BCM Evangelist Conference
 Mizoram Baptist Kohhran Evangelistic Teams' Conference 2012 Jan 26-29, 2012 chhung neih tur chu Serkawn Biak In-ah neih a tan ni ta. He Conference Thupui atan hian “Thiltihtheihnaa Thuam” tih a ni.
 Vawiin-ah nilenga Seminar neiin naktuk-ah pawh chhunzawm a ni ang. Zan lamah Vantlang inkhawm a awm zel bawk ang. Pathianni-ah Vantlang Inkhawm awmin Chawhnu lamah pawh Inpawlhona leh Zan lamah Vantlang Inkhawm a awm leh dawn a ni. Tunah hian BCM hian Recognised team 43 a nei a; team khat atangin mi 5 vel theuh tel tura beisei a ni.
 Hemi hun lai hian Tualchhung Kohhran tu mahin Evangelist te nen programme siam lo turin ngen an ni.  He Conference Progamme hi JB Cable Network leh LDF Cable Network ten Live-in an pechhuak thin.

Hmeithai In an sak sak
 Farm -veng  khawtlang  chuan vawiin  khan an veng chhunga hmeithai Pi Biaktluangi In hnatlangin an sak sak. Pi Biaktluangi In sak nan hian Farm-veng chhunga sawrkar hnathawk leh mi tlawmngaite’n sum an thawhkhawm a, hei bakah hian Farm-veng Presbyterian Kohhran chuan a chhuat tur thingphel an tum bakah bialtu MLA Pu Joseph Lalhimpuia'n inchung tur Rangva bundel 4 a pe bawk a ni.
 Pi Biaktluangi te hi chhungkaw member paruk an ni a, vawiin  khan mitlawmngaite thawhkhawm hmang hian khawtlang chuan an in tur sak hna hi an thawk a,  22 ft. bialin In hi an sa a ni. Pi Biaktluangi In sakna tur atan hian Farm veng chhung atanga mi tlawmngaite thawhkhawm bakah veng pawn lam atang pawhin tanpuina engemawzat an dawng niin Farm veng khawtlang hruaitute chuan an sawi.

MJA inthlang thar dawn
 Lunglei MJA chuan naktuk hian hruaitu inthlan tharna an nei dawn a, Press Club ah neih tur niin, RO atan Pu P Lalhmangaihzuala hman a ni ang.
 Hemi atan hian candidate tur te chuan nomination an file a ngaih angin a hnuaia tarlan te hian an file tawh. President atan hian Pu H Lalthansanga chuan file-in, President nilai mek Pu K Lalrinpuia chu a inhnukdawk leh a, Vice President atan Pu Lalrintluanga Khiangte chauhin a file a, Treasurer-ah hian Pu F Lalngaihzuala (Thlirvelna); Pu Lalduhthlanga (LDF) leh Pu Laltlanthanga te’n an file bawk a ni. Executive ni tur hian nomination file ve a ngaih avangin,  Pu Lalrinchhana (LDF), Pu F Lalngaihzuala (Thlirvelna), Pu Rokhawlkima (Lunglei Times), Thanghmingliana (Zunzam), K Lalrochana (Lunglei Tribune) leh Lalrochama (Zochhiar) te’n an file bawk.

MZI inthlang thar
 Nimin khan Mizo Zaimi Insuihkhawm pawl Sub. Hqrs., Lunglei chuan hetiang hian hruaitu tharte thlanna an nei: President : Johny Zoramthanga; Vice President : Lalkunga Pachuau;  General Secretary : KF Lalthuamluaia;  Joint Secretary : K Lalthangzela; Information Secy : Lalrintluanga Khiangte; Treasurer : R Lalrinliani; Finance Secy.: C Lalnunpuia te an ni.

Truck neitu te’n Assembly nei
 Nimin khan Lunglei District Truck Owners’ Association (LDTOA) chuan  an Office ah General Assembly neiin kum 2012-2013 chhunga an hruaitu tur thlan tharna an nei.
 Hruaitu thlana tharna hi Pu H Lalthansanga, Editor, Lunglei Times, chuan RO niin inthlanna hi a neihpui a, a hnuaia tarlan ang hian hruaitu thar an thlang : President : Samson Zoramthanga, Chanmari-III; Vice President : ZD Rualchhawnzova, Ramzotlang;  General Secretary : K Lalthansanga, Lunglawn;  Joint Secretary : K Lalzara, Salem; Treasurer : P Lalthakima, Lunglawn; Finance Secy.: Lalengmawia, Venglai te an ni.

UPC inkhawmpui nei mek zel
 Lunglei District UPC Pastor bial inkhawmpui chu neih chhoh mek niin, 29 January (Pathianni) hmangin Haulawng bial in New Haulawng ah an nei a, Tawipui bial in Mualcheng South ah neiin, Chawngte bial in Mautlang ah, Theiriat bial in Thaizawl ah neiin, Chhipphir bial in Mualthuam N ah an nei a, District Official leh District Superintendent aiawh te’n an hmanpui dawn a ni. January 28 hian bial rorelna an nei ang a, 5 February (Pathianni) hmangin pastor bial 5 in inkhawmpui an nei leh ang.