Judge Rebecca Saimawi’n dik lo awm lo a ti
Intihsiakna a sang tawh a, boruak fawn vel pawhin eng eng emaw a keng tel ta. Chanchinbu thenkhatah Top 8-a Baby Malsawmtluangi, Dawrpui Vengthar tlin chungchanga Judge Makuri tihtlin nia lang thei tura sawina hial a chhuak a, hla thu theihnghilh leh vawi 2 lai sa sual chunga a tlin chungchangah zawhna thahnem tak an dawn thute, thlirtu mipui lamin an hriatthiam loh thu thlengin tarlan a ni. Tin, Judge Rebecca Saimawii leh Baby Malsawmtluangi Fanai te inchhungkhat hnai nia sawi awm chungchang te, 'An chhungte Judge-a an awm chhung chu a tla thei lovang' tih thawm a rin hle thute thlengin a ri chhuak ta. Hemi chungchanga amah Pi Rebecca Saimawii biakpawh an tum pawh an hlawhchham thu thlengin tarlan a ni a, hei hian mipui beng a verh hle a ni.

Thalaite Aw leh Makuri
Hetiang thu a irhchhuah takah chuan |halaite Aw chuan Judge Rebecca Saimawii a be vat a, chanchinbu pakhata hetiang thu tarlan a ni ta chu mak a tih thu leh pawi a tih thute, thu dik an hriat loh vang a nih thu a sawi. |halaite Aw zawhna chhangin Makuri chuan, " Hetianga inbeihna ang hial a lo richhuakta hi pawi ka ti a, a mak pawh ka ti. Thu dik chu laihlan a la ni dawn tho a, dik tak leh fair taka thutlukna siam a nih dan chu ka mark pek danah emaw, hriat theihna tur thil dang pawh a awm a nih chuan finfiah vek ka ngam a ni" a ti.

Sawi belhin, " Baby-i hi kan chhungte a nih awm reng reng ka hre ngai lova, kan lo inchhung reng a nih chuan ka hre lo a ni ang. Ka be ngai lova, contestant te hi green room-ah emaw, hmun dangah emaw ka be ngai lo bawk. Dik tak leh fair taka thutlukna siam mai hi ka duh dan a ni a. Chhungte nih vang emaw, an retheih vang emawin ngaihhnathiam leh induhsakna ka la lantir ngai lo. Retheih vang nise tihtlin tur an tam lutuk. Baby-i a tlin chungchanga mipuite hriat tura ka duh ber chu a thiam vangin a tling a ni mai. Zan hnih intihsiak a ni a., zan hmasaah tha takin a zai a, a zan hnihnaah a thu a theihnghilh a nih pawhin zan hmasa nena mark hmuh belhkhawm a nih miau avangin belhkhawmah a tla 3 ai khan a hmu sang tihna a ni mai. Intihsiakna zan hmasaah khan Baby-i hi a zai tha takzet a, Pu Rammawia phei chuan, " Hetiang mi top-10 a han tih tlinte chu... tia min deu tute chu an zak veng veng hial ta ve ang... " ti hialin a zai chungchangah khan comment a pe a ni. Zan hnihnaah a zai tha lo deuh a, mark a hmu chhe hret a nih pawhin mark belhkhawm a nih miau avangin zan hmasa zar a zo tihna a ni mai" a ti.

He thil hian Idol neih chhoh zel turah amahah nghawng a nei thei ang em? tih zawhna chu, " Judge ka ni a, eng eng emaw harsatna hi chu hmachhawn turah ka inngai. Mahse chhungte tih vanga duhsak ang zawnga insawi hi chu ka duh lo takzet a ni. Hetiang a nih takah chuan Baby-i a tlin chhung chuan " Rebecca-i a awm tlat a lawm... " min ti thei dawn a, eng ang pawhin zaitha mahse a zaithat vanga tling a nih lam aiin ka hming a ri ring zui zawk thei a ni. Hetiang thu irhchhuak hrim hrim hi pawi ka ti a, keinin dik leh fel ber, tha bera thutlukna siam kan tum laiin Idol boruak a tichhe vek thei tlat a ni"a ti bawk.

Pu Rammawia'n engtin nge a ngaih?
Hemi chungchangah hian Idol chief judge Rammawi chuan, " Thu dik hre chiang hmasa lova thu chhuah ngawt emaw sawi ngawt emaw te hi ka duh loh a ni. Baby-i hi Makuri chhungte a lo nih chuan engmah ka sawi thei lova, a mark peksak dan lam ka hriatpui lo. An chhungte niin ka hre lo bawk a, ni pawh nise hetiang rilru pu tura judge a tang a ni lo bawk. Zawhna ka peklet ve thung erawh hetianga sawitute hi judge-ah tang ve se, an chhungte an duhsak dawn em ni? ' tih a ni. Mipuite leh judge te zai ngaihthlak dan leh zai sual leh sual lo kan tih hi a in ang lo em ni ka ti. Zai lai, Off tune-a zaite hi an zai rei poh leh a thluk pawna an zai tlat vangin an zai sual hnem a, a thu theihnghilh zeuh emaw, zai sual zeuh emaw te aiin an zai sual nasa zawk tih hi kan hriat a tha" a ti.

Pu Rinliana ve thung chuan.....!
Style dangdai leh tumlum hmel tak anga lang, contestant-te pawhin an hlauh ruk deuh nia sawi Judge Rinliana chuan "Mark pek chungchangah tute mah inzawmna kan nei lo. Ka tih chu ka tih a ni a, Makuri pawhin a tih ang angin a ti mai, kan inhriatpui lo. Baby Malsawmtluangi nen an inchhun vanga tihtlin anga thuthang a awm a nih chuan thu dik lo hul hual a ni. Hetiang thil hian min tibuai lo se ka ti a, kei pawh ka chhungte (thisen zawmpui) ngei ngei tel an awm a, an tla daih tawh.Hetiang induhsakna hleihluak hi a awm ngai lova, a awm kan phal lo bawk. Baby-i hi a tling lo a nih chuan a tling lo a ni mai." a ti hmiah.

Tarlan tawh angin Mizo Idol top 10 intihsiak result chu tunkar thawhleh zan khan puan fel a ni a, Catherine Vanlalchhanhimi, Dawrpui Vengthar, Emily Lalrampari, Mission Vengthlang leh Lalruatfela, Zemabawk te an tla.

An pathum hian hla hit nei hman der tawh an ni hlawm a, a bikin Ruatfela phei chu guiter nen chauh pawha Mualzavata hla hot taka thlawh thei leh mipui hmelhriat theih tura mawi taka sa thei a ni. Emily pawh Albatros hla " Tawn leh ni her se kan tawnah, thinlai zochhum ang a kiang...." tih thlawh thartu a ni a, chutiang bawkin Catherine pawh " Thinlaiah a cham reng e.. mahse auh din zawh rual a ni si lo.." tia aw dangdai leh nalh zeta thlawh thei a ni a, he hla rau rauah phei chuan amah Makuri ngeiin, " I sa thiam ber" a tih hial kha a ni a. Talent nei tha, music man bawk si a tih Emily a tla bawk a, Aw hnih nei an tih mai Ruatfela te ho nen pawnthuah telin Idol an mangtha vek a ni. Nimin khan Idol top 10 te chu Sihhmuia Coconut Grove-ah hahchawlhna hun hmangin an intihlim niin |halaite Aw chuan thu a dawng. Top 8 intihsiak hi karleh thawhleh zan tanga neih tan leh tur a ni. (Source: Mizo Aw - Nitin Chhuak Chanchinbu)