Europe khawmualpui pum huapa football club-te inelna sáng-ber 'UEFA Champions League'-ah tun 2011-12 season atana Knockout Stage chu zanin hian \an a ni dawn ta a.  Zanin a\ang hian KO Stage-a round hmasa-ber tur Pre.Q/F [Round of 16]-a a 1st Leg match zawkte khelh \an an ni dawn a ni.
 Tunkar leh karleh te hian match 4 ve ve a awm dawn a.  Tunkar bik fixtures chu hetiang hi a ni e :
 
Zanin  (Feb 14, Thawhleh)  zanlai  –
 Bayer Leverkusen (GER) vs Barcelona (ESP)   [1:15, TEN-Action]
 Olympique Lyon (FRA) vs APOEL Nicosia (CYP)   [1:15, TEN-Sports]
 
Naktuk  (Feb 15, Nilai)  zan  –
 Zenit St Petersburg (RUS) vs SL Benfica (POR)  [10:30, TEN-Action]
 AC Milan (ITA) vs Arsenal (ENG)   [1:15, TEN-Action]

Wolves-hovin an manager an bàn
 English Premier League club Wolverhampton Wanderers chuan July 2006 a\anga manager atana an hman Mick McCarthy chu nimintlai khan an chawlhtir.
 Kum 59-a upa McCarthy hian Wolves-ho hi 2008-09 season khan 'English Football League Championship' (2nd Div)-ah champion-puiin 'English Premier League'-ah a luhchhoh-pui a.  Tun 2011-12 season kalmekah erawh 'Premier League'-ah hian tunhnai an match hnuhnung 13-te zingah 1-ah chiah chakpuiin,  tunah hian match 25 a\anga point 21 chiah la hmuhpuiin a mawnglam atanga chhiara 3-na a nihpui mek a ni.
 Hetiang hi thil awmdan a lo nih tãkah chuan Wolves-ho chief executive Jez Moxey chuan “Mick McCarthy hian kan club tan hna ropui tak tak lo thawk tawh mahse tuna kan kaldan hi kan thlak danglam-loh chuan kan relegate mai dawnin a lang si a ni” tiin nimintlai khan McCarthy hi an bàn tih a puang rup mai anih chu.

Football thunawi dangte
** Khawvela football club ropui ber pawl ni \hin Glasgow Rangers (SCO) chu tunlai hian sum lama harsatna lian tak an tawh mek avangin administration-ah an awm dawn niin a lang ta.  Nimintlaia an club thuchhuahah chuan Court of Session hnenah administrator tur pe mai turin ngenna thehluh tawh tih tarlan a ni hial tawh a ni.
** English Premier League club-te zinga a hmasa-ber ni tura February 2010-a administration-a awm Portsmouth pawh tunah hian administration-a awm hmabakin an awm leh ta mek.  Administration-a an awm leh a nih chuan an tel mekna 'English Football League Championship' (2nd Div)-ah point 10 lai paihsak an ni leh dawnin;  'League One' (3rd Div)-a tlak-thlak an hnaih sawt ang.
** Manchester City striker Carlos Tevez chuan Roberto Mancini-a’n "Ui ang lekah ngai" mahse tunah chuan Man City tana theihtawp chhuah tura a inpeih thu a sawi.  Hriat \heuh angin an inhmuhthiam-loh vangin Mancini hian Tevez hi thla 5 vel zet a inkhelh-tir duhlo tawh a ni.