Mizorama piang e ti lo chuan Mizoram chhuah lama (eastern) thilhlui chi hrang hrang kum za tam tak lo ding tawh te saw thla hnih-khat vel lek hma kha chuan ka lo la hmelhriat ngai hauh bik lova. Mawhpuh tur bera chu Mizo history zirlaite'n a bikin formal publication a awm loh lutuk vang leh media lamin an tuipui tawk lo va, mipuite min finchhuah tawk lovah ka ngai. Vanneihthlak takin kan Art and Culture Minister Pu PC Zoramsangliana bultumin heng Champhai district-a khaw hrang hrang te –  Lianpui, Dungtlang, Vaphai leh Farkawn te hi Tribal Research Institute-a kan hotu thenkhatte nen kan fang kual a. Amaherawhchu, Vangchhia khua, tlawh tel ve ngei tura kan lo ruahman sa chu khaw awm danin a zir loh em avangin kan tlawh thei ta lo a.  He khua hi tunhma pi pu te sulhnu pawimawh tak tak awmna a ni leh nghal a. 

Lianpui khuaah chuan hmanlai hun kan fang let leh a ang duh khawp mai. Lungdawh lianpui mai (menhirs), Lianpuia Lungdawh, dangdai taka inker, kutthemthiam taka cheimawi chu kan hmu a. A hunlaia mi te kut themthiam zia a tilang chiang hle a. Milem maksak tak tak a inker khat nuaih bawk a. Chung milemte chu ralthuam te, rannung te, sava te, thil rin bial te, belte lem leh thil dang dang an ni hlawm a. Mihring lem leh a ralthuam te a awm ve tlat hian thlanlung a nih loh pawhin pasaltha chawimawina lungphun emaw tal a nih a rinawm. He lungphun hi kum za tam tak lo ding tawh niin a lang. Tin, hetiang lung lian tak an han hung ruau thei mai hi khatih hun laia mite theuneu loh zia tilangtu niin ka hria. He thil hi hmanlaia khawtlang 'notice board’' te pawh a ni thei a. Thil inrin bial hi thil hlat záwng tehna tunlai 'map'-a kan hman ang hi a ni mai thei bawk a ni.

Farkawn-ah chuan hmanlai kawng 'Mirawng Lamlian' an tih Farkawn tlánga inkual chho ruih chu kan va zawh ve a. Lungkei Phawtial an tih a milem inziak rang nuaih chuan mit a la khawp a. He thil inziak te hi hrilhfiah mai theih chi pawh niin an lang lova. Amaherawhchu hun hmanlai tak chu a kawk chiang hle a ni. Mirawng Lamlian te, lungphun te (menhirs), lung rem te leh Lamsial Puk-a mihring ruhro te leh milem inziak rang nuaih kan sawi te khian kan Mizo history chhuina-ah nasa takin min puih theih a rinawm a. Mizo history chhui leh zirna lampang hi a la changtlung lo hle a. Heng thil te hian a-zawng a-za chuan min pui thei lo maithei, mahse tangkaina an nei dawn a ni.

Mizoram sorkar thil leh hmun humhalh heng Thasiama Se No Neihna, Fiara Tui, Thasiama Sangha Khawina, Kung Awrhi Puk leh Lianchhiari Lunglen Tlang te kan tlawh bawk a. Mahse heng hmun pawimawh te kan chei that (restore) dan hian lung a dum lo hle a ni.  A hminga 'expert' inti mithenkhat kuthnu tuihnai lo tak a ni tih pawh a hriat theih a. Hnam culture kaihhnawih sulhnu pawimawh tak an nihna hrechianga kan humhalh thiam a pawimawh hle a ni. Hetiang sulhnu hlui leh hlu te tha taka kan humhalh leh enkawl theih nan hengte hi a pawimawh awm e.

 1. Art and Culture Department hian mithiam tha taka 'train' chhuah officer hnuaiah a hrangin Preservation Branch hetiang thil hlui te humhalh leh enkawl tur bik nei ta se. Chu chuan VC leh YMA-te nena tangkawpin hetiang veng leh enkawl tur mi ruai ta bawk se.
 2. Kan Art and Culture bawk hian pipu sulhnu thenkhat centrally protected monuments-a puan (declared) a nih theih nan Archaelogical Survey of India, Guwahati Circle nen tangkawpin tan nasa takin la se.
 3. Hetiang lungker leh thil inziak te hian a bik takin 'chemical treatment' an mamawh a ni. 'Chemical treatment' tih hma leh tih zawha an thla tha taka lak leh ziaka felfai taka chhinchhiahna (documentation) siam a pawimawh.
 4. Lungphun (menhirs) tlu tawh te rualrem taka tundin that leh a, a khi emaw kak emaw te thawm that.
 5. Heng hmun te hian kawng leh inkalpawhna tha an mamawh. Heng kawngah hian Falkawn 'Heritage Preservation Committee' te hmalakna a entawntlak hle. Sorkar pawhin a puihbawm thiam a ttha ang.
 6. Heng lungphun ilo te hi kal pelh paha han chhiar mai bakah a khawih-a khawih hlawh tak pawh an ni a. Chuvang chuan tha taka zir chian chuan tunhmaa lamlian hlui chhuichhuah nan pawh a tangkai a rinawm. Hemi kawngah hian MZU-a History and Ethnography Department te hian Art and Culture nena ttangkawpin hma han la se a duhawm.
 7. Hetiang sulhnu pawimawhna hi a khaw mipuite zirtir ngun a pawimawh hle a. Khualzinmi (tourist) tlawh tlaka siam thei turin hma la ila. Chumi atan chuan tawng chi hrang hrang a bikin English-a ziak 'brochure' te chhuah ta ila.
 8. Tin, state sorkar hian hetiang thil hlui humhalh kawngah hian 'policy' felfai tak a neih a pawimawh. Chu chuan khaw thenkhat te inhmuh thiamlohna hi a chinfel mai bakah mi intithiam thenkhat te kuthlei lakah a veng fimkhur bawk ang a. He thilah hian kei ngei paw'n mi intithiam thenkhatte ngaihdan belhchian dawllo ka dawng nual a ni. Chutiang kan ti lo a nih chuan mi intithiam 'expert' tthenkhat te hian thil thar an rawn hmuchhuak leh anga heng khaw mipuite hi an ti chiai leh mai mai dawn a ni. Sorkar lah chuan politics avangin thutlukna a siam leh ngei awm si a. Chung chuan heng pi pu te sulhnu enkawl hna hi a tikhaihlak viau ang.