14 Feb: Vawiin khan Valentines Day pualin, mithahnem takte’n Civil Hospital-ah thisen an pe a, a bik takin mimalin an pek bakah, nula leh tlangval inkawp-te’n inthurualin thisen an pe a ni.
 Bethsy Lalrinsangi chuan hma hruaia pe hmasain, a vawi 6 pekna a ni a. Thisen pe hnem tawh tak, H.Lalthlamuana, Chanmari pawhin pe lehin vawi 40 a pe tawh a ni. He chanchin buatsaih lai thlenga thisen pe tawhtu dangte chu, Polytechnic zirlai 70 vel, DIET-a training lai 20 vel, LGHSS zirlai 10 te’n pein, MJA member engemawzatte’n an pe bawk.
 Thisen pek runpui neih hma hian hun tawi te inkhawm neih a ni a, he hun hi MJA Vice President, Pu Lalrintluanga Khiangte chuan kaihruaiin, Dr. Zolianthanga, Blood Bank Officer chuan thusawina hun neiin, AVBD Secretary, Pu Lalrotluanga chuan thu a sawi bawk a, AVBD chu Mizoram ah a din hmasa ber dawttu a nih laia, District dangin an thansan avanga hmalakna tur tam tak a awm thu sawiin, nikum khan 56% vel chauh thisen pek a nih thu a sawi. Pu H. Lalthansanga, MJA President chuan thisen pe tura kalkhawm te hnenah lawmthu sawiin, thisen hi lak chhunzawm nghal a ni.
 Thuthar lakkhawm lai hian thisen pe tur hi an la kal belh zel a, thisen pek zat chiah hi hriat hman a ni ta rih lo.
 Thisen pek runpui neih hi MJA, Dist. Hqrs., Lunglei  leh Blood Bank, Civil Hospital te huaihawt niin, a hluttu leh mi tlawmngai an tel tha hle a, Pu Lalthan Zuala, EE (PWD Building) chuan thisen petute ei tur -Rasgola hi a tumsak vek a ni.