Chelsea FC chu transfer chungchanga FIFA-in an hrekna lakah an him ta.

 Kan hnung deuha rawn tarlan tawh ang khan; Chelsea hi Lens (FRA) atanga rawlthar player Gael Kakuta an lak danah Dan an bawhchhia tiin FIFA-in Jan 2011 hma chu player lak-belh theilo turin a hrem a.  Mahse, hei hi The Blues-ho hian infiamna khawvela rorelna sáng-ber CAS (Court of Arbitration for Sport) hnehah appeal-in; nimintlai khan CAS hian The Blues-ho hi thiam an chantir a ni.
 Hemi chungchangah hian Chelsea mi-leh-sa te chu an lawm hle mai a.  An chairman Bruce Buck pawhin “CAS-ina a nemngheh thlap leh FIFA pawmpui thlapa inremna tha tak a awm thei ta hi kan lawm em em a ni” a ti hial mai.

Terry chungchang – Vawiintlai-ah
 Chelsea star-defender leh an captain ni nghal bawk John Terry chu vawiintlai hian England National Team captain a nihna ngaihtuah that a ni dawn.
 Kum 29-mi Terry hi nupui pawmlai a nei reng chungin tunhnai khan a teammate hlui Wayne Bridge-a kawppui hlui model Vanessa Perroncel a khuaikhem tih British chanchinbu lian thenkhatin an tarlang a.  Hei vang hian Terry hian sawiselna nasa tak tawh phahin;  England National Team captain a la ni zui zel dawn em tih pawh an coach Fabio chuan vawiintlai hian thutlukna a siam rup dawn a ni.

Arsenal tan chance a la awm  – Anelka
 Chelsea striker Nicolas Anelka chuan, a club hlui Arsenal tan tun season 'English Premier League'-ah champion theihna chance a la awma a hriat thu a sawi.
 Tun season 'English Premier League'-a matches 14 ve ve khelh tur an la neihah Chelsea hi points 55 hmua 1-na ni mekin; Arsenal hi anni aia points 6-a hniamin 3-na an ni mek a.  Chawlhni zan khian Chelsea khelmual 'Stamford Bridge'-a an inkhel dawn tih ngaihtuah phei chuan Arsenal hi an dinhmun tha vak tawhlo angin lang mahse Anelka chuan “Football-ah chuan hun rei vaklo chhung pawhin nasa takin thil a danglam zung zung thei” a ti tlat mai.

May thla-ah Mayweather vs Mosley
 Boxing khawvela hnehloh la neilo Floyd Mayweather Jr. leh WBA Welterweight Champion ni mek Shane Mosley te chu May 1 khian dawn tih tihchian a ni ta a.  Las Vegas khawpuiah Mosley-a kawl mek WBA Welterweight title hi an inchuh ang.
 An inhnek tur chungchangah hian kum 32-mi Mayweather Jr. chuan “Hei hi ka fan-te pual liau liau tur a ni” a ti tawl mai a.  “Mosley hi boxer tha-ber te zinga ami a ni a; mahse, min hneh tur khawpa tha erawh a ni lo” a ti zui bawk.
 Weight division hrang hrang 5 zeta World Champion lo ni tawh Mayweather Jr. hi 2007-a British boxer lar Ricky Hatton a hneh hnuin a chawl (retire) a.  Mahse, Nikum 2009 khan boxing khawvelah rawn kirlehin, September thlaa a inhnekpui Juan Manuel Marquez chu a rawn hneh leh nghal anih kha.

Valencia-a F1 Pre-Season Test zo ta
 Formula One (F1)-a Mercedes team principal Ross Brawn chuan, F1-a Points System siam thar chuan F1-a intlansiakna hmuhnawm zawk a hrinchhuah a beisei thu a sawi.  Tarlan tawh angin; Kumin 2010 Season atang chuan F1 intlansiaknaa points hmuh dan-phung chu '10–8–6–5–4–3–2–1 sequence' atangin '25–18–15–12–10–8–6–4–2–1 sequence'-a thlak a ni tawh dawn anih kha.
 Hemi chungchangah hian British automobile engineer ropui Brawn chuan "Tunah chuan 1-na leh 2-na inthlauhna hi points 7 zet a nih tawh dawn avangin intlansiak laia 2-na ni mek tan 1-na nih tuma theihtawp chhuah a phurawm tawh viau ang" a ti hmiah mai a.  A sawi zelna-ah tunhmaa Benetton, Ferrari leh BrawnGP teams te hlawhtling taka lo enkawl tawhtu Brawn chuan "A hma kha chuan 1-na leh 2-na te inthlauhna kha points 2 chauh a nih avangin intlansiak laia 2-na ni mek tan 1-na nih tuma han beih vak kha a phurawm em em lemlo a ni" a ti zui bawk.

Comments (0)

Subscribe to this comment's feed