RMSA hnuaia SMDC Member-te kohkhawm an ni
 Lunglei; 3 February, 2012: Vawiin khan Lunglei District-a Rastrya Madhyamik Shiksa Abyan (RMSA) hnuaia School Management Development Committee(SMDC) member zawng zawng te ko khawmin,  SMDC te pual hian Govt Leitlangpui Higher Secondary School hall-ah Training an nei.
 He hun hi Pu Zaduna DEO & DPC [RMSA]-in hmanpuiin RMSA hnuaia sum lokal te uluk taka hmana hman dan felfai taka vawn a ngaih avangin he training hi koh a nih thu sawiin taima taka train turin SMDC member kalkhawmte a chah a ni. He hunah hian SMDC te pawimawhna leh hnathawh dan turte  inhrilhriatna Training an nei a, he thu zirtirna petu Pu C.Lalbiakmawia Dy DPC RMSA  chuan, tunlai khawvelah zirna tha tluantling leh rintlak nei turin khawtlang hruaitute leh tlawmmngai pawl te nena thawhho that pawimawh a tih thu a sawi a, SMDC hian school building chhia, room indaihlo tih leh naupang zirna hmanraw  hrang hrang leh zirlaibu inthiarna te bakah tuithianghlim intur te thlenga ngaituah na senga a tul anga hma lak  zel tul a tih thu a sawi.
 Hei bakah School Annual Grant hman dan tur leh hna te nau deuh thawh dan tur zirtirna Pu Joseph Lalngaisanga Co-Ordinator in a nei a, chawhnu lamah sum vawn dan leh Planning Process leh tul dangte zirhona an nei leh a ni.
 Hetih lai hian 6 February 2012-ah RMSA Lunglei District hmalakna-in Lunglei District High School Teacher 30 velte chu 1st Batch atan Kolkata-ah Study Tour neiin an kal dawn a,  2nd Batch leh 3rd Batch te pawh hun rei lo teah kalpui tum an ni.  Zirlai naupangte pawh Study Tour neiin Rampawn leh Ramchhunga neihpui turin ruahmanna kalpui mek a ni bawk.

Zohnuai-a 'Zâwng' an humhalh tlat
 Zohnuai khamtlang phei, YMA Safety Reserve huamchhungah tunlaiin Zâwng nupa an cheng mek a, hetianga nungcha-te kohlêt lehna tura ramngaw humhalh hi Zohnuai Branch YMA-in a tum ber pakhat a nih avangin an lawm thu an sawi a;  chuvangin mi tamahin tina lo turin ngenna an siam a ni.  Zohnuai Br YMA chuan ngenna an siam rual hian an ngenna pawisa lova, lo tiná emaw, khawih tum an awm chuan Dàn-in a phût angin na taka, action lak an tum thu an sawi.

MBKHP inkhawmpui kal zel
 Mizoram Baptist Kohhran Hmeichhe Pawl [MBKHP] In-khawmpui chu Zobawk mual ah nizan atanga tanin tluang taka neih chhoh zel niin, tukin zing khan Bible Study leh Tawngtai hun hman a ni a, dar 9:30 atanga dar 12:00 khan Rorel inkhawm neih a ni. Chawhnu dar 1:00 atang tanin, Seminar neih chhunzawm a ni a, he hun hi Pi Hmangaihkimi, Bawngkawn Bial chuan kaihruaiin, Grace Society puala hman niin, Project Co-ordinator in Seminar a neihpui a, Kristian chhungkua tih thupui hmangin, Upa P Lianngengi, Aizawl chuan hun a hmang bawk.
 Zan lamah hian Pathian Biak inkhawm nei tura ruahmanna siam a ni a, Rev. C Lalhungliana’n thuchah sawiin, Electric Bial zaipawl; Theiriat; BCM Trinity, Zobawk; Serchhip Bial BKHP leh Cherhlun Bial BKHP te’n hla an rem ang a, chawhma lam khan Theiriat leh Chipphir te’n hla an rem bawk.
 Organiser, MBKHP Report thar ber ang chuan tun dinhmun-ah BKHP member zat hi 26,397 niin an punna chu 43 a ni a, Unit 403 awmin, Pastor Bial zat chu 72 a ni.
 MBKHP Treasurer-in sum dinhmun, 18.2.2011 - 20.1.2012 a tarlan dan chu hetiang a ni:- Opening Balance, Finance atanga dawn leh Bank interest zawng zawng belhkhawm chu Rs. 4,055,873/- niin hmanral zawng zawng chu Rs. 3,563, 509/- ni bawkin, Balance chu Rs. 492,364/- a ni.

MAL thu-hla
 Naktuk zing dar 7:00 ah MAL Hqrs. Lunglei Executive Committee Meeting, Pu PC Lalduhthanga (LDF) te in, Venglai ah koh a ni a, member te kim taka kal turin an inhriattir.
 Hetah hian 17 Feb. 2012, Lunglei-a Saiha, Lawngtlai leh Lunglei MAL te’n a hunhova an huaihawt, “Hnam Inpumkhatna Seminar” neih dan tur leh “Zalen Cabin” lehkhabu chhut thar leh tur chungchang te an ngaihtuah ang.
 Hnam Inpumkhatna Seminar ah hian khuallian atana an sawm, Pu PC Zoramsangliana, Minister chu an be chiang tawh niin an sawi.

Lirthei suasam; an chàng reng
 Nizan khan misual tu tih hriat loh te'n Chanmari-a motor pathum an suasam a;  blade-in motor hood te hi an zaichhe nasa hle.
 Motor suasam te hi MZ-01 5850 (Gypsy), Er. Pazawna, SDO, PWD ta,  MZ-01 9600 (Gypsy),  Er. PC Chhiarkima, SDO, PWD ta leh MZ-02 5207 (Gypsy), Pi Helen Zomuanthangi, APO, DRDA kawl lai te an ni a.  Helai veng bawra motor-te hian khawih an tawk zing tawh hle mai a, a veng neitu-te pawhin kan ning tawh takzet a ni.  Nikum kum tawp lam khan Pi Heleni motor-a petrol hi tu tihhriat loh te'n an lo siak-chhuak vak mai a, kawmchhak tuizem phena an petrol siakchhuah, gallon-a an thuhruk chu an rawn lam leh mi \hahnemngai pakhatin a lo chang tawh a, mahse misual hi a rawn lang leh ta lo a ni.

Venglai-ah Bomb a puak
 Nizanhmasa khan Venglai-a NYK Office hnuai, kawng sirah Bomb a puak a;  hei hi a titu hriat a nih loh bakah, bomb pawh hi bomb liantham a nih loh an ring a;  mahse a puak ring hle niin an sawi thung.
 Bomb puah hun lai hi zan dar 7:00 vel niin, a zâwn deuhin vawihnih a puak hman a, bomb puahna hmun hnai awm te pawhin a titu niawm an hriat hman loh thu sawiin, motor tlan lai atanga tihpuah niawm taka a lan thu an sawi.
 Bomb puah hnu lawk hian a hmunah Lunglei Police-te chu rawn thleng nghalin enfiah a ni a, mahse bomb lian lem lo, buara-a tuam niawma a lan avangin thu an kalpui zui zel lemlo a ni.
 Helai hnaia awm tan thil hlauhawm tham a nih avangin, mipui-te'n a titu hian ti tawh lo se an duh thu an sawi tam hle.

LDSC-te’n mual an en leh
 Vawiin chhun dar 12:00 khan LDSC hruaitu-te'n Thuamluaia Muala Artificial Grass phah mek, Hmar lama Grass të tak të të an zawmkhawm chu an enfiah a, zawmkhawm loha tih theih a nih thu an sawi.  Grass Roll khat dang la awm reng si a, a thema an zawm tlat chu a hmunah an enchiang mahse a outline siam zawh a nih tawh avangin tihdanglam a harsat thu an sawi.

YMA-in Saiha chhawmdawl dawn
 Saiha-a kangmei chhuak nasa tak avanga chhiat tuar te chhawmdawlin,  Sub-Hqrs YMA, Lunglei chuan tanpui nise an ti a, cheng 10,000 pek an tum. Chhawmdawlna sum pe tur hian  Pu Lalbiakzara, Asst. Secy. leh Pu Lalhminghlua, SEC& Disaster Commitee Chairman-te kal tura tih an ni.

Anti Leprosy Week
 Lunglei Dist-a Anti Leprosy week 30th January - 13.Feb.2012 thleng tur neih mekah AIR leh Local TV Cable te kaltlangin  phar laka inven dan leh phar chung changa hmalak dan tur zirtirna neih mek a ni a. He Anti Leprosy week denchhen hian Lunglei Dist huam chhunga Health Worker ten an bial chhung theuh tlawhin phar natna nei thar an awm leh awm loh zawn chhuah hna thawk turin ruahmanna an siam mek a. Dr Lalremmawii District Leprosy Officer chuan  Health Worker te chu  phar natna vei thar hmu chhuaktute hnenah Rs 500 zel pek tur an nih thu tarlangin phar natna hi tihdam theih a nih thu sawiin mipuite tawiawmna pawh a ngen nghal bawk a ni.