Kumin 2010 Chapchar Kut lawmna naktuk a neih tur leh naktipa Cheraw kan a Guinness World Record siam tura inbuatsaihna chuan a vawr tawp a thleng ta. London khawpui atang a Guinness World Record rawn  endiktu tur Adjudicator Pi Lucia Sinigaliesi pawhin Aizawl a rawn thleng tawh a. Ramchhung leh ram pawn atangin chhimtu mikhual pawimawh ho pawhin Aizawl an rawn lut kim hlawm tawh a ni.

Naktukah hian Chapchar Kut lawmna Sipai Lammual ah chawhma dar 10:30 atangin tan a ni ang a; Kut thlengtu Pu PC.Zoram Sangliana, Minister Art & Culture a ni ang a, Kut Pa atan Pu Lal Thanhawla, Chief Minister a ni ang. In lawmna thu Pu Lalchungnunga President, Central YMA in a sawi ang a; hunserh Bishop Stephen Rotluangan a hmang thung ang a. Nilengin Programme hlimawm taka hman a ni zui ang.

Cheraw kan a Guinness World Record siam turin naktip March ni 12,2010 chhun dar 12 atangin Sipai Lammual leh kawngpui dung Chanmari atanga Skulpui kawn thlengin Cheraw kan a ni ang a. Hemi atan a inbuatsaihna pawh engkim zawhfel a ni ta a; a kaltluan chuan khawvel hriatah Cheraw kan tam leh pui ber a chhinchhiah kan ni dawn a ni. Hemi atan hian khawpui chhung nula leh tlangval bakah ramchhung hmun hrang hrang atangin lamthiam mi singchuang fe an fuankhawm tawh a ni.

Ramdang a phochhuah tham turin Documentary Film siam a ni dawn a, thla la turin chunglam atanga hman tur Helicopter pawh tihfel a ni tawh a. Hemi ni hian lammual chhungah ruatbikte nilo chu thla la tura veivah a rem dawn lova, mahni thuthmun atanga lak mai tur a ni ang.

Tlailam dar 4 ah Adjudicatorin Result a puang ang a, Guinness World Record kan siam theih chuan Certificate hi Pu P.C. Zoram Sangliana, Minister in Mizoram aiawhin a dawng ang a. Rithei zawng zawng nen lawm tur a ni a; Adjudicator in Press Conference a nei zui nghal ang. (DIPR)

Comments (0)

Subscribe to this comment's feed