Zenghri danna pek runpui nei
 Vawiin [21 Feb] khan Lunglei District hmun hrang hrangah Zenghri danna (Polio) pek runpui tan chhoh a ni a, hei hi kum 5 chin hnuailam tan niin, Lunglei Civil Hospital chuan an hnathawktute tirchhuakin, Thingtlang khua thlengin an pe.
 Tun tuma Zenghri danna pek runpui neih mek hian ni 3 chhung vel awh tur a ni a, Main Centre (PHC, etc.) 14 hnuai ah, Sub Centre -ah leh Clinic siamin base 81 hrang hrangah pek a ni a, hengah hian booth 4/5 siam zelin booth pan thei lo tan naktuk atang hian an In ah panchilhin pek chhunzawm tum a ni.
 He programme hnuaiah hian mi 17,473 vel tuamchhuah tum a ni a, an target hi hrutchhuah hrim hrim tumin hmalak mek zel a ni. He hmalakna hnuai ah hian an target hi an khum deuh ziah niin, Dr. F Lianhlira, CMO, Lunglei District chuan a sawi a, mahse an target hi mikhual leh zin veivak bakah zirlaite insawn kual reng avanga tihdik har tak a nih thu a sawi bawk.
 Tunah hian Booth 219 siamin hmalak mek a ni a, hmun hrang hrangah doctor indaih lohna a awm nual avanga an harsatna awm pawh ziaawm tura ngaih a ni a, hnathawktute harsatna awmna hmunah chuan ASHA, Angawadi Worker leh Malaria thisen la thinte pawh an chhawr belh mai thin niin, CMO hian a sawi bawk a ni.
 Tun tum hian ni 3 chhung neih a ni ang a, 3 April hian neih leh tumin ni 4/5 vel chhung chu kutthlak leh tura ruahmanna siam a ni a, vawiin tlai dar 3:00 hian an hmalak dan report pein Aizawl lama thuneitute hnenah an report leh nghal dawn a ni.

Inthlan chhungin silai khap
 Lunglei DC, Pu V Sapchhunga chuan thuchhuah siamin, 23 Feb.-a VC inthlan lo awm tura inthlanna muanawm leh fel zawk a awm theih dan tur ngaihtuahin, Lunglei District chhungah inthlan chhung hian District Magistrate (DC) phalna la hmasa lo chuan tumahin, silai leh puakthei thil reng reng ken leh hman phal a nih loh thu a sawi. Hei hian Sipai leh Police bakah BRTF leh Magistrate phalna lehkha keng te chu a huam lova, hei hi tun atanga hman nghal tur niin, inthlan a zawh hma chu he thupek hi kenkawh a ni ang.

VC inthlan AIR, Lunglei-in LIVE dawn
 Tun tum Village Council (VC) inthlan turah veng hrang hrang ah political party bakah mimal-a ding tur te’n campaign an nei chho mek zel a, thuneitute thuchhuah danin vawiin hi campaign hun tawp a ni a, hemi hnua campaign te chu Dan anga hrem theih an ni.
 All India Radio, Lunglei chuan VC inthlan chungchang leh inthlan result puanchhuah thlengin, LIVE-in pekchhuah an tum thu an sawi a, inthlanni 23 February, 2012; chhun dar 12:00 atangin inthlan chungchang report bakah result kimchang hi an tichhuak reng dawn a ni.

Lunglei Bawrhsap lalut
 Pu V.Sapchhunga IAS, Lunglei Dist Bawrhsap chu vawiin khan Lunglei Dist. Bharat Scouts & Guides chuan an Patron atana lakluhna an nei. Tun hmain DC apiangte hi Patron-ah an lo dah tawh thin a, Pu V.Sapchhunga hi BS&GA member a la nih loh avangin member atan lakluhna an nei hmasa a ni. He lakluhna inkhawm hun tawite Bawrhsap Pisa-a neihah hian  an pawl President Rev Dr.CL Hminga chuan Pu V.Sapchhunga hi BS&G thu a tiam tir hnuah scout lukhum khumtirin scarf a awrh tir nghal a ni. BS&G hi kum 1932 June 6 khan Serkawn hmunah English Missionary, FJ Raper ( Pu Reia ) chuan a lo dinpui a, chuta tang chuan Mizoram hmun hrang hrangah Scout movement hi a lo kal chho ta zel a ni.

Rs Nuai 350 hman dan tur
 Vawiin khan Special Project Developmnent for Western belt tih hmanga Lunglei Dist-a sum Rs Nuai 350 lo kal hman dan tur leh hmalak dan tur ngaihtuahin Pu Joseph Lalramenga Addl DC hovin a pisa-ah an thukhawm a. Heng sum lo kal te hi hmandaihzai a ngaih avangin mamawh zual hmasa te  PWD, PHE, P&E-te’n DPR te siam sela chumi hnuah rawn theh lut sela, chumi hnua hma lak zui dan tur ngaihtuah ni se an ti. Heng ruahmanna te hi Bru raltlan lo kir leh te inbenbelna tur atan pawh a remchan anga hman theih a nih thu thu dawnna chuan a sawi bawk.

VC inthlan chungchang sawiho: Vawiin dar 11:00 khan Lunglei Town bial leh Village Council leh a chhehvel Village Council 33-a inthlanpui tu tur te chu DC’s Conference Hall ah VC inthlan chungchanga thil pawimawh sawiin, Observer leh Presideng Officers bakah TReturning Officer te Election Training neihpui an ni a, hetah hian Pu V Sapchhunga chu khuallian niin, he hun hi a hmanpui a ni.
 Pu Andrew Vanlaldika, Election Officer,  Lunglei pawhin training hi neihpuiin, tunhnai inthlan lo awm tura hriattur pawimawh zual leh inthlan thianghlim leh felfai tak a awm theih nan thil tul te inhrilhhriatna a nei a ni. Lunglei DC leh District Election Officer chuan Election Address neiin kalkhawm te chu fimkhur tak leh uluk taka an hna thawk tura a duh thu sawiin, fuihna thu a sawi bawk.

AMFU lungawi lo
 Vawiin khan AMFU District Hqrs., Lunglei chuan Pa-chi siamna leh hemro-na bakah distiller khawl an neih thar enchhina an nei a, mahse khawl hi an duh anga a that loh avangin, thawnlet leh an tum dawn niin an sawi a, thuthar lakkhawm lai hian Jorhat-a NEIST hotute nen inbiakna an nei mek a ni.
 He khawl thar hi an neih chuan hemi kawnga an hmalakna hi chak lehzual taka kalpui theih a ni dawn a, mahse ISI mark bakah Label pakhatmah a chuan loh avang leh a lehkha pawimawh chhawm tur a keng tel lo niin an sawi.

YMA Sub.Hqrs. Confe nghahna Buarpui-ah hruaitute an kal
 20 Feb: Vawiin ah YMA Sub.Hqrs. Conference vawi 34-na dawltu tur Buarpui inbuatsaihna  hmuhpui turin President Pu P.Lalhmangaihzuala, Pu TC Lalnghakliana SEC, leh Pu Valtea, SEC te an kal a. Xertlangpui a In kang tanpuina an hlan nghal bawk.
 Conference hi 20-22, March, 2012 hian neih a ni dawn a. 11Feb, '12 atang khan Pandal pawh sak tan a ni. Tun tum Conference -ah hian hruaitu thlanna neih a ni dawn a ni.

MJA-te’n an Adviser an râl
 Vawiin chhun dar 12:00 khan MJA, Dist. Hqrs., Lunglei chuan an Adviser Dr. Andrew H.Vanlaldika chu a pa Pu Renkunga’n a boral san tak avangin an chenna In, Circuit tlang-ah an râl a, member an kal tha hle.

Thisen pe:-   Vawiin chhun khan TKP Unit, Farmveng chuan an dinchampha vawi 30-na pualin Christian Hospital Serkawn-a dah turin Thisen an pe. Thisen petute hi Mipa 27 leh Hmeichhia 5, an vaiin mi 32 an ni.
 Adventist Youth Society (AYF)-te chuan kumtin a mamawhtute tan thisen pek thin nise an lo tih tawh angin, vawiin khan Civil Hospital-ah Mipa 17 leh Hmeichhia 6, an vaiin mi 23 te’n an pe bawk.

Buarpui-ah YMA Hruaitute kal dawn
 Kan hma lawkah YMA Sub. Hqrs. Conference Buarpuiah hman a ni dawn a, Buarpui Branch YMA inbuatsaihna a hm-una en turin karleh Thawhtanni hian YMA Sub.Hqrs.President P.Lalhma-ngaihzuala, Prog-ramme Comtt Chairman TC Lalnghakliana leh Secretary Pc.Biakthanmawia te chu Buarpuiah zankhat riakin an kal dawn.

Phone cable an ru
 Chanmari-a Telephone Cable chu misualin an ru nual a, Children Park-ah PR 100 leh 200 an ru a, Electric vengah G4 leh G5 a bo a, MAP Line Luangmualah engemaw zat a bo bawk a, Lunglawnah K4 leh K5 a bo a, Chanmari - II ah W2 leh W3 a bo. Telecom hnathawktute chu-an a bo thlakna tur an neih loh thu an sawi.
 Tunlai hian kawngpui sir leh chunga bale lian tak tak chu leihnuai ah phumin chak takin hma an la mek zel a, hetihlaia cable ru thin an lo awm chuan an hna a tikhaihlak hle a, harsatna thlen lo turin mipui an ngen.

Lawmthu an sawi
 Tunhnaia Valentine’s Day hmanna-a MJA leh Blood Bank tangkawp te’n thisen pek runpui an neihah thalai tam takin thisen an pe chu lawmawm an tih thu an sawi a, midang tana mi tangkai leh an hun hlu tak bakah thisen hlu tak petute hnenah MJA leh Blood Bank hotute chuan lawmthu an sawi.
 Thisen pek hunah khan vawi 40 thisen pe tawh an awm a, Bethsy-i pawhin vawi 6 a lo pe tawh.

Christian Hospital Serkawn-ah ICU neih tum
 Naktuk 19 Feb. hi Mizoram Baptist Kohhran Ni Pawimawh, Kristian Hospital Ni a ni a. Mizoram Baptist Kohhran te chuan Biak In tinah hmangin Zing inkhawm-ah hemi pual hian thuchah ngaihthlak a ni ang. Thupui atan  ‘Dam lo te tidam ula’ (Mtt.10:8)”  tih thu a ni ang a,  hemi puala thuchah buatsaih chu  Kohhran tinah chhiar chhuah a ni ang.
 Christian Hospital Serkawn hian Mizoram chhim lama la neih loh zunkawng lam enna khawl,  CYSTOSCOPE nei turin hma an la mek a, Rs. Nuai 15 vel senna tur a ni a, Vellore-ah an in train tawh nghe nghe. khawl kan chah mek a  reilo teah a lo thleng ang. Tun hnai-ah TKP diamond Jubilee lawm nan Pulseoximeter leh monitor  khawl tha tak an rawn donate a, ICU nei turin ruahmanna siam mek a ni bawk.

RMSA hnuaia thawk tur, Zitirtu lak a ni dawn a, Headmaster leh Zirtirtu hrang hrang lak tum mek niin, DEO Office atangin a dilna form hi lakchhuah theih a ni.
 Hetihlai hian tunhnaia advertisement lo tihchhuah tawhah Zirtirtu leh Headmaster post atan hian Graduate chin tan dil thei tura an tih laiin, 15 February khan Master degree nei emaw, Graduate leh B.Ed qualification nei kawp emaw te chauhin an dil theih tur thu an chhuah leh tawh a, last date 20 Feb. tih chu 24 Feb. thleng a nih zawk thu an chhuah bawk.
 Hetiang a nih avang hian a hma-a lo diltu mi 600 vel chuan form hi an leithlawn nasa hle a, form man hi cheng 10 niin, pakhatin 4/5 te an lei bawk a, thlalak 2 thil tel a ngaih avang leh mahni document thiltel ngai xerox man nen mi pakhat hian cheng 50 vel tal chu a insengral tura chhut a ni a, hei hian a diltute harsatna a siam ta niin thu kan dawng.
 Chuvangin, thuneitu-te lam hian ennawn se tih chu mi tam tak duh dan niin, a hma anga kaltlangpui nise an ti a,  Lunglei khawchhung mai pawh ni lo, thingtlang atana rawn dil an tam bawk avangin, a inseng thlawnlo zâwnga hmalak theih nise an ti bawk.
 Hetihlai hian RMSA Lunglei chuan Lunglei Government High School naupang 200 velte Excursion trip an neih pui a, Govt High School dangte pawh la neihpui zel an tum bawk.
 

DM Hr. Academy Digital Learning hmasa ber hawng:- Lunglei, 16, February, 2012: Vawiin khan DM Higher Academy, Ramthar veng ami chuan Digital Learning an neih thar chu, MJA President, Pu H Lalthansanga’n a hawng a, hei hi Lunglei ah chuan a hmasa ber a ni.
 Lunglei ah hian School 4 in hetianga zirna hi an nei dawn a, a hmasa ber atan DM ah hian bun niin, naupang te’n subject hrang hrang an zirna ah hlawkpui hle tura ngaih a ni a, Aizawl lamah School 16 velin an neih tawh rualin, Saiha leh Lawngtlai lamah pawh siam ve tum mek a nih thu an sawi.
 Digital Learning hmasa ber hawnna inkhawm hi, DM Higher Academy Principal, Pu Lalduhawma chuan kaihruaiin, MJA President, Pu Sangtea chuan thusawina hun a hmang a, Lunglei hi Competitive Exam ah kan tlakhniam thu leh kan hnufum tak thu sawiin, tunhma-a kan upa zawk te sulhnu kan tluk loh thu a sawi a, hetianga digital learning siam a lo ni ta chu lawmawm a tih thu sawiin, naupang te’n hmasawnna atana an hman ngei a duh thu sawiin, school dang pawhin an tih ve thuai a duh thu a sawi a, hmasawnna kawnga hmahruaitu, lungphum pawi-mawh tak a nih thu a sawi.
 Principal, Pu Duhawma chuan entir chhina neiin, subject hrang hranga naupang te tangkaipui theih dan a tarlang a, hei hi Hyderabad lam chhuah, Teach Next company te rawn dah niin, India ramah hian school 80,000 velah dah a nih tawh thu a sawi. Khawl ah hian Mizoram syllabus mila siam, software dah a ni a, syllabus pawh thlak nise, a siamtu mithiam 400 rual velin an vil reng ang a, chumi mil chuan her danglam zel tura ruahmanna siam a ni.
 Pu Duhawma chuan hemi hmanga zirna a hlawk bik dan sawiin, a lem hrang hrang, che thei nena zir a nih avangin hriatthiam a awl bik niin a sawi a, hetihlai hian naupang te te zir tur a awm laiin, thiam thei lo zual bik te tanpui tu tur a awm bawk a, hemi hmang hian zirtirtu te pawhin awlsam zawkin an hrilhfiah thei dawn niin a sawi.
 DM Higher Academy hian thlatin, Rs. 5,000 vel an chawi a tul dawn a, mahse hemi avang hian an school fee a tam belh chuang lova, Chhimtlang Academy, FLKM leh Zakhuma Memorial School te pawhin an nei thuai dawn niin an sawi.
 
AIR-ah Lengzem Hla Kungpui hmang dawn
 All India Radio, Lunglei chuan 17 February, 2012; zan dar 7:00 leh dar 8:00 inkar hian Lengzem Hla Kungpui, Lalzova leh F Rokima puala Thu leh Hla ruai programme (Memorial Lecture on Lalzova & F Rokima) chu All India Radio Lunglei Studio ah a buatsaih dawn a, hetah hian Pu KF Lalthuamluaia leh Pu F Saithanga te buatsaih, paper present ngaihthlak a ni ang.
 He hunah hian All India Radio FM Lunglei Choir te bakah, C Lalramfawni, R Lalhmangaiha leh Lallawmzuali Ngente te’n Lalzova leh F Rokima hla te an sa ang a, he hun hi AIR FM, Lunglei chuan LIVE in pekchhuah an tum. Pu H Lalthansanga, President, MJA Lunglei chu khuallian tura beisei a ni.

Gas buk a dik tlangpui
 Niminpiah chawhnu khan Hnahthial Gas Agent-a Gas thlengte chu Legal Metrology, Lunglei-te’n sawi lawk lovin an han enfiah thut a, a buk a tha hlawm hle niin an sawi.
 Hetihlai hian Lunglei lama gas lo thleng pawh an thlithlai ngun hle a, a tlangpuiin a buka  dik thu sawiin, Hnahthial pawh hi ngawrh taka enfiah zel an tum a ni.

PYD-in Silver Jubilee lawm
 UPC (NE) Ramthar PYD Local  chuan an kum 25  tlinna (Silver Jubilee)  nimin  khan ropui  takin an lawm.
 PYD  Ramthar Local-te hian an Silver Jubilee lawmna hi nimin  chawhma dar 10:00 atang khan an hmang tan a, Silver Jubilee lungphun Upa Lalsailova'n a hawn hnuin inkhawm neih chhunzawm nghal a ni. Jubilee lawmna puala inkhawm hi Bro.Isaac Vanlaltanpuia'n a kaihruai a, Secretary Local PYD-in report peiin, kum 25 an chhunga an member boral ta te sunna hun an hmang bawk a, hruaitu hlun chawimawina hun hmang bawkin, Rev.Lalrosanga'n thuchah a sawi a ni.
 Silver Jubilee pual hian nimin nileng khan hun an hmang a, tlai lamah ruai kilho nghalin zanin hian inkhawm neih chhunzawm leh a ni. Nimin leh nizan lama an programme hi Dist PYD Choir bakah mimal zaithiam engemawzat- in an hmanpui bawk.

Anti Human trafficking chungchang sawiho
 Niminpiah leh nimin khan DC’s Conference Hall ah District Level Training and Trainers on Anti Human Trafficking neih a ni a, hetah hian District polic mi 14 bakah YMA aiawh mi 3 an tel a, MHIP aiawh mi 8 telin Grace Society 2 baah WADA aiawh mi 3 an tel a, pastor pakhat a tel bawk.
 He hunah hian Pu Zosangliana, Adnl. SP (CID Crime), Aizawl chu khuallian a ni a, mihring hmanga sumdawnna laka inven dan leh hmalak dan tur te an sawiho a ni.

Free clinic nei dawn
 Zirtawpni hian Civil Hospital, Lunglei chuan Serte ah Free Medical Clinic (Outreach/ MMU Clinic) neih an tum a, doctor pathum bakah staff dang mi 7 an kal dawn a, zing dar 6:00 ah Hospital kawt atangin an chhuak ang.