Saiha kangmei tuarte tanpuina atana Central YMA-in vehbur a khawn mekah Aizawl khawpui leh a chhehvel YMA branch 91 zinga branch 80-in nimin tlai thlenga pawisa an thehluh tawh chu cheng nuai 27, sing 9 sang 7 leh 542 a tling tawh a. Hetih lai hian YMA Sub. Hqrs., Lunglei chhunga khawn mekah pawh he chanchin buatsaih lai thleng hian Branch 11 atanga lut tawhah Rs. 1,93,176/- a tlingkhawm tawh bawk.
 Central YMA Finance Secretary Pu J.Lalsailova’n a sawi danin a la chhunglut hman lo Branch pariat hian vawiin hian an thehlut ve hman tura ngaih a ni a, Lunglei-ah pawh vawiin-ah thehluh vek tawh tura tih a ni bawk. Vawiin-ah Central YMA Executive Committee thukhawm chuan vehbur khawna pawisa tlingkhawm hlan dan tur hi a rel a ni.
 Sorkar thuchhuahin a tarlan danin Saiha kangmei chhuak avanga a bial chamchilh mek Pu S.Hiato chuan kangmei chhuak avanga chenna tur neilote lo awm lailawkna tur Relief Camp sak mek tlawhin, kangmei tuar In neitute hnenah Cheng Sing khat theuh a pe a, kangmei tuar in luahtute hnenah Cheng Sang nga theuh a pe bawk. Kangmei tuarte tanpui na’n hian Pu S.Hiato hian ama pualin Cheng Nuai 4 chuang a sem a ni.
 Minister Pu S.Hiato chuan Saiha-in kangmei a tawrh avanga Mizoram sorkar tanpuina leh Kohhran, Tlawmngai pawl leh mipuite inpekna chu ropui a tih thu sawiin, Saiha District mipui hmangaihtute hi engtikah mah theihnghilh an ni tawh ngai lovang, a ti.