Ni 15 chhung nghak tura a tih hnuin, vawiin khan Lunglei Internet Broadband Subscribers Association hruaitute te chuan BSNL DE, NV Khondu chu hmuh tumin an kal a, nimahsela a lo awm lo. 

Tunhnai khan he pawl hian Internet Broadband Connection that zawk theih nan leh mi tam takin hnathawh nana an hman rim em em siamtha tur hian DE hi an lo hmu tawh a, DE hian ni 15 chhunga an siamthat vek tur thu hrilhin Assn. hi a lo hrilh tawh a ni. Nimahsela hun tiam  a ral hnu, tun hun thleng hian siam that a la ni lova, hei hi a chhan zawtin, a tul a nih chuan Consumer Forum ah thlen an tum thu an sawi.

Hemi kawngah hian Lunglei BSNL hotute thu leh Aizawl lama an hotupa, Pu Lalhmachhuana, GM te thu hi a inmil thei chiah lo niin an sawi a, tunhnai maia siamtha thei tur anga Lunglei DE hian a sawi laiin, GM erawh hi chuan August thla chhunga an inpeih chhuah hman a rinngam loh thu a sawi thung a ni. Hetiang a nih avang hian Broadband Subscriber te hian DE thusawi dan hi Lunglei mipui te ngaihsak tawk lova an ngaih thu an sawi a, a tul ang zela hmalak an tum thu, an President-Pu Saithangpuia Sailo hnen atangin thu kan dawng.

Hetihlai hian BSNL hian sawrkar hnathawk tan a man pangai aia 20% -a hniamin Internet connection hi an nei thei niin an sawi a, hei pawh hi Subscibers Association te’n BSNL in an puanzar loh, an haichhuah sak niin an sawi bawk.