Saiha; 2 February 2012: Nizana Saiha Vengpui-a kangmei chhuakah in 20 aia tlemlo a kangral vek a;  mi 1-in hliam tuarin, thi erawh an awmlo ni-a hriat a ni.
 Saiha DC Pu Kunal hnen atanga DDK correspondent thudawn danin, Kangmei hi nizan dar 10:00 vela intan a ni a, kangmei chhuahna hmun hi bazar thlang, kawngpui hnuai lam thler-ah a ni a, inkalpawhna a zim avangin a thelhmih pawh a harsa hle a, hei vang hian in engemawzat a kangkai ta a ni.
 Kangmei hi darkar 3 leh a chanve chhung thelh a ni a, in dang kankai hlauhawm thenkhat chu thiah khalh a ni a, then tuia phuh a ni bawk a, amaherawhchu kangthelh motor 2 chauh an neih avang leh tui hman tur an neih tam loh avangin, kangmei thelhmih hi a harsa deuh ni-a thu dawn a ni.
 Kangmei chhuah chhan chhui tur hian DC chuan Pu Donny Lalruatsanga kaihhruai Magis-terial Inquiry a din nghal a ni. Hetihlai hian kangmei tuarte tanpui nan cheng sing 1 theuh leh blanket pek a nih tur thu DC chuan a puang tawh a, kangmei tuar chhungkua te hi Community Hall-ah te dah an ni a, tukin hian tlawmngai pawl ten sorkar sum hmangin eitur an siamsak a ni.
 Kangmei chhuak avang hian power supply pawh tih tawp rih a ni a, kangmeichhuahna hmun pawh nizan khan tuma tlawhpawh theih loh tur ven niin, bungraw senghawi theihte tlawmngai pawl ten an venghim a, he chhiatna thlenga mipui inpekna ropui a tih thu DC chuan a sawi a ni.
 Mizoram Larsap Pu Vakkom Purushothaman chuan he thilthleng vanduaithlak takin a thawn nasatzia leh pawi a tihzia sawiin he vanduaina avanga hliam tuar te, a then phei chu damdawiin a dah ngai hial te a ngaihtuah thu lehkha in Saiha DC Pu Kunal, IAS hnenah a thawn a. Kangmei tuartu te chhawmdawl nan cheng 78,000 a thawn nghal bawk a ni.
He kangmei chhuak avang hian Saiha bialtu Pu S. Hiato chuan Chief Minister Pu Lal Thanhawla hmu nghalin Chief Minister ho hian Finance Minister Pu H. Liansailova; UD&PA Minister Pu Zodintluanga; Disaster Minister Pu N.K. Chakma leh Chief Secretary Pu Vanhela Pachuau leh MADC, CEM Pu S. Khipo ten chhawmdawlna awm thei ang anga tanpui turin meeting an nei nghal a ni. Chief Minister Pu Lal Thanhawla’m chhiat tawkte dinhmun hriatthiam pui a, a tul ang anga chhawmdawlna pek a tum avangin bialtu Minister Pu S. Hiato chuan Saiha mipuite aiawhin lawmthu a sawi a, mipuite harsatna hrethiamtu Chief Minister Pu Lal Thanhawla kan nei chu a vanneihthlak a ti hle.
Saiha Bazar kangmei chhuak avang hian Minister Pu S. Hiato leh Pu Zodintluanga, UD&PA Minister te chuan vawiin 2.2.2012 hian Aizawl chhuahsanin Saiha an pan nghal a ni.