Mizorama kawlphetha chaw chhuak tura hmalakna lian zawng zawng sumdawng liante kuta pek a ni zel chu tha an ti lo tih MPC in a sawi. He thu hi nimina Aizawl-a thuthar lakhawmtute a kawmnaah MPC president Pu Lalhmangaiha Sailo chuan sawiin, kawlphetha siam tura hmalaknaah Mizoram chan tur chu za zela 10 vel chauh a ni dawn tih sawiin, hei hi a beitham em avangin Corporation kuta pek kher lova bank lian atanga sum puk pawhin mahni state chhungah a siam theih a ni a ti a ni. 

Mizoramah tun thlenga tuikhuah lian siam a la ni lo chu pawi a tih thu sawiin, Mizoram ang thoa ei leh bara into delh lo thin Bhutan chu tuikhuah lian a neih tak avanga sum tamtak a hailut mek avangin, an hmalakna hi entawn tha a hriat thu a sawi bawk.

Pu Lalhmangaiha hian an party chuan zohnahthlak inpumkhatna leh rorelna khat hnuaia awm chu a la ngai pawimawh reng tih a sawi bawk.

Thuthar lahkhawmtute zawhna chhangin tunhnaia an party mi thenkhat Show cause notice pek chu an party inrelbawlna thila fel tawk lo thleng inzawhfiahna mai anih thu leh thil lian tham a ni lo tih a sawi a ni.