22 Feb: Mizoram-in ni 20-23 March, 2012 chhunga North East Games vawi 26-na a thlen tur buaipuitu Organising Committee chu Working Chairman Minister Pu Zodintluanga hovin ama Office Chamber ah vawiin chawhma dar 11 khan an thukhawm a, hlawhtling taka hmarchhak states huap infiamna runpui thlen nana mawhphurtu hrang hrang Sub Committee te hmalak dante an thlirho.

Infiammi te thlenna tura ruahman Falkawn Referral Hospital leh Ramhlun Sports Complex buatsaih mek a nih dan te, an vah velna tur transport leh motor tlan dan tur traffic ruahmanna chungchangte, reception, medical, security leh publicity chungchangte leh infiamna hmunhma buatsaih mek dan te an sawiho a, siamrem ngai te an rel ho bawk. North East Games neih tur chungchang hi website siam fel a ni tawh a, a duh apiang tan www.northeastgames2012.com ah thlir theih a ni. Infiamna chi hrang hrang (discipline) 11 te hi hmun hrang hrang - Rajiv Gandhi Stadium, A.R.Ground, Ramhlun Sports Complex, Pitarte Tlang Indoor Stadium, Republic Playground, Govt. High School Indoor Stadium, Kulikawn Indoor Stadium, Electric Veng Indoor Stadium, 3rd Bn. MAP Playground, Mualpui leh Zarkawt Recreation Centre ah te neih tum a ni a, Games hawnna hi ni 20 Feb. 2012 ah Rajiv Gandhi Stadium ah neih tura rel a ni. North East Games vawi 26-na hmang tur hian hmarchhak states hrang hrang atangin infiammi 1,200 vel tel tura beisei an ni.

Aizawl, 22 Feb’12: Mizoram chhung District 6-a VC 509 leh Aizawl Municipal Council area-a Local Council 82-a inthlanna neih tur atan campaign hun chu tukin dar 7 khan a tawp ta.
 VC leh Local Council inthlanna hi naktuk zing dar 7 atanga tlai lam dar 4 inkarah neih a ni ang a, naktuk khian vote thlak zawh fel vek hman tum a ni a, vote thlak zawh hman loh chhunzawm emaw inthlan that ngai emaw a awm chuan a tuk naktipah vote thlak chhun zawm a ni ang.
 Inthlanna-a vote tla te hi inthlan zawh veleh tih fel tur ngai awm ang ang tih chinfel hnu-ah chhiar zuia result hriat theih nghal a ni dawn a, heng inthlanna-a vote tla te hi inthlanna hmunah Returning Officer hovin chhiar nghal an ni dawn a ni.
 Dist 6 huam chhunga Village Council 509 ah hian voter nuai 4 sang 6 leh 63 an awm a,nuai 2 sang 3 leh 786 te chu hmeichhia an ni a, nuai 2 sang 2 leh 227 te chu mipa an ni. Aizawl Municipal huamchhunga Local Council 82 ah chuan voter nuai 1 sing 7 sang 4 leh 868 an awm a, hmeichhia sing 9 sang 2 leh 788 awmin mipa sing 8 sang 3 leh 80 an awm a ni.
 Inthlanna felfai taka kalpui anih theih nan venhimna lam pawh uluk taka ruahhman ani a,Poling Station engemawzat a bikin hmarchhak lam bial amite chu venhim ngai zual bikah ngaiin heng Poling Station ah hian a bika venghimna ruahhman a ni.
 State Election Comission chuan Local Council leh Village Council inthlanna lo awm tura vote nei zawng zawngte chu an duhthlan theihna chanvo hmang ngei turin a ngen a. Vote thlak tur ten an mahni thlalak chuanna Voter ID ken vek tur anih thu sawiin hetiang nei remchang lo te chu an mahni nihna ti lang chiang thei document hrang Pasport, Driving Licence, sorkar hnathawhna-a ID leh document pawm theih chin chi hrang hrang 14 a tarchhuahte nena an nihna ti chianga vote thlak phal sak an nih thu a tarlang bawk.
 

PYD District Conference tan dawn
 UPC Lunglei District chuan 23-26 Feb. 2012 chhung hian Hqrs. Local Biakin, Chanmari III-ah District Conference Vawi-47-na an hmang dawn.
 He hunah hian “Puitlin Lam Pan Ang U”, (Heb. 6:1) tih thupui hmangin inkhawmpui neih a ni dawn a, Rev Lalmalsawma Sailo, Gen. Treasurer leh Rev. C Lalmuanpuia, District Supdt. North Mizoram te chu  General Guest in an awm ang.
 Naktuk dar 10:00 ah hun hi tan a ni ang a, chawhnu leh zan ah pawh chhunzawmin, zan inkhawm hi  Evan. C Lalremchhunga, Dist. PYD President-in a kaihruai ang a, Dist. Supt.-in Conference hawnna hun a hmang dawn a ni. Sermon sawiin, Rev Lalmalsawma Sailo chuan thupui atan “Thianghlimna-ah” tih hmangin hun a hmang ang a, Headquarter Sect. PYD Zaipawl te’n hla an reng dawn bawk a, a duh apiang tel turin an sawm a ni.

GAD Secretary, Lungleiah lo kal
 Vawiin dar 1:00 vel khan General Adminis-tration Department Secretary, Pu Renu Sharma chuan Lunglei a rawn tlawh a, Lunglei DC Office endikin, a fang kual a, Officer-te nen inkawmn an nei bawk. Tun tuma GAD Secretary rawn zin hi Mizoram a awm hnua a rawn zin vawikhatna a ni a, kan DC, Pu V Sapchhunga nen hian Aizawl lamah an lo thawkho tawh a, tunah hian amah rawn tlawh ni pahfawmin, DC Office hi a rawn tlawh a ni.
 Zanin hian Circuit House-ah a riak ang a, naktukah Lawngtlai lam pan lehin, DC Office a tlawh leh ang a, Bungtlang South ah a riaklut lehnghal ang. Hemi hnu hian Tuithumhnar tlawh lehin, Zorinpui-a LCS ruahmanna siam 
chu an indik leh ang a, Lawngtlai ah let lehin, 25 Feb. 2012 hian Aizawl lamah a kir leh nghal dawn a ni.

Diesel an unload  tir
 Tunhnaia Legal Metrology Deptt te’n diesel tha lo an man chu Ramnagar, Silchar-ah a density an lo ziah sual avanga tidik lo an nih thu sawiin, phai lam nena an indawr chian hnu ah nimin khan unload tir leh an ni ta. Diesel that dan hi ziakin, challan-ah chiang taka ziaklan a ni thin a, hei hi Lunglei lama inspector-te’n lo endikin, a inmil lo leh pawm tlak anih loh chuan a semchhuahnaah hian dah luh an phal ta lo thin a, hetiang veng hian ngawrh takin Legal Metrology Deptt. te hian an vil reng thin a ni.

SBI-in tanpuina an pe
 State Bank of India (SBI) chuan mipui vantlang tana thil tha an tihsak thin angin, hma an la chhunzawm zel a, vawiin dar 11:00 khan Chawngfianga Memorial School, Zohnuai-ah naupang zirlaite leh boarding-a awm te hman tur, tui thlitfimna (water filter) 5 an hlan.
 An hnathawh hi Community Service Banking Direct Activity Scheme hnuaiah neih thin a ni a, tukin hian an Manager, BK Debnath chuan hlanin, hetiang hian ONYX te pawh an la tanpui tawh bawk a ni.

Lunglei Dist. Level Handloom Expo
 Lunglei District pualin March ni 6-9, 2012 chhungin Lunglei Saikuti Hall-ah ‘Handloom Expo’ neih a ni dawn a. He Handloom Expo hi Mizoram Apex Handloom & Handicraft Co-operatice Society Ltd. (MAHCO) buatsaih niin Aizawl leh hmun dang atangin puan tahtu leh handicraft lama eizawng engemawzat ten an thil deh chhuah chi hrang hrang man tlawm zawka hralh turin an pho chhuak dawn a ni.
 He District Level Handloom Expo hi March ni 6 chawhma dar 11:00-ah Lunglei DC Pu V.Sapchhunga’n a hawng dawn a ni.

Zanin leh naktukzan te hian 'UEFA Champions League' lamah Pre.Q/F [Round of 16] 1st Leg match 2 ve ve a awm leh dawn a.  Fixtures kimchang chu hetiang hi a ni e :
 
Zanin  (Feb 21, Thawhleh)  zanlai  –
 CSKA Moscow (RUS) vs Real Madrid (ESP) [10:30, TEN-Action]
 Napoli (ITA) vs Chelsea (ENG)  [1:15, TEN-Action]
 
Naktuk  (Feb 22, Nilai)  zanlai  –
 Olympique Marseille (FRA) vs Inter Milan (ITA)  [1:15, TEN-Action]
 FC Basel (SUI) vs Bayern Munich (GER)  [1:15, TEN-Action]

**  'UEFA Europa League'  Round of 32  Return Leg :
 Naktuk  (Feb 22, Nilai)  zan  –
 Manchester City (ENG) [2]vs[1] FC Porto (POR) [10:30, TEN-Action]

Curbishley-a’n Wolves enkawl lovang
 Tunhmaa 'English Premier League'-a Charlton Athletic leh West Ham United te lo enkawl tawh \hintu Alan Curbishley chuan Wolverhampton Wanderers a enkawl dawnlo tih a sawi-chiang.
 Hmanni deuha an manager Mick McCarthy bàntu Wolves-ho hian tunhnai khan Curbishley bakah Queens Park Rangers manager hlui Neil Warnock leh Sunderland manager hlui Steve Bruce te chu interview an neihpui hlawm a.  Mahse, kum 54-mi Curbishley hi Wolves-ho chairman Steve Morgan nen an hmathlir a inang-loh avangin a tan Wolves-ho manager nih chu tih tihchi-ah a ngailo a ni.
 Hetianga Curbishley-a’n a tum lohva, Warnock lahin Leeds United a zawm tawh bawk avangin 'English Premier League'-a kum 10 zet manager hna lo thawk tawh Bruce chu Wolves-ho manager thar a nih hmel ta hle.

AFC-te'n Final Round lut
 Kan India rama football league sáng ber 'I-League'–a 2012 Season thar lo awm tura tel thar tur zawnna neih mekah Aizawl Football Club (Mizoram) chuan Final Round an lut ta.
 Group-1 ami ten nimintlaia 'I-League' 2nd Division-a an match hnuhnung-ber tur an khelhah AFC hian an khingpui United Sikkim chu 3–0 laiin an hneh a.  Tihian, AFC hi group winner anga Final Round lutin;  India National Team captain hlui Baichung Bhutia club United Sikkim pawh hi runners-up angin Final Round hi an lut bawk a ni.
 Final Round-ah hian team 7 an awm dawn a.  An inkhelh-kual vek hnua a ti \ha \ha 2 te chu 2012 Season 'I-League'–ah an tel ang.

Mizoram Presbyterian Koh-hran hnuaia Kristian Thalai Pawl (KTP) hian naktuk February ni 22, 2012 (Nilaini) hian kum 58 a tling dawn a. KTP Day pual hian kawng hrang hrangin rawng-bawlna hun hman a ni a. Branch leh Bial KTP-te’n hnatlang, thisen pek, mi harsate tanpui leh hemi puala programme te siamin Mizoram chhung leh pawn hmun hrang hrangah hun hmang tawhin hman mek zel a ni.
    Central KTP pawhin Synod Hospital-a HOSPICE-RCCC (Grace Home) tanpui nan Bial leh Branch hrang hrangin an thawhlawm tling khawm Rs. 2,26,499 /- chu February ni 22 chhun dar 1 hian a hmunah hruaitute kalin an hlan dawn a ni.
    Central KTP hnuaiah hian kum 2012-ah bial 169 leh Branch 782 awmin member mipa 80800 leh hmeichhia 47467, an vaiin 1,28, 267 an awm mek a, Bial leh Brach te missionary chawm zat belh-khawm 1321 a ni a, missionary pakhat chawmna Rs. 1000/- a ni.