Sawrkar hnathawk lo tan NEDFi:- Nimin chawhnu lam khan KVI Office, Venglai-ah (North Eastern Develoment & Finance Corporation Ltd.) NEDFi chuan media an kawm a, Lunglei mite hmasawnna rahbi a nih theih dan an sawiho a ni.
    NEDFi hi Mioram-ah a awmna a le rei lo hle a, India hmarchhak lam ram te’n (Sikkim telin) sumdawnna leh thil siamchuah lama hma an sawn theih nana Company ding lai a nih a, hemi kaltlang hian sumdawnna liantham tak tak a tih theih a ni.
    NEDFi Branch Manager, Pu Lalhruaizela chuan NEDFi leh a thiltum bakah a hmalakna te tarlangin sumdawnna kawng hrang hrang thawktu-te’n sawrkar Bank leh mimal Bank ah te harsatna an neih sutkian chu an thil tum bulpui a nih thu sawiin, sawrkar hnathawk ve lo te tanpuitu an nih thu a sawi a, sawrkar hnathawk-te chu \anpuina an pek ve theih loh zawk thu a sawi a;  Car loan, Housing loan, etc., an pe thei lo bawk a ni.
    NEDFi hian project hrang hrang an nei a, hmeichhe awmnem zawk te’n sumdawnna an kalpui theihna tur a bik taka loan an pek theih thu Pu Hruaizela hian a sawi bawk a, hei bakah hian loan liantham leh subsidy tam tak tak an pek theih thu sawiin, cheng nuai 25 atanga cheng vbc.1000 thleng pawh pechhuak thei an nih thu a sawi bawk a ni.
    NEDFi, Lunglei Branch hi JB Residence bul, Pu R.Laldawngliana (DPC-SSA) building-ah Office an nei a,  hrechiang duh chuan dawr theih reng an ni.

Chhimbial Chhantu an thukhawm
    Nimin, chawhma dar 11:00 khan Chhimbial Chhantu Executive Committee thutkhawm, kumina  neih hmasak ber chu YMA Sub-Hqrs., Conference Hall-ah neih a ni.
     President Pu B.Lalchungnunga Ex -MLA chuan a kaihruai a, hetah hian New Panchayati Raj Institution(NRPI) chu Mizoram ah kalpui ve tura sawrkar hnena thlen leh Municipality Board Lunglei khawpuiah kalpui tura sawrkar ngen nise an ti a, sawrkar laipui lamah pawha tul anga memorundum thlen leh nise an ti bawk.
    Hemi chungchang hi member te’n sawiin, Mizoram Assembly House pass a nih tawh laiin, Lunglei hmuna Municipal Board kalpui theih reng tawh, tun thlenga sawrkarin a kalpui duh lo chu pawi an tih thu an sawi a, tuna Aizawl-a AMC kaltlanga UD&PA Sum lo kal, Officer pakhat ringa khawpui chhunga sum tam tak hman chu sawrkar laipui duh dan a nih loh thu te, heng sum leh MGNREGS sum hman kawp chu thil diklo a nih avangin Lungleiah hian Municipal Board hi din thuai nise tiin, hmalak dan tur ngaihtuah nise an ti bawk.

MSU-in Lungsen RD Block thiah duh lo
    Mizo Students' Union Regional Hqrs. Lunglei chuan, Sorkar thuneitute atanga RD Block, Lungsen \hiah tumna awm mek MSU Sub-Hqrs, Lungsen-te'n  an duh lohna thu an auchhuahpui chu  an thlawp tih an sawi a. Hetianga RD Block changtlung sa thiah a ni tur hi an hrethiam lo hle a, Sawrkar thuneituten a rang thei ang bera ngaihtuah chiang vat tur leh a kalphung pang ngai a kal zel a, tun aia changtlung zawka din chho zawk turin sawrkar thuneitute an ngen tih MSU Regional Hqrs, Lunglei chuan thuchhuah siamin an tarlang.
    Tin, MSU Sub-Hqrs, Lungsen awm lo anga sawina awm hi thudik lo nia tarlangin, MSU Sub-Hqrs, Lungsen hi tun hma atanga lo din tawh niin, engemaw harsatna leh rokhawlhna avangin hun rei tak kal phung pang ngaia kal thei lovin an awm a, amaherawhchu nikum lamah te hruaitu thar inruatin din chhoh that leh mek zawk a ni tih MSU Regn. Hqrs, Lunglei chuan thuchhuah an siamah an tarlang a ni.

Zirlai Pass tharte chawimawina hmanpui
    MSU Regional  Hqrs. President PC Lalrawngbawla chuan khuallian niin vawiin hian Lunglei Pangzawl Students' Union-te'n HSLC leh HSSLC, 2012-a zirlai pass tharte chawimawina hun a hmanpui a, MSU Lunglei OB-te'n an tawiawmg. Zirlai pass thar chawimawite hi mi 30 chuang an ni.

Pastor Bial 3 Revival Meeting
    Ni 18-20, May, 2012 chhung awh tur, Lunglei District PYD Bial thum –  Haulawng Bial, Chhiphir Bial leh Theiriat Bial te Revival Meeting chu Haulawng 'Lalveng' UPC Biakin-ah nghah a ni a.  Speaker-ah Rev C.Lalrintluanga niin, thupui atan "I ram lo thleng rawh se" tih a ni.  He hun hi Rev Ralkapkunga Khiangte, District Superintendent chuan a hmanpui ang.

Thuamluaia Mual eng enchhin dawn
    Zanin hian Thuamluaia Mual-a light siam zawh tawh chu tih-en chhin a ni dawn a;  hemi rual hian a siamtu, P&E Dept. hnathawk te’n inkhelin mual hi an hmang chhin dawn a, vawiin chhun khan \anin zanah final an khel ang.

JSSK programme hmang:- Vawiin khan DC’s Conference Hall-ah District Level Training on JSSK Programme neih a ni a, khual zahawm niin;  MJA President, Pu H Lalthansanga chuan a hmanpui.
    He hun hi CMO Dr. F Lallianhlira chuan kaihruaiin, JSSK chungchang sawifiahna leh a dinhmun a sawi a, hei hi sawrkar laipui lam atanga tih a nih thu sawiin, sawrkar damdawiin leh a peng hrang hranga naute piang chhawmdawl lam hna a nih thu a sawi. Hemi hnuai ah hian naute te chu a thlawnin enkawl theih an ni a, mahse a kalphung hi a la fel vek loh avang leh hnathawk tur te’n Training an la neih loh avanga hman a la nih loh thu a sawi a, hmang tura inpuahchah mek an nih thu a sawi.
    Pu Lalthansanga chuan training neih pawimawhna sawiin, mipui te innghahna ni tlak khawpin, tawngkam thlenga fimkhur turin hnathawk te chu a fuih a, abik takin medical lama thawk te chu eizawnna mai ni lovin, rawngbawlna sang tak a nih avangin fimkhur tak leh thahnemngai taka thawk turin a fuih bawk.
    JSSK hnuai ah hian India rama naute piang thi tam lutuk leh raicheh bakah, naupai that loh avanga thihna titlem turin hmalak a ni dawn a, Dan mumal taka siamin, naute damlo enkawl leh a tihdam hna thawh tan a ni ang a, sawrkar hnuaia awm damdawiin bakah, Sub-Centre, CHC, PHC, UHC kaltlangin hmalak a ni ang.

Pass-te an chawimawi dawn
    Naktuk zan dar 7:00 hian Electric-veng YMA buatsaihin, an veng Community Hall-ah tunhnaia HSLC leh HSSLC pass te chawimawina hun hman a ni dawn.
    Hun hi Pu Saizâwna Sailo, Chairman, Literature Sub-Comtt., Electricveng Br YMA chuan a kaihruai ang a;  Sub-Hqrs.YMA lam hruaitu te’n thu sawina hun hmangin, Upa R.Rozika, National Teacher Awardee chuan thu a sawi bawk ang.
    YMA hming hian Pu LH Lianzâma, President, Electricveng Br YMA chuan lawmpuina leh chawimawina thuziak a hlan ang a, naupang te hi interview niehpui an nih dawn bakah zaithiam tak tak– Tv Michael VL Rema leh Nl H Lalmuanpuii te an zai ang.

NYK lamin hunpui hman tum
    Tun thla, 22 May, 2012 hian NYK, Lunglei chuan Saikuti Hall ahYouth Initiative for Peace & Development Felowship Programme an hmang dawn.
    Hei hi Ministry of Youth Affairs & Sports nen tangkawpa an buatsaih tur a ni a, Lunglei DC chu khuallian a ni ang.
    Hei programme hi India hmarchhak lama state 5 ah hman niin, remna leh muanna a awm zel teih nan tih thin a ni a;  Mizoram-ah pawh Aizawl, Lunglei, Saiha leh Lanwgtlai ah te hman a ni ang.
    Hemi hun ah hian Relief & Development, BCM kaltlanga sam, Music Album tlangzarh a ni dawn bawk a ni.

Nakuk-ah B.ball tan dawn
    Naktuk hian Lunglawn Mual-ah BALD leh A.Tana \hian te \angruala huaihawt A.Tana Memorial Basketball Tournament chu \an a ni dawn a;  Pool A (Electricveng-B; Chanmari-B; Mixup-K) leh Pool B (Electricveng-A; Lunglawn-B; Bazarveng) te’n league system-in naktuk hian an khel ang.
    A tukleh-ah seeded team : Chanmari-A; Mix-up; Serkawn leh Lunglawn-A te’n an khel ve leh anga;  Inrinni hian Final an khel ang.