Aizawl, 21 February, 2012: Naktip Ningani-a District 6-a VC inthlanna leh Aizawl Municipal Council area-a Local Council inthlanna neih tur atan campaign theih hun a tawp hnai a, Party hrang hrang leh Independent Candidate-te’n theihtawp chhuahin vote an zawng mek a, Aizawl khawpuiah chuan intina lut lawra campaign MPF in a khap avangin, tunhnaiah hetianga campaign hriattur a tam lova, khawpui lun laiah candidate-te’n an thlalak leh an chhinchhiahnate an tar chhuak a, thuthar thehdarhtute hmanga party inbeihna hriat tur a awm bawk.
 Village Council member thlan tharte chuan March ni 1 aia tlai lovah VC Executive Body an siamfel vek tur a ni a, ni 1 ah hian VC thar-te’n mawhphurhna la felin, Returning officer kaihhruai-nain thutkhawm hmasa ber an nei tur a ni bawk a ni. Hetihlai hian chak bik awmlohna leh harsatna enge maw bik avanga Executive Body siam thei lote chuan Acting Village Council President an siam tur a ni a, anni hi March ni 2 aia tlai lovah thukhawmin, ni 9 hmain Village Council Executive Body an siam fel tur a ni.
 Hetihlai hian, HPC D nia insawiten Saiphai, Saipum leh Mauchar-a Political Party hruaitute kokhawmin an thlawp candidate-te titling vek turin an vau nia sawi a ni a. Doordarshan correspondent thudawn danin Inrinni kalta khan heng khaw pathuma Political Party hruaitute hi HPCD nia inchhalte chuan Cachar Area, Dolakhal-ah an ko khawm a, an huam chhung theuhva HPCD thlawp, VC Candidate-te an tlin vek theihna tura an khaw mipuite hriattir turin an ti a, an titlinglo a nih chuan anmahniin an tuar thei ang tiin an vau a ni.
 Party hrang hrang hruaitute hi Dolakhal-ah hian Inrinni zan an riak a, Pathianni khan Saiphai-ah let chhoin nimin khan an thukhawm a, an thil tawn chu ngun taka an ngaihtuah hnuah an bawm khar mai nise tiin thutlukna an siam nia sawi a ni a, hemi chungchang hi Police-te pawhin hriain Vairengte Police-te chu SDPO hovin Saiphaiah hian an kal nghal a, Vairengte SDO Civil chuan he thil hi sorkar hmalakna kal mek anih avangin engmah sawi theih a nei rih lo tih a sawi a ni.
 

Azl; 20 Feb:  Vawiin khan Mizoram Governor Pu Vakkom Purusho-thaman chuan 23 Sector Assam Rifles-in Mizoram-in State Silver Jubilee a nih lawmna denchhena Blood Donation Camp an buatsaih chu AR hmunah a hawng. He camp ah hian Officer 5 leh a dang 52 ten thisen an pe a ni.
 Governor hian 40 AR-in Cycle Expedition Parva atanga an neih chu alo lawm lut (flagged in) bawk a. He expedition hi February 14 khan Parva atangin an chhuak a, officer 1, JCO 1leh sipai 11 an awm a, an kalna ah Medical Camp te an buatsaih thin a ni.
 Governor chuan Mizoram Statehood kum 25 naah hian mi zawng zawng chibai bukin duhsakna sang ber a hlan a. Mizoram hi state anih atangin hmasawnna hrang hrang, sum leh pai dinhmun sang zawk te, retheihna umbo na kawng ah te, zirna tha zawk leh hriselna kawng ah hma tha tak a laka nih tawh thu a sawi a. Governor chuan ram hmasawn tur chuan remna leh muanna neih a pawimawh thusawiin Mizoram ah tlawmngai pawl hrang hrang, chanchinbu mite, kohhran hrang hrang leh mipui tanrualna avangin remna leh muanna kan nei thei zel hi a lawmawm atih thu a sawi.Vawiin hi muanna, inremna leh inunauna kenkawh anih theih zelna turin mi zawng zawng inhlan thar leh turin Governor chuan a chah.
 Governor chuan Assam Rifles ten Mizoram mipui te tan tanpuina hrang hrang an pek chungchangah lawmthu sawiin, vawiin a mamawh te tana thisen pek runpui an buatsaih pawh lawmawm a tih thu a sawi bawk.
 

Lunglei; 17 February 2012: Vawiin khan YPC Hall, Serkawn-ah Central Institute of Hosrticulture (CIH), Medziphema, Naland leh All Mizoram Farmers’ Union (AMFU) te tangkawpin, Farmers’ Training on Improved Technology an nei a, khuallian ah AMFU Gen. Hqrs. President, Pu R Lalduhawma niin, he hun hi a hmanpui a, an puipa hrang hrangin an rawn tawiawm bawk.
 Trining hi chawhma dar 11:00 khan tan niin, AMFU Sub-Hqrs, President, Pu Joseph H Lalthanzuala’n a kaihruai a, Dr. H Vanlalhluna’n hunserh hmangin, AMFU Gen. Hqrs. GS Pu Zion Lalremruata’n AMFU hmalakna leh hmachhawp te sawiin, report a pe a ni.
 He huna khuallian, AMFU President, Pu R Lalduhawma chuan thu sawiin, AMFU hmalak dan leh hnathawh dan hrang hrang a sawi a, sawrkar hnathawk officer te pawh mi tam tak an thawhpui thin thu sawiin, sum semchhuah dan pawh uluk takin an kalpui thin thu a sawi a, tunhnai khan officer pakhat sum sem dan a dik loh avanga an sawisel thu sawiin, diklo leh fello a awm reng reng chuan AMFU hruaitute hriattir nise tiin, NLUP sem chungchang ah pawh venpui turin kalkhawm te chu a sawm nghal a, thurawn reng reng chu chawp leh chilha hmalak zui nghal a nih tur thu a sawi a ni.
 He training programme hi Tribal Develoment Fund (TDF) Project hnuaia serthlum ching tur, loneitu thlanchhuah te tana buatsaih a ni a, NABARD leh AMFU Gen. Hqrs. tangkawp chuan TDF hmang hian kum 2012 atangin hma an la tan dawn a ni.
 Training hi chawhma hun leh chawhnu hunah then niin, chawhnu lamah hian Technical Session  neih a ni a, resource person atan, Pu L Lalhmingmawia Pachuau, MHS, ADHO Lunglei chu hman niin, ani hian loneitute hriattur pawimawh leh tul te sawiin, hun a hmang a ni.
 

12 Feb., [Pathian ni] zan dar 12 vela bo ta Pi Sapbuangi [74] chu vawiin [16 Feb] chhun Dar 12:00 hma deuh khan nung damin an hmu tih thu dawn a ni. An hmuhna hmun hi Maurawp leh Lungsai  inkar a ni a, a biak theih tih an sawi a, a fanu Khawpuii hming a lam reng bawk an ti.
 He chanchin buatsaih lai hian an khua thlen pui a la ni lova Medical lama hruai a ngaih dawn leh loh dawn loh pawh an la sawi thei lo. Zote khawtlang hruaitute hnena atanga thudawn danin nizan khan pasaltha ramvak chuan mihring thawm ang tak, hui ha, heiha tih thawm a hrait thu a sawi a, zing lamah a hmuhna lai an va en chuan an hmu ta mai niin an sawi.
 Mizo zawngtute ei leh in tur pein Pu P.Lalhmangaihzuala, President, Sub Hqrs YMA chu  Bualpui V-ah a lut a, a ni hian Chini leh Buhfai engmaw zat a keng chho a ni. Mi bote thingpui inna tur leh Pi Sapbuangi chhung te hi Pu PC Lalthanliana bialtu MLA chuan pawisa engemaw zat a lo pe tawh bawk a ni. Bualpui V khawtlang hruaitute hian an khaw chhehvel YMA ten athim avar thlu lova mibo zawnpuitute chungah lawm thu an sawi nawn leh bawk a ni.
 

14 Feb: Vawiin khan Mizoram sorkar Anti Corruption Bureau Director Pi Sundari Nanda, IPS chuan Kolasib DC Conference Hall-ah Kolasib-a sorkar Department hrang hrang hotute a kawm.

Pi Sundari Nanda chuan, Department hrang hranga hotute chu ram leh mipuite tana sorkar sum hmanga hnathawktute an nih avangin an pawimawh hle a ni, a ti a. Mipui mimir in an dikna chanvo te an neih theih nana a taka thawktute in ni tiin tha taka thawk turin a sawm a ni. Tunlaiin langtlang sorkar kan sawi fova, India ram pumah Corruption duhlohna pawh nasa tak auchhuahpui a ni a. Chuvangin kan hna thawhna kawngah mimal leh a nawlpui te dinhmun inchan chunga hna kan thawh a ngai a. Hmasawnna dal khawp a pawisa kan ti chingpen a nih leh lek phei chuan a dik lo nasa hle ang, a ti. Mi naran in khua leh tui a nih anga an dawn tur thil te hre rengin hna i thawk thin ang u, a ti bawk.

Pi Sundari Nanda chuan a hnathawhna atanga a thil hmuhchhuah leh Officer te inzirna tur nia a hriatte a sawi a. Sum leh pai vawn leh hman thu ah sorkarin dan zawm tur a siam te officer ten an zawm lo nasa hle a a hriat thu sawiin hei hi tih loh nise, a tul chuan training pawh neih nise, a ti a. Receipt lem siam leh tul lova sum hman te tih loh nise, a ti a ni.

Pi Niharika Rai, IAS, DC leh Pu Madhur Verma, IPS, SP ten ACB Director hi an tawiawm a. DC kuta ACB charge pek chungchang a officer te ngaihdan pawh lak a niin sawiho a ni bawk a ni.