Africa khawmualpuia awm ram hrang hrangte zinga football khel thiam ber zawn nana Angola rama neih 'Africa Cup of Nations 2010' chu nizan khan zawh-fel a ni ta a.   Hetah hian champion dinglai Egypt bawk an champion nawn leh ta.
    Nizan khan Ghana leh Egypt te hian 'Africa Cup of Nations 2010' Final an khel a.  He Final inkhel hmuhnawm tak maiah hian min.63-naa substitute anga khelmual chhunga rawn lut Mohamed 'Gedo' Nagy-a’n hun tawp nan mins.5 vel chauh a awm tawh tiha goal a thun hmangin Egypt hi 1–0 a chakin an champion leh ta a ni.
    2006 leh 2008 te pawha lo champion tawh Egypt tan tun tum hi a záwna vawi 3 an champion-na niin; vawi 3 champion záwn thei hmasa-ber record thar an siam a.  Chubakah, tun tum hi a pumpui an champion vawi 7-na zet ni tawhin;  'African Cup of Nations'-ah matches 19 zet chakloh (loss) nei lovin an awm mek bawk.
***    'African Cup of Nations'-ah hian Nigeria chu 3-na an ni a.  3rd /4th Place Playoff match-ah Nigeria hian an khingpui Algeria chu 1-0 in an hneh a ni.
***    Togo chu tun tum 'African Cup of Nations 2010'-a tel tura an kalna lama misual thenkhatin an chuanna bus an bei (attack) vanga an inhnuhdawh daih avang khan CAF (Confederation of African Football) chuan 'African Cup of Nations' neih leh hmasak tur 2– 2012 leh 2014-ah te tel ve theilo tura hrem an ni a.  Hei bakah hian Togolese national football association chu CAF hian US Dollar 50000 chawi turin a ti bawk.

'English Premier League'–ah...
    Nizan leh nizanhmasa te khan 'English Premier League' (2009–10)-ah inkhelh runpui a awm leh a, mit a tlai leh ngiang mai!
    Scoreslines kimchang chu hetiangin :    Table thar        P    GD    Pts
    Burnley    1–2    Chelsea                1.    Chelsea        23    38    54
    Arsenal    1–3    Man Utd               2.    Man Utd       24    36    53
    Birmingham    1–1    Tottenham     3.    Arsenal         24    32    49
    Liverpool    2–0    Bolton               4.    Tottenham    24    20    42
    Man City    2–0    Portsmouth        5.    Liverpool       24    16    41
    Fulham    0–2    Aston Villa            6.    Man City        22    14    41
    Wigan    0–1    Everton                7.    Aston Villa      23    13    40
    West Ham    0–0    Blackburn        8.    Birmingham    23    -1    34
    Hull    2–2    Wolverhampton         9.    Everton         23    -1    32

***    Zanin (Feb.1 Thawhtan) hian Sunderland leh Stoke City te an inkhel ve leh dawn a.  Hei hi ESPN channel chuan zanlai dar 1:30 atangin an rawn LIVE dawn tih an tarlang e.
Football khawvelah tun 2009-10 season atana 'Mid-Season Transfer Window' chu Vawiin (Feb.1) hian a tawp dawn ta a.  Hemi chungchangah hian ESPN channel chuan zan dar 10:00 – 11:00 inkarah special live programme a buatsaih dawn e.

Federer leh S.Williams te champ'
    Tennis khawvela Kumin 2010 Season-a Grand Slam event neih hmasak-ber tur 'Australian Open 2010' chu nimintlai khan zawh-fel a ni ta a.  Hetah hian; Mipa Singles-ah Roger Federer (SUI) leh, Hmeichhe Singles-ah Serena Williams (USA) te an champion.
    Nimintlaia Mipa Singles Final khelhah Seeded No.1 leh tuna World No.1 ni mek bawk Federer hian Seeded No.5 Andy Murray (GBR) a hmachhawn a.  'US Open 2008' Final-a lo intum tawh-te intum nawn lehna-ah hian khami tuma chak Federer bawk hi 6-3 6-4 7-6 a chak lehin champion zawkah a tang leh ta a ni.  Kum 28-mi Federer tan tun tum hi 'Australian Open' Mipa Singles title 4 zet a lakna niin;  Grand Slam Mipa Singles title la tam-ber record a chelh mek chu midangte tana umphak harsa deuh deuh turin 16-ah a tipung-chho leh ta bawk.
    Hmeichhe Singles Final-ah chuan champion dinglai Serena Williams hian champion hlui Justine Henin (BEL) a bitum thung a.  Hetah hian; World No.1 ni mek Serena Williams hian World No.1 hlui Henin hi 6-4 3-6 6-2 a hnehin a champion nawn leh a ni.  Kum 28-mi Serena Williams tan tun tum hi 'Australian Open' Hmeichhe Singles title 5 zet a lakna niin;  Grand Slam Hmeichhe Singles title lak tam lamah Billie-Jean King tlukin, 12 a la tling ta bawk.
***    Tun tum 'Australian Open'-ah hian Mixed Doubles Final-ah Seeded No.1 Leander Paes (IND) leh Cara Black (ZIM) te tangdun an champion a.  Kum 36 lai tling ve tawh Paes tan tun tum hi Grand Slam title 11 zet a lakna ni tawhin;  Mipa Doubles lama a partner hlui Mahesh Bhupati-a’n hetiang zat tho laa Indian mite zinga Grand Slam title la tam-ber record a chelh reng thin chu a tluk ta.