|
25 Jan: Chief Secy Pu Vanhela Pachuau-in Electoral Roll
buatsaihtu ten Mizoram khua leh tui dik tak an thun theih nan
hlauh leh venthawn nei lova hna an thawh thin a tul a ni, a ti.
He thu hi vawiina National Voters Day vawi 2-na Aizawl-a
hmannaah sawiin Chief Secy chuan Mizoramah inthlanna muanawm tak
a awm thin chu khawvela Democracy ram lian ber India ram chhung
hmun dangte tan entawntlak a tling a, hemi kawngah hian Mizoram
chuan Election Commission of India fakna pawh a dawng thin, a ti a.
Mizorama inthlanna fel fai awm theih nana thawk thin kohhran,
tlawmngai pawl leh MPF te chungah lawmthu sawiin, inthlan
kaihhnawih thila thawk tu, a bikin Electoral Roll-a hmingziak lut thin
te mawhphurhna chu a sang hle a ni a ti.
Chief Secy chuan, National Voters Day-in a tum anga India khua
leh tui dik tak, kum 18 tling chin tawh phawt chuan Electoral Roll a
inthun a, Vote thlak ngei thin turin a fuih a, inthlan dan dik leh felfai
taka kalpui thin chu mipui thlan sorkar sawhnghet tu a ni a ti bawk.
He inkhawmah hian Chief Electoral Officer Pu K. Riachho chuan
National Voters Day hman a nih chhan chu kum 18 tling chin India khua
leh tui dik tak ten Electoral Roll-a inziah luh na chang an hriatna tur
leh vote thlak hlutna leh pawimawhzia an hriat theih nan a zau thei
ang bera inhrilhhriatna tur a ni a ti a ni.
Mizoram People’s Forum Secretary Pu Lalbiakmawia Ngente
pawhin thusawiin, YMA ten inthlan ni khua a vote thlak tute tana
thutna an buatsaih thin chu Election Commission of India in entawntlak
a ti tih sawiin, YMA thiltih dan entawn hian Election Commission chuan
rampum huap inthlan kaihhruainaah Voter te tana thuthmun buatsaih
thin turin thu a chhuah niin a sawi a ni.
He ni hi, dist dang, Lunglei, Champhai, Serchhip, Kolasib, Mamit,
Lawngtlai leh saiha ah te pawh hman a ni a, a hmanna pui ber Aizawlah
hian kumina EPIC zaa za pe thei District- Aizawl, Lunglei, Lawngtlai,
Mamit leh Kolasib aiawh te hnenah Certificate hlan an ni.
Tun dinhmunah Mizoram mipui zinga electoral roll-a hming
chuang zawng zawng te EPIC pek chhuah kim an ni tawh a ni. [regional news unit;air]
|
