Thuamluaia Mual-a grass phah chu zawhfel thuai tumin, vawiin khan artificial turf chu phah tan a ni a, a phah tur hian a thiam bik, Canadian mi a rawn kal. Grass phah hi LDSC lam hotute’n an uap hneh hle a, a hna viltu, Abhijit-a chuan ni 15 chhunga zawh hman an inrin thu a sawi. Grass phah hi inches 2 chi kha a ni a, silica sand leh rubber te nen phah chhuah vek a ni ang. Lung petu thenkhat-te’n lung tha lo an pek avangin lung phah kha duh anga a chak loh thu an sawi a, grass hi FIFA in a pawmpui thlap khawpa grass tha niin an sawi bawk.
 Light chhitna tur hi mual kil tinah hian dah tuma hmalak mek niin, ft.50-a sanga siam a ni a, a kil tlang lamah RCC-a siam niin, a kil chhak lamah hian ban lian pangngai taka siam tum a ni bawk.
 A hna viltute chuan mual-a motor khalh zir ching an awm thin chu pawi an tih thu sawiin, a hungna tha taka siam a tul tur thu an sawi a, grass chungah hian engpawh dah theih a nih laiin, a cho khuar leh thil phun zawnga tih chu a that loh thu an sawi a, company te hian kum 7 chhung atan warranty an pe dawn thung.

2012 VC inthlanna atan Lunglei Dist-ah voters 98,550 awm
 Village Council, 2012 inthlanna lo awm tur atan, Lunglei District chhunga dinhmun thar ber chu, AERO, Election to Village Councils, Lunglei District-in a tihchhuah-ah VC 138 a awm a, voters mi 98,550 an awm bawk. 33-Lunglei South-ah voters tam berin, 16,781 an awm a, 35 West Tuipui-ah voters tlam berin, 11,308 an awm.
 Nimin chawhnu dar 1:00 khan Lunglei Bawrhsap, Pu V Sapchhunga, IAS chuan a Office chamber-ah VC inthlan tur chungchangah hian thuthar lakhawmtu-te kawmin, hriatttur pawimawhte puanzarna a nei a ni.
 VC inthlan hi 23rd February 2012, zing dar 7:00 – tlai 4:00 chhungin neih tur a ni dawn a, inthlan that ngai a awm a nih chuan a tuk 24th Feb.-ah neih tur a ni ang.  Inthlan nî la la hian inthlan zawhah vote chhiar nghal tura tih a ni.
 VC nomination file theih hun hnuhnung ber chu 1st February 2012 niin, inhnuhdawh theih hun hnuhnung ber chu 3rd February 2012 a ni a.  Hemi nî vek hian candidate te hnenah symbol pein, candidate te list tarchhuah a ni nghal bawk ang.
 VC inthlanna-ah hian political party hrang hrang mi leh sa te'n an intawm tur 'Common Election Camp' pakhat siam a ni dawn a, hetah hian party flag leh symbol te tar phal a ni lova, ei leh in tur siam leh sem phal a ni lo bawk.

Eng Dept.-ah pawh lungawilohna nei tan complaint a thehluh theih dawn
 Lunglei, 31 January, 2012: Vawiin chawhma dar 10:00 khan Lunglei DC Conference Hall ah Centralised Public Grievances Redressal and Monitoring System tih chu Office zawng zawng leh Computer Operator-te’n training an nei.
 He Training hi NIC Aizawl leh ICT Aizawl ami ten an hmanpui a ni. He training hi Web base niin February 2012 thla laihawl vel hian launch hman tum a ni a, he Centralised Public Grievances Redressal and Monitoring System awmzia chu mipuiten eng department ah pawh sawisel tur leh lungawilohna an neih chuan complaint a thehluh theih dawn a ni. Website launch hun ah chuan mipuiaw.nic.in tih a ni ang a, Department tin ah nodal officer an awm vek bawk ang.
 Complaint thehluh dawn hian mahni document fel taka ziah tur a ni a, form a awmsa vek bawk a, hming diktak, address kimchang chiang tak leh phone No. te ziah vek tur a ni. Complaint hi a complaint na department ten an chhang ngei ngei tur a ni a, an chhang duhlo anih chuan DC hnenah a zualko thei dawn bawk a ni. Complaint-tu hian midangin a hming leh nihna an hriat sak a duhloh chuan password an nei vek ang a, officer-in a khawih hman dawn lo anih emaw a thiam tawklo anih chuan mipakhat (an staff te) hnen ah a user ID leh password a hrilh thei ang. Uangthuang-a complaint mai mai chi a ni dawn lova, chutiang a awm anih chuan anmahni zawn chhuah a ni ang a, dan anga hrem theih a ni ang.
 Hei hi good governance cell, DP&AR Government of Mizoram bultum a ni ang, an monitor bawk ang. 2nd March, 2012 ral hmain District tinah training neih vek tur a ni ang, complaint a submit hi eng chen nge a thlen tawh a concerned department ah a thleng tawh em?tih te leh process a ni em tih te a en theih ang a, a print chhuah theih bawk ang. He training hi India ram state 3 ah an kalpui tawh a a palina atan Mizoram-ah hma lak mek a ni.