6 Feb 2012 :  Tukin zing khan Sports Minister, Pu Zodintluanga chuan Thuamluaia Mual-a grass phah zawh tep chu a hmunah a en a;  hetah hian Pu Joseph Lalhimpuia, HPC Vice Chairman leh Parl. Secy. Pu S Laldingliana-te’n an tawiawm a ni.
 He hunah hian Minister leh MLA te hian thu an sawi theuh a, Pu Zodintluanga chuan Lunglei mipui te chu hetianga Mual tha an neih theih avanga an vanneih thu sawiin, Thuamluaia Muala-a grass phah hi a that bik thu a sawi a, silica chips an hman pawh Aizawl lama an hman ai mahin a tha zawk niin a sawi.
 LDSC hruaitute’n Thuamluaia Mual tihchangtlun zual zawk nana Minister hnena an lo thlen tawh : Mual hungna (fencing) chungchang chu ngaihtuah zui a intiam a, hmalak dan tur hre rih chiah lo mahse, a tul anga bawhzui a tum thu a sawi a ni. Hei bakah hian LDSC hruatuite hian inkhel mual bik leh invenhimna atan hung siam nise an tih pawh ngaihtuah zui a nih tur thu sawiin, mual enkawl tu tur, chokidar dah nise tih leh hmanraw enkawl dan bakah mual enkawl dan tur chungchang sawiho a ni bawk a, LDSC hruaitute ngenna hi bawhzui a intiam bawk a ni.
 HPC Vice Chairman leh Par. Secy. te pawh hian thu an sawi ve nghal bawk a, hetiang khawpa hma la chak, Lunglei Pa ngei Sports Minsiter-a kan nei chu thlamuanthlak an tih thu sawiin, hmasawnna kan neih phah thu an sawi.
 Thuamluaia Mual ah hian HPC sum atangin Light vel hi siam mek a ni a, kil tinah eng tam tak dah tum niin, P & E Deptt. in ngawrh takin hna an thawk mek zel a ni.
 Tukin zing khan Sports Minister hian Electric venga Mini Sports Complex sak mek pawh a tlawh nghal bawk a, hei hi chak taka hmalak mek a nih thu sawiin, uluk taka enfiah reng a nih thu a sawi a ni. Electric veng hruaitute’n Tennis Court chu Tennis Association kuta awm lova, an veng thalai te thuneihna hnuaia awm tura an ngenna chu, Association kuta awm ni mahse harsatna a awm loh tur thu in a lo chang thung a ni.
 Hemi zawh hian  Pandawng rama Electric veng Mual siam mek chu tlawh lehnghalin, hmalakna a thlir zui ghal bawk.