Aizawl, Feb 2 : Delhi Mizo Zirlai Pawl lehkhabu buatsaih ‘8th Schedule-a Mizo Tawng dahluh zirchianna Bu’ chu vawiin khan Aizawl press Club-ah MJA President Pu H Zosangliana’n a tlangzarh. Tlangzarhna inkhawmin Mizo Academy of Letters (MAL) President Pu Lalthangfala Sailo-in a kaihruai a, MAL Secretary Prof. Laltluangliana Khiangte-in lehkhabu bihchianna hun a hmang.

    Khuallian Pu H Zosangliana chuan “8th Schedule chungchang hi Mizote zingah thuthar a ni lo chungin kan chiang lo em em a. 1991 kumah Mizoram Assembly-ah pass a ni a, 1996 ah YMA General Conference Ngopa-ah Assembly-a pass hi chak taka bawhzui nise tiin resolution siam a ni leh a. A hnuah Mizo Academy of Letters (MAL) in hma an la leh a, 2003 Assembly inthlanah khan ZNP leh MPC in election manifesto-ah an dah leh bawk a. Heti chung hian hmalakna a chak lo hle a ni” a ti.

    MJA President H Zosangliana chuan “Delhi Mizo Zirlai Pawl ten nasa taka hma an lak laiin helaia Zirlai pawl lian pahnih MZP leh MSU ten venthawn leh hlauh an lo nei a. An hlauh ber pawh chu an chiang chuang lo a. Mizote hian chiang lo hlauh hi kan ching hle a, chutih laiin zirchian tumna erawh kan nei lo a. Hetih lai hian Medical Science ten an zirchianna a\anga a hlauhawmzia an sawi \hin zuk leh hmuam erawhchu hlauh nachang kan hre leh mang si lo”, tiin, 8th Schedule hi a bikin kan ziaktute tan pawh ham\hatna a nih thu a sawi.

    Lehkhabu bihchianna hun hmangtu Dr Laltluangliana Khiangte chuan 8th Schedule-a kan awm avanga ILP hlih phah hlauhna te chu ILP nen a inzawm loh thu te, Tribal ni mumal lo Bodo te pawh 8th Schedule an nih hnuah an Tribal-na a chian chauh thu a sawi a. Mizoram Accord ah khan lo ziak tel se chuan neih a awlsam tur thu a sawi bawk a, \anrual a ngai hle a ni, a ti.