Lunglei-a Kawmzawl Airport siam tumna leh Saitluk Airport siam tumna chu Mizoram sawrkar chuan chak takin a kalpui mek a, tunhnai maia Chief Minister leh Airport Authority of India hotute'n an enfiah hnuah tukin zing khan henglai hmun hi mi pawimawh tak tak ten an enfiah nawn leh a ni a, finfiah nghal vek a ni.

Airport Authority of India hotute leh  Pu Joseph Lalhimpuia HPC Vice Chairman, Pu S.Lal-dingliana Parliamentary Secretary te bakah Lunglei DC Pi M.Zo-hmingthangi leh mi pawimawh thahnem tak te chuan, tukin zing khan  Lunglei a Airport siamna tur hi a hmun ngeiah chipchiar takin an enfiah a ni.

 

Tukin a Airport hmun tur entute hian Kawmzawl Airport Thlawhna te chi tum theihna tur atana buatsaih dan tur an en hmasa a, Airport  Area chin tura ruahman chu ke a kalin chipchiar takin an fang chhuak vek a ni. Airport Authority  of India atang hian Managing Director pakhat leh Dy. General Manager pahnih an lokal a, hei bakah hian Lengpui Airport atangin Civil Aviation  lam Engineer a lo tel bawk a ni.

Airport Authority of India hotute lokal chuan, Kawmzawl chu Thlawhna te chi (9 Seater) tumna atan chuan siam tlak leh hmun tha tak a ni thu  sawi nghalin, helai hmun siamna tur atana Mizoram sawrkarin Finance Commission a sum a dil pawh pekchhuah nghal thuai nise, hna hi tan thuai  an duh thu an sawi a. Sorkar in helai hmun siamna tur atana ruahmanna a neih te leh hman-hmawh taka siam a ngaih dan te Lunglei lam MLA pahnih Pu S.Lal-dingliana leh Pu Joseph. Lalhimpuia te bakah Lunglei D.C  te chuan, Airport Authority of India hotute hi hrilhfiah in, helai hmun hrang hrang te chu ke a kal kual puiin chipchiar takin an fan pui nghal bawk a ni.

Pu Joseph Lalhimpuia HPC Vice Chairman in kan palai a hrilh danin, Kawmzawl Airport siam nan hian Mizoram sawrkar chuan kumin February thla khan Finance Commission ah cheng Vaibelchhe 9.8 a dil tawh a, Finance Commission chuan helai hmun hi Airport lam thuneitute'n  Airport atana siam tlak an tih chuan sum hi pek mai min tiam a ni a ti a. Hetianga a hmun ngeia min rawn enpuitu Airport Authority of India hotute'n siam tlak a nih zia leh min phurpui thu an sawi hian min ti lawm hle a ni a ti.

Kum 10 kalta atanga kan sawi thin chu , Pu Lal Thanhawla kaihhruai  sawrkar kumkhat pawh la tlinglo chuan, tihhlawhtlin thuai tumin hma  ala nghal a, tunah hian DPR pawh siam vek tawh niin, sawrkar chuan helai hmuna Service tur Thlawhna chungchang ah Comparative Statement a la mek bawk a. Kan Chief Minsiter in chhimlam min duhsakna hi lawmawm kan ti hle a ni a ti bawk.  Kawmzawl Airport tur hi Thlawhna te chi mi pakua chuan theihna, tum theihna tura buatsaih tum niin, a dung lam Metre 750, avang Metre 150 a siam tum a ni a, a siam nan hian cheng vaibelchhe 9.8 mamawh tura ngaih niin, a siam hna hi Airport  Authority of India chuan an thawk dawn a ni.

Helai hmunah hian mimal ram nei tlem a zawng an awm avangin Compensation erawh pek a ngai dawn niin alang. Kawmzawl Airport  tur hmunhma an en hnu hian Saitluk ram chu Hrangchalkawn piah atangin  Airport lam thuneitute hi enpui leh an ni a, amaherawh chu an en hun lai hian chhum a nasat deuh avangin an duh angin an en thei  lova, chiang zawka enthat leh an tum thu an sawi a ni. Tukin a Airport hmun tur Airport lam thuneitute leh  MLA pahnih ten an enna ah hian Lunglei D.C bakah Officer pawimawh tak tak leh Media thenkhat ten an tawiawm a ni.