Top Headlines

Vawiin chawhma dar 10:30 khan Champhai I&PR Conference Hall, Chanem ah Pu Lalsawta Minister, School Education  leh Champhai District a Head of Offices ten in kawmhona an nei.
He inkawmhona Pu Vijay Kumar Bidhuri IAS, DC Champhai kaihhruai ah hian Pu Lalsawta chuan officer kalkhawmte hnenah chuan fuihna thu tha tak tak a sawi a. Department hrang hrang officer te hnenah chuan an department hnathawh chu langsarin a vul chuk nghal lo a ni maithei,  hna biru tak leh tukhaw hriatpui loh pawh a ni thei, amaherawhchu Mizoram sorkar leh mipui tan hna tangkai tak, a kila lung tangkai em em an ni tih inhria a, rinawm tak leh thahnemngai taka thawk chhunzawm zel tura sawm in Champhai District tihmasawn tura thahnem ngai tak leh theihtawp an chhuah thin naah lawmthu a sawi a. Department lian leh te deuh te pawhin hmasawnna kawnga an thawhna chu Mizoram tan kawngro su tu a ni chho zel a ni a ti.

Zirna hrang hrang ‘Education’ ah phei chuan Minister a nihna anga Mizoram chu zirna lama langtham ngei tura hmasawnpui a tum thu sawiin Education Minister chuan tunah hian Mizoram sawrkar chuan Education Reform Commission ‘ Sharma Commission’ tia vuah chu chak takin a kalpui mek a, a rah tur chu tun atanga reiloteah ‘unemployment’ harsatna hi lo kiangin khawvel ram dang mi ten ’ India ram hmarchhak state te takte,mipuite ralmuang taka an chenna ah zirna leh thiamna changkang tha tak a awm a, tahchuan I fate kal tir rawh an mamawh zirna tha leh changkang chu an dawng dawn nia ‘an la ti ang a ti a .

Tuna Tlangsam khua a Polytechnic din tum mek pawh hi thalai ten an la chhawr tangkai ngei a beisei  thu a sawi rualin Pu Lalsawta chuan NLUP hi kan la hmang tangkai dawn tiin hemi lam kawnga sawrkar hmalak mek na leh department lam pawhin an tihturte lo zir uluk lehzual turin a chah nghal bawk. (DIPR)

Ralvengtu chuan 13th August khan Lunglei Bazarveng (Kikawn) a khawsa, Pu C.Thangvunga thih chungchangah a fapa-in lehkha a rawn thawnna kan lo dawng a, a ngai ngaiin kan rawn ti chhuak e. (Editor)

To,        

    The Editor, Ralvengtu Evening Daily Newspaper, Lunglei

Subj:    C.Thangvunga Boral Chungchanga Thil Thlen Dan

Pu Editor,

    Ka Pa C.Thangvunga Date 9th August 2010 zing lama a boral chungchangah thuthang dik lo leh chiang lo a tam avangin i chanchinbu zahawm takah thil awm dan dik tak hi mipui ten an hriat theih nan khawngaih taka min lo puan chhuah sak turin ka han ngen che a ni.
    

Ka Pa (C.Thangvunga) hi kumin April ni 2 (Good-Friday) hma ni tlai chawnghei tawngtai kan Kohhran (UPC NEI, Kikawn Local) in kan neih atangin Pathian-ah hlimna thar changin a nun te pawh a inthlakthleng tan a. Hun a kal zel a, a nuna Pathian hnathawh awm mek chu Thlarau sualin thikin, June thla laihawl atang khan Thlarau sualin a bei tan ta a. Kohhran hruaitu leh thahnemngai te’n Pathian thu nen theih tawpin an enkawl chho nghal a ni. Amah tibuaitu hian a nunphung a tikhaihlak nasa hle chungin chaw hi a thlah meuh lova, hei bakah hian Bawnghnute leh thil dang kan ei tir thin bawk a ni. Hei vang hian Chanchinbu a ni 50 chuang chaw nghei anga lo lang pawh hi thu dik lo hulhual a ni bawk. Tin, chanchinbu thenkhata thawmhnaw pawh ha tha duh lo anga tarlan kha thu dik lo niin, tawngtaina hun hman dawn phei chuan a thawmhnaw thain a inthlak vek zel a ni.
    

A harsatna-in a kian san theih lawk loh vang hian a dam beiseiin kan In (Bazarveng, Kikawn) atangin UPC N.E.I Dist Hqrs, Biak In Chanmari-ah enkawl turin ni 5th August 2010 (Chawhnu lamah) khan dah phei niin, duat takin kan Pastor C.Vanlalena’n ni li (4) leh zan thum (3) (i.e from 5th August to 8th August 2010) a  enkawl a, Pastor hi a taksa lamah chaklohna a neih vangin Rahsiveng lama rawngbawlna hmang mek Pastor K.Lalchamliana leh a rawngbawlpui mi paruk (6) te chuan a boral zan (8th August 2010) hian Biak In-ah hian enkawlin midang luh ve rem ti lovin an inkhar hnan a. A tuk (9th August 2010) zing lam anih chuan he vanduaina hi kan chungah a lo thleng ta a, hriatthiam har kan ti hle a ni. A boral hma zan Inkhawmna (Chanmari Biak In)-ah pawh  kei leh ka thianpa-in lamtual-ah kan lam pui a, a tuk maia thihpui tham khawpa chak lohna a neih kan hriat loh bakah, Sunday zing hian amah hi kan bualfai avangin a thih hnua a taksa a hliam zozai te hi a awm lo tih ka han sawi duh bawk a ni. Tin, chanchinbu thenkhat a ‘a taksa thi mahse, a thlarau chhandam-a a awm chuan a chhungte pawh an rilru a dam’ ti a Pastor a tawngchhuak anga tarlan hi kan thusawi ni hauh lo a ni tih pawh ka han sawi duh a. Keini chuan a rilru, taksa leh thlarau a dam kan duh avanga Pathian mite bel kan ni tih ka han sawi duh bawk a ni.
    

He kan vanduaina chunga min buaipuitu Bazar Veng YMA, Kohhran hrang hrang, Police Officer, thenrual tha leh kan Kohhran hruaitute chungah Pathian hmingin lawm thu kan sawi tak meuh meuh a ni. Tin, ka pa boral chungchangah hian thu belhchian dawl lo hi darh lo se tih hi kan chhungkaw duh dan a ni e.

Sd/- C.Lalnunthara
S/o C.Thangvunga (L)
Bazarveng, Kikawn : Lunglei.

Nimin-piah zan atanga Lunglei leh a chheh vela zan khua deuhthawa ruah nasa tak a sur avangin In bul leh kawng dungah min nasa tak a thlen.  Lunglei khawpui chhung hmun hrang hrangah chhiatna a thleng nual a, Pu Laltawna Zotlang te In bul min avangin Vawk In a min a, vawk note hi dam tak a chhanchhuah leh a ni a, Pu C.Lalsangzuala te in bul minah a Bike In chhuat min thla vekin, Bike (Achiever) chu lei vungin a chhilh a, nimin khan thenawm khawveng te inpun-khawma lakchhuah leh a ni a,

Pi Lalzami Zotlang te In pawh kawngka bul Inhnuai a min avangin Inchhung luh leh chhuah dawnah pawh fimkhur taka kal a ngai hial a ni.  Pu Zohmingsanga Serkawn te In chhak min chuan an chenna In bang  Brick nekchhia-in Inchhung-ah leivung engemawzat a tawlh lut a ,hei hian inchhung pawh a ti nuam lo hle bawk. Hei bakah hian Lunglei khawpui chhung kawng ko hmun engemawzatah lei tawlh a awm bawk a, District Road BCM Biak In thlang min phei chuan kawng a hnawh phui a, Two Wheeler kal theih mai tur chuan nimin khan siam nghal ani.

Aug 13 chawhnu dar 1 bawr vel khan Silchar atanga Aizawl lam pan Truck MZ 01 C 3528 cement leh iron rod phur chu Kawnpui leh Sairang inkar Tuitun Tui bulah a chesual a, a hmunah mi 3 an thi a mi 2 in hliam an tuar.

Thawdawnna in a sawi danin he Truck hi Thingsul Tlangnuam ami Pu Aisiama ta niin a fapa Famkima’n a khalh a. Mita hmutu ten an sawi danin he motor hi a chetsual hma hian a hma ke chu a puak a, a khalhtu in thunun thei lovin culvert feet 40 vela sangah an tlanliam ta niin a sawi.

Motor ah hian mi panga an chuang a, chumi zingah Driver Famkima, H.Ngaihlira (VCP Thingsul Tlangnuam) leh hnamdang pakhat te chu a hmunah hian an thi nghal a, Vanlalrual leh Lalthanzual te chuan hlim na vaklo an tuar thung a ni. (buannel.com)