Kum hlui November ni 13-a Bungthuam tlangval, Zarzokima thahna-a a meizang hlaptu ber ni-a hriat chu Mizoram Police-te’n an man. Zarzokima thahtute chhui tura din, Special Investigation Team atanga thu dawn danin kar kal ta Zirtawpni khan Tripura-ah Birsila Riang, kum 23, Talmoni Riang fapa chu an man a, a tuk, Inrinni khan Chibu Mohan, kum 24, Ram Chonro fapa chu an man leh a, heng mite pahnih hi Pathianni khan Aizawl rawn thlenpui an ni a, ani nen hian Zarzokima thattu ni-a an hriat mi 6-te chu an man tawh a ni.

Special Investigation Team hriat danin Zarzokima thattute hi mi 8 an ni a, Birsila Riang hi Zarzokima thattute zinga a meizang hlaptu ber ni-a hriat a ni a, mahse amah hian Zarzokima kah hlumna-ah khan a kal ve lo niin Special Investigation Team hnenah hian a sawi a, Chibu Mohan hi chuan Zarzokima kah hlumna-ah khan a tel ve ngei tih a sawi tawh thung a, Zarzokima kha ama kah a nih thu leh a ruang chunga lehkha hnutchhiahtu a nih thu, Special Investigation Team hma-ah hian a puang tawh ni-a thu dawn a ni.

Puan tawh angin Special Investigation Team-te hian Zarzokima thattua puh mi 6 an man tawh a, thla hlui ni 17 khan Vanlalfela leh Chusarai-te chu Silchar-ah an man a, thla hlui ni 21 khan Lalthazuala chu Mizoram leh Tripura ramri-ah an man leh a, hemi hnu, ni 23 khan R.Laldawngliana chu Kanhmun-ah an man leh a ni. Mizoram Police Special Investigation Team-te hian Zarzokima thattu hi ngawrh takin an chhui zel a, tuna an mi man tharte pawh hi Zirtawpni leh Inrinni-a an man a ni.

Police te hlawhtlinna hi a tir maiah ZONET-in hre mah se, Police te’n an hnu chhui zelna a tibuai thei ang tih hlauthawnga an ngen ang leh, ram leh hnam nghawng thil a nih avang leh Police-te hnu chhui lai tihbuai a hlauhawm avangin ZONET chuan a puang lawk lo a, tunah chuan Special Investigation Team-te remtih angin puan a ni ta a ni. (zonet.in)

Comments (0)

Subscribe to this comment's feed