Hunpui-ah Lunglei a muanawm
    5 Jan, 2012: Report hrang hrang dawn dan in, kumin hian kumdang zawng aiin Krismas leh Kumthar vuakvet chhungin boruak a ralmuang in a muanawm hle a, Lunglei khawpui chhungah mak tak mai in police te chuan Dec 31 zan khan lock up ngai khawpa man an nei lo.
    Krismas leh Kumthar vuakvet a Lunglei Police report a a lan danin, Krismas urlawk zan hian zurui buaina siam mi 4 man an ni a, court lamah thawn an ni. Zurui chunga lirthei khalh mi 2 an man bawk.    Krismas ni leh zanah hian boruak a muanawm hle a, zurui buaina siam 2 man in court ah thawn an ni a, hemi ni leh zan hian boruak thalo dang a awm lem lo. Krismas ruaitheh ni leh zanah hian tlem chuan thawm a lian deuh a zurui buaina siam mi 2 court ah thawn in, zurui chunga motor khalh pakhat chawitir a ni a, zurui chunga motor khalh a mi  su pakhat chawitir a ni bawk. December 30 zan hian zurui buaina siam court ah thawn a ni. Kumhlui thlah zan hian boruak a muanawm hle a, zurui man an awm lova, dawr pakhata an thil zawrh tur mi pakhatin a ruk chu lak let a ni a, court ah hruai a ni bawk a, hei bak hi chu boruak duhawm lo thleng a awm hriat a ni lo.

Lunglawn khaw awptu lal pathumte hriat rengna lungphun
    5 Jan, 2012: Parl. Secy Pu S.Laldingliana chuan Dec. 29, 2011 khan kum 39 chhunga Lunglawn khaw awptu lal pathumte (3) te hriat rengna lungphun a hawng.
    Lunglawn Branch YMA te buatsaih Lunglawn Lal pathum Lalchhunga Zadeng, Manchiauva zadeng leh Tawnluia Zadeng te hriatrengna lungphun hawnnaah hian lungphun hawngtu Pu S.Laldingliana chuan thu sawiin  Lunglawn khaw mipuiten an khawtlang lo kaihruaitute hriat rengna lungphun na chang an hrtia chu fakawm a tih thu sawiin, Lunglei Thuamluaia muala artificial turf phah anih dawn avanga Lunglawn field chu Lunglei khaw mipuite tana hman rim ber tur thu sawiin  thawm that hna pawh thawh thuai anih dawn thu leh Lunglawn mipuiten lo hre thiam hram tura ngenin  Lunglawn in Health Sub Centre  hmun tur an neih remchan veleh a sum awm sa hmanga sak mai theih a nih tur thu a sawi.

Inhlantharna hun hmang
    5 Jan, 2012: Vawiin atang hian Synod office hrang hrangte hawn tan a ni leh ta a, hemi hma hian Nilai leh Beirual thupui lei duhte tan Synod Book room hrang hrangte chu a lo inhawng tawh a ni. Baptist Church of Mizoram pawhin vawiin atang hian an Office an hawng tan ve ta bawk a, naktukah hnathawktute Pathian hnena inhlantharna hun an hmang zui ang. Thawktute inhlan tharna hun hman a ni ang. Inhlan tharna programme hi Headquarters Office leh a chhehvela mite chuan Sap Upa leh Pu Buanga Hall-ah an hmang ang a; Lawngtlai leh Aizawla thawktute chuan Executive Secretary Office-ah a huhovin an hmang ang.

Police hotu-in lawmthu sawi
    5 Jan, 2012: Pu Vanlalliana, SDPO & PRO, Lunglei chuan thuchhuah siamin, Krismas leh Kumthar vuakvet vela Lunglei khawpui leh District chhung ah buaina leh harsatna lian tham a awm loh avang leh Dan leh thupek zawma mipui te’n hun nuam tak an hmang thei chu lawmawm a tih thu a sawi. Hetiang hun tha hmang thei tura tha leh sum, tawngtaina leh hun tam tak seng tute zawng zawng chungah Pathian hmingin lawmthu a sawi bawk.

Kohhran hrang hrang 4-a ruaithehna atan cheng nuai 5 chuang senral a ni
    Lunglei 5th January, 2012: Kum 2011 Krismas leh Kumhlui thlahna leh Kumthar 2012 lawmna hun chu Lunglei khawpui chhungah pawh, mimal, pawl leh Kohhran angin muanawm leh tluang thawkhat taka hlan a ni a, veng thenkhat erawh thihna avangin boruak dang tawn a ni ve bawk.
    Lunglei khawpui chhunga Kohhran 4 te-a member tamna theuhte, Krismas leh Kumthar ruai dinhmun lakkhawm hetiang hi a ni:
    BCM, Chanmari :- Krismas leh Kumthar ah vawk, bawng, Ar, Sangha leh Artui hmangin vawi 1 ve ve ruai an theh a, an sum senso zawng zawng hi cheng 300,000 vel a ni. BCM, Chanmari ah hian member 1960 vel an lawi mek a ni.
    UPC, Hqrs., Local Church, Chanmari :- Krismas leh Kumthar ruai vawi 2 leh chhang ruai vawi 2 an theh a, Vawk, Bawng, Ar, Artui leh sangha an ei a, cheng 56,000 vel an sengral. Hqrs. Local Church-ah hian member 370 vel an awm mek a, an zaikhawm boruak a tha viau a, nizan thleng khan an la zaikhawm.
    Presbyterian Church, Chanmari:- Tun dinhmun ah member 900 vel an awm mek a, Vawk, Bawng, Ar, Artui leh Sangha hmangin ruai vawi 2 an theh a, cheng 170,000 vel an sengral a, an zaikhawm boruak a tha thawkhat bawk.
    Salavation Army, Lunglei Corps (Citadel)  :- Krismas leh Kumthar ah bawng, vawk, Ar, Artui leh naupang tan Wai Wai hmangin ruai vawi 3 an theh a, Krismas ruai an nawn. An pawisa senso zawng zawng zat hi cheng 60,000 vel a ni a, Krismas dawna camping an neih chuan zaikhawm boruak a siamtha in an hlim hle. Lunglei Corps ah hian member 400 vel an lawi mek a ni.