “Kan mizo thalaite zingah lehkhabu tha lei nalh nalh thin chu vang tak an ni..! Hetiang lei ai chuan Filmfare., Korean Celebrities chuanna.. etc. tih ang reng hi anni-ah chuan kan hralh tha zâwk....” tiin min chhang a. Ngaihtuahna a hruai thui duh khawp mai. “Anih eng ho hian nge lei tam ber ..?” tia ka zawh chuan, “Hnamdang, Chakma etc. ho hian min dawr tam zâwk ..” tiin min chhang nia maw le! Kan tu leh fate hian Chakma Chief Minister hi an la hrawn nawlh ang tih pawh hlauhawm tak a ni!
    Kan hringnunah hian heng khawvel thiamna leh finna hmanga siam, ‘fashion’ atana kan hman Mobile Handset, etc. -te hi hluihlawn ngawt chu thil theih chu a nih hauh lo. Amaherawh chu kan ‘fashion’ mil hian kan hringnun hi a kal em tih erawh mahni leh mahni kan infiah fo hi thil tul tak niin a lang. Inchei nalh tak chunga nu leh pate thawhchhuah sa hmanga lei tih hriat ngawih ngawih ‘Scooty’ hmanga inlâk ‘western’ vel hian kan hnam a chawimawi meuhin kei ka hre thei lo a ni. Ka ti lutuk em?