Top Headlines

Vawiin khan Ethics Committee chu Chief Minister Office’s Cabinet Room ah Chief Minister Pu Lal Thanhawla hovin an thukhawm.
Ethics Committee hi officiala din ala nih loh avangin, vawiina thutkhawmah hian a hnathawh dan tur - terms of reference - chu Committee Chairman tura lo ruat tawh Pu H.Raltawna leh member 7 ruat tawhte chuan meeting an neih hmasak berah an duhdan angin lo duang phawt se tiin an remti tlang a. He Committee a Ex-Offio Chairman, Chief Minister chuan committee ah hian sorkar anga inrawlh a duh tawh loh thu sawiin, committee hian meeting an neih theih mai loh avanga he meeting hi ko leh ta mai anih thu a sawi a. Ethics Committee chu Ministers te leh MLA te kal sual tur vengtu tur leh kawng tha, dik leh fel kawhhmuhtu tur anih thu a sawlang nawn a ni.
Pu H.Raltawna, Ethics Committee Chairman chuan kar leh nilaini, ni 24 March 2010 khian CMO conference hallah meeting a ko nghal a. Vawiin meetingah hian Home leh Agriculture Ministers te bakah Secretary to Chief Minister leh Ethics Committee member 7 an tel a ni. (DIPR)

Nimin chawhma dar 11:00 khan Mizo Upa Pawl Lunglei chuan General Assembly vawi 36-na A&C Auditorium Venglai Lungleiah neiin hun an hmang a, he hun hi Pu Sanghlira Colbert inkahruaiin, kaltate sunna hun hman a ni a, Pastor R. Laltawna chuan an chhungte tana tawngtaina hun a hmang bawk.
    Khuallian Lunglei Bawrhsap Pi M. Zohmingthangi IAS chu hman niin, Bawrhsap hian Upa te hian hmangaihna kan neih a tul a, kan chhungkua in lungrual lohna kawng hrang hrangah hma ngaihna a enkawltu tur kan ni a ti a, a sawi zel naah chuan hun hi a hlu hle a, chuvang chuan Kan In (vanram) a haw tur kan nih avang leh kan hnaih zual bik tawh avangin, tuna sawi thei dinhmuna kan la din lai leh sawi thei kan nih loh pawhin ziak thei dinhmuna kan la din lai hian thangthar lo kal leh zel turte tan te, kan tu leh fate tante thil tha kan hnutchhiah tur a ni a ti.
       Chawhnu hunah rorel neiin, chawhnu hun hi Pu B. Lalchungnunga President MUP chuan a kaihruai a, an thurel thenkhat zingah, Constitution revision an pawm thu te, Tuarpuina Certificate hman tawh tur a nih thu te, Tar pension tuna thenkhatin Rs. 250 an lak laia, thenkhatin Rs 200 chauh an la la chu Sorkar hnenah Rs. 250/- a an lak theih ngen nise tih te a ni.

Vawiin khan Mis Junior Grade result MPSC-in a tichhuak a, heng mite hi an tling.

1. Malsawmsanga S/o H.C.Zamhaia, Zonuam, Aizawl
2. Pratab Chhetri S/o C.B.Chhetri, Thuampui, Aizawl
3.Lalnunmawii D/o T.Sangkunga, Dinthar, Aizawl
4.Andrew H. Lalremruata S/o H. Lalawmliana, Mission Veng North, Aizawl
5. N.Vabeiratlua S/o N.Sahia (L), New Colony, Saiha
6. Lalremruata Kullai S/o K.Lalmuana, Ramthar Veng, Aizawl

Panel List-ah heng mite hi dah an ni.

1. Malsawmdawngliana S/o Laithanzauva, Aizawl Venglai
2.Lalchhandama Ralte S/o Hrangkhuma (L), Chaltlang Lily Veng, Aizawl
3.Ronald Lalchhuanawma S/o N.Biakliana, Tlangnuam, Aizawl
4.Remlalliana Hnamte S/o Lalvena Hnamte, Ramhlun South, Aizawl  (DIPR)

Commonwealth Games vawi 19-na chu kumin October ni 3 – 14 hian New Delhi-ah a vawikhatna atan neih a ni dawn a, he Games atana ruahmanna Queen’s Baton Relay (Commonwealth Games meichher chhit tlanpui) chu Commonwealth ram hrang hrang 71-ah neih a ni dawn a ni. He Queen’s Baton Relay hi Queen Elijabeth-II – in Commonwealth ram hrang hrang 71-a Lal, President leh Commonwealth Nation Olympic Committee hruaitute telna Buckingham Palace, London-a neihah chhi tanin tunah hian Commonwealth ram hrang hrangah meichher hi mi thlanbikten an tlanpui (relay) mek a ni.
India ramah chuan meichher hi June ni 25, 2010-ah Wagah Border (Punjab)-ah a lo thleng ang a, Indian Olympic Association leh Queen’s Baton Relay Committee, Punjab-ten an lo dawngsawng ang. He meichher hi Mizoramah chuan Manipur atangin July ni 28, 2010 zing dar 10:00-ah helicopter-a phurh thlen a ni ang a, Lungleiah a kal hmasa phawt ang. Lungleiah he meichher hi mi thlanbikten Lunglei Helipad atangin Thuamluaia Field thleng an tlanpui ang a. DC Lunglei hova cultural programme-te an neih zawh hnuin Aizawl-ah lokir lehin Zemabawk Helipad-ah Queen’s Baton Relay Committee-ten an lo dawngsawng ang. Zemabawk Helipad atangin mi thlanbikten he meichher hi tlanpuia inhlan chhawng zelin Sikulpuikawn an thleng ang a, heta tang hian Khatla lama kual thlain Assam Rifles Lammualah an tawp ang.
He Commonwealth Games meichher hi zan riahpui a ni ang a, a tuk (June ni 29,2010)-ah Tripura panpuiin India ram state hrang hrangah kalpui zel a ni ang. (DIPR)