Nimin chawhnu khan BCM Zion Centenary Hall-ah Legal Awareness Camp on NREGA & Lok Adalat chungchang inzirtirna leh inhrilh hriatna hun hman a ni a, He hun hi District Legal Service Authority, Lunglei ten an hmang a ni.
    District Legal Service Authority, Lunglei-ah hian member pariat awmin, he hunah hian member pasarih lai an kal thei a; chungte chu– Ngursangzuali Sailo, Civil Judge cum 1st Class Magistrate, Helen Zomuanthangi, APO, DRDA Lunglei; Lalramtiama Advocate, C.Zokhuma Advocate, C.Hrang dula, Principal LGC, LT.Zohranga leh Lalhming muana Chawngthu te an ni a, an member pakhat C.Darchhawna chu engemaw harsatna avangin a tel ve thei lo a ni.
    Legal Awareness Camp on NREGA & Lok Adalat chung-chang zirna hun hi Pu LT. Zohranga’n a kaihruai a, he huna thusawitu, Pu. C. Zokhuma Advocate chuan dan chungchanga hriattur pawimawh tak tak sawiin, thubuai ngaihtuah chungchangah, thubuai lian tham Kum 5 leh a aia rei tan theihna ang chiah chuan Evidence neih ngei ngei angai a, evidence tel lo chuan mi tumah thiam loh chantira convict ngawt theih a ni lo a ti.
    Thusawitu dang, Nl. Ngursangzuali Sailo, Civil Judge cum 1st Class Magistrate pawhin thusawiin, NREGA chungchanga hriattur leh thil tul hrang hrang a sawi a. Sawrkar laipuiin, ni 100 inhlawhna tur a siam chu dik taka hman anih theihna tur thil hrang hrang chu Supreme Court in a ngai pawimawh hle a ni a ti.
    NREGS hnuaia inhlawhfak-in hnathawh hlawh chu an hnathawh zawh atanga ni 15 hmain lak ngei ngei tur a ni a ti bawk. Hei bakah hian, Mizoramah NREGS hna kan thawh dan chungchangah, mi thenkhatte taima taka thawk an awm thin laiin, thenkhatte chu zelthel tak takin an thawk thin a. Hemi chungchangah hian sawrkarin NREGS hmangin ni 100 inhlawhna min siam a, kan thawk ta sa sa anih chuan rinawm leh taima takin thawh theuh tum ila, kan hnathawhna leh kan thil tihna kawng hrang hranga rinawm leh diktak, taima taka kan tih thin hi, Pathian rawng kan bawlna vek a ni a ti.
    Ani bakah hian, Pu Lalramtiama Advocate chuan, Lok Adalat chung-changa hriattur pawimawh hrang hrang zirtirna hun a hmang a. Miin thubuai an neih changin Civil Court-ah thubuai an thehlut a, hun rei tak chhung a ngaihtuah angaiin, kun 2/3 laite pawh a ngaihtuah angai thin a, chutiang anih avang chuan Lok Adalat chu siam a niin, Lok Adalat-ah chuan thubuai chu sawi tawnin ni 2/1 chhung lek pawhin inrem theih thin a ni ,a ti.