Top Headlines

Bamboo Development Agency Mizoram leh India  a Agarbati siamtu company lian ber M/s N. Ranga Rao & Sons Mysore te chuan vawiin tlai khan thawhhona thuthlung (Memorandum of Understanding), Commissioner & Secretary of Industries pisa-ah an ziak fel a. MOU ziahna inkhawm hi Executive Chairman Bamboo Development Agency Pu R.L. Rinawma, IAS,  leh Commissioner & Secretary of Industries  ni bawk chuan  a kaihruai a. MOU hi Pu M.S. Suresh, Chief Operating Officer, N. Ranga Rao & Sons, Mysore leh Pu Shurbir Singh, IAS Executive Director, Bamboo Development Agency & Director of Industries, Mizoram te’n an ziak a ni.

M/s N. Ranga Rao & Sons hian Cycle Brand hmingin Agarbati an siamchhuak. An Agarbatti siamna atan hian Mizoram atanga Square Agarbatti stick siamchhuah te leisakna tur leh a tul anga training  pekna turin he inremna hi ziah a ni. Inremna ang chuan thla tin Agarbati Company hian Mizoram atangin Agarbati kuang tone 50 vel an lei dawn  niin  tarlan a ni bawk a.  Pu Suresha chuan Agarbati kuang sample chu en nghalin, a quality chu an duh ang tak a nih thu a sawi.

Pu R.L Rinawma chuan MOU ziahfel a ni chu lawmawm tiin Mizoram Sawrkarin eizawnna nghet neilote khaichhuahna atana NLUP a duan mek ah hian, he MOU chu hmanraw tangkai tak a nih theih a beisei thu a sawi. Pu Rinawma chuan he MOU kaltlanga  Zokhaw economy nasa taka tihdanglam (revolutionize) a nih theih thu a sawi bawk a ni. (dipr)

Mizoram Food and Allied Industries Corporation Ltd. (MIFCO), Industries department chuan MIFCO hnathawkte harsatna chanchinbu thenkhata lo lang chungchangah thuchhuah siamin Sorkar dinhmun leh thlirna a tarlang.
    

MIFCO hi 1989 a din a ni a, Industries department hming tumin food processing lam hawi chi atan Nodal Agency a ruat a ni. Tunah hian project kal lai hmun 4 ah a nei a, chungte chu Fruit Processing Chhingchhip te, Food Park Chhingchhip te, Food Processing Centre Sairang leh Pork and Chicken Processing Zemabawk te a ni.
    

MIFCO share capital hi a din tirh atanga 2004 kum tir thleng khan cheng vaibelchhe 10 a ni a, March 25, 2004 atang khan cheng vaibelchhe 20 ah tih pun sak a ni. Share capital hi Sorkar hian a hlawmin a pe lo va, kumtinin tlem te te in a pe a. 1993–2000 chhung hian Central leh State Sorkar atangin grant cheng vaibelchhe 21.71 a hmu tawh a; 2007-08 thleng khan cheng vaibelchhe 16 vel a hloh tawh bawk a ni.
    

MIFCO hian a thil hralh chhuah atangin 2003-04 khan cheng nuai 7.34 a hmuchhuak a. 2004-05 ah cheng nuai 7.81, 2005-06 ah cheng nuai 14.02, 2006-07 ah cheng nuai 13 leh 2007-08 ah cheng nuai 16.92 a hmuchhuak bawk a ni.
    

MIFCO chet that lohna chhan te chu thil siamchhuah hralhna lut beitham te, marketing plan leh operation a hmalak dan fel tawk lo leh raw material lei dan plan duhthu sam tawk lo te hi a ni a. Thawktute zingah mi 38 ngawt hi Sorkar department dang atanga sawn-luh tawp niin operation nih phung an hre tawk lo a. Share capital atana Sorkarin sum a pek chhuah hi a tlem thin avangin thatpuina tham thil ruahman chhuah ngaihna a awm lo niin thuchhuah chuan a tarlang.  [dipr]

Vawiin chawhnu dar 2:30PM khan Chief Minister Pu Lal Thanhawla chuan Serchhip DC Office Complex-ah MPSC Exam Centre a hawng. Serchhip DC Conference Hall-a hawnna inkhawm neih hi DC Pu H.Darzika’n a kaihruai a, hawnna thu sawiin Chief Minister chuan MPSC chu an sorkar hmasak laia an lo din anih thu leh member tur atan pawh mithiam, midik leh rinawm uluk taka ruat an nih thute a sawifiah a. MPSC chu sorkar chuan tihchangtlun zel tumin tunah pawh examination hall tur buaipui mek anih thu a sawilang a. Mizorama zirna thalo siam tha tura sorkarin Education Reforms Commission a din thute sawi nawnin India ram state zinga Mizoram chu Education Reforms Commission din hmasa ber an nih thute a tarlang bawk. MPSC Exam Centre hawn thar chu chhawr tangkai tura Serchhip thalaite chu fuihin taimakna leh tumruhna nen bei turin a fuih a, an zirlai tibuai pha khawpa khawtlanga inhmang buai lo turin a chah bawk.

Health Minister Pu Lalrinliana Sailo pawhin he hun hi hmanpuiin MPSC Exam Centre chu chhawr tangkai ngei turin thalaite fuihna thu a sawi bawk. (DIPR)

Zobawk khawtlang chuan nimin khan an khua-a HSLC Exam Center sawrkar in a hawn thar sak avanga lawmthu sawina hun an hmang a, he hun hi bialtu MLA, Joseph Lalhimpuia HPC Vice Chairman ni bawk chuan a hmanpui.
    

He hun hmanpuitu Pu mahima chuan thu sawiin, khawtlang hruaitute thahnem-ngaihna leh official ten theihtawp an chhuahna avanga Zobawk khua-ah HSLC Exam Centre a awm ta chu lawmawm a tih thu a sawi a. Exam Centre thar neih mai duh tawk lovin, Centre thianghlim, dik taka exam beihna hmun leh result tha tak neihna hmun a ni ngei tur a ni a ti. A sawi zelna ah HPC Vice Chairman chuan, Chief Minister Pu Lal Thanhawla duhsakna avangin Zobawk khawtlang pawhin hmasawnna nasa tak an nei chho zela, sawrkar hmasa kum 10 chhunga Zobawk khua-in hmasawnna atan a sum an hmuh aiin, tun sawrkar kum khat leh a chanve chauh chhunga hmasawnna hnathawh nan a sum an hmuh chu a tam tawh zawk a ni a ti a.

Zobawk khawtlang te chu kum 10 chhhunga an hmasawnna leh tun sorkar kum khat leh a chanve chhunga an hmasawnna te lo khaikhin ve turin a sawm a ni. Hei bakah hian inthlan dawna kan  lo intiam tawh ang ngeiin, tun sawrkar  chhung ngei hian Zobawk-ah Higher secondery School hawn hman a ni dawn a ni tiin, Gov't Zobawk High School building sakthatna atan tunah hian cheng nuai 30 ruahmanna siam  mek a ni a ti bawk. HPC Vice Chairman hian Tuna Congress sawrkar Pu Lal Thanhawla kaihruai chu Zoram mipuite tawngtai chhuah a nih avangin, phuba lak a tum ve lova, chuvangin, MNF chakna khua-ah te pawh thliar bikna awm lovin, sawrkar chuan hma a la zel a ni a ti a. Zobawka Sport Academy siamna tura sawrkar hmasa in cheng nuai 70 leiba a hnuchhiah pawh Congress sawrkar chuan a rulh zawh sak vek a ni a ti.

HPC Vice Chairman hian HSLC Exam Centre lawmna hun a hmanpui zawh hian Zobawk khaw mipuite tan Public Interview hun a hawng nghal a. A nupui Pi Mami chuan Zobawk khua a kum 75 chin chunglam mi 70 bawr vel te hnenah Torch Light a pe theuh bawk.