Top Headlines

BCM Bazarveng Lungleiah Vanlalsailova Speaker-a hmangin Crusade hlawhtling tak neih mek zel a ni  a an hlim hle a, boruak pawh a tha hle. Zanin hian Crusade tawp zan hun hman a ni dawn a, Speaker Vanlalsailova chuan Lunglei khawpui chhunga Thalai, nu leh pa, naupang chen in a thei apiang he hun chhim tur hian a sawm a, a bik takin Thalai te chu a sawm ngawrh hle a ni. Nizan ah pawh inkhawm an thahnem hle a, dar 6:30pm ah tan tur a nih laiin, dar 5:00pm vel ah chuan an thu khat ti tih tawh a, kalhma a ngai hle. Sailova hian nimin khan BCM Missionary Confe. a hmunah a chhim ve a, tawngtaina hun te lo siam sak a ni a.

Zanin hian Missionary te zingah, an crusade chhim duh an awm phawt chuan a bik taka thutna siamsak an nih tur thu te sawiin inkhawm turin a sawm bawk a ni. Sailova hi a prog. a khat hle a, April thla thlengin prog. a khat chho vek tawh a, May thla ah Australia lamah a kal maithei bawk niin thudawn chuan a tarlang a ni. Vanlalsailova hian Mizoram-ah Pathian duh loh zawng, 'Idol Worship' a thleng a, Biak In zawm, building sumdawnna atana hman awm chho mek pawh Pathian duh loh zawng a ni, a ti.

Cheng nuai 13 senga sak, SSA Music Academy Building, Chhinga Venga mi chu Inrinni khan School Education Secretary, Pu K. Riachho-a’n a hawng. Hawnna thu sawiin Pu K. Riachho chuan rimawi ngaina tak hnam, Mizote zinga SSA hma lakna-a Music zirna school tha tak hawn a ni ta chu lawmawm a tih thu a sawi a, District dangah pawh music zirna School din a nih theihna turin tan lak mek a nih thu leh zirtirtute inpekna chu fakawm a tih thu a sawi bawk.

Pu K. Riachho chuan naupangte chu lehkhathiam ni mai lo a, chhawr tlak, mi thiam ni thei tura lehkha zir tura chahin, RMSA hnuaiah music leh Sport lamah nasa zawka tan lak mek a nih thu a sawi a, music zirtirtu 23 lak thar a nih tur thu sawiin, sorkar laipui atangin sum pawh hmuh a ni tawh a ti bawk. SSA Music zirna School hi naupang 250 zir theihna tura siam a ni a, Middle leh Primary ah then a ni a, nikum chhunga a titha zual pathumte hnenah Pu K. Riachho chuan lawmman a sem nghal a ni. Music zirna School hi December ni 7 atanga tanin, January thla-ah exam an buatsaih thin a, nikum khan zirlai naupang 250 zingah 193 an exam a ni. Music instrument hrang hrang - Keyboard-14, Guitar-10, Zai zirna -6, Drum set - 4 dah a ni a, heng lei nan hian cheng 8,50,000 hman ral a ni a, Tonic Solfa leh Staff notation Theory pawh zirtirtu pali-in an zirtir thin a ni. Hawnna inkhawm hi Music Academy Sub Comtt member, Pu Zothanmawia’n a kaihruai a ni. (zonet)