Document lem man chhuahna khua a SIR hearing YMA hruaitute’n an telpui

13 Aug 2026:- Nimin khan West Tuipui Bial-a SIR Hearing neih tawpna ber ni turin, Lamthai leh Bindasora te Lamthai PS-ah SIR Hearing neih a ni a, he hun hi YMA Sub Headquarters, Lunglei atangin Pu H. Lalhmingthanga Asst Secretary, Pu Zohmangaihsanga Chhakchhuak SEC, Pu LH Lalmama SEC te bakah YMA Tlabung Branch hruaituten an telpui.

Hmanni deuh khan Lamthai khuaah hian YMA Sub Hqrs Lunglei hruaitute leh YMA Tlabung Branch hruaitute hian Voter ID lem 6 an manchhuak a, hemi chungchang hi bawhzuia chhuizui zel a ni a, hun reiloteah a mawhphurtu ber hi manchhuah an beisei.

Bangladesh leh India ramri hi tuipuiin a daidan a, Fencing mumal awm lo anih avangin awlsam taka inkalpawh theih a ni a. Inkalpawhna a awlsam miau avangin nupui, pasalah an innei ta mai thin a. Hetiang anih avang hian Bangladesh leh India mi leh sa inneih pawlh te, an nupui, pasal, fanaute ID neih tir tuma hma la an awm thin nia hriat a ni a, hetiang tithinte zawn chhuaha hremna pek ngei an duh thu Pu H. Lalhmingthanga Asst Secretary chuan a sawi.

Lamthai khuaa hearing neihnaah hian Bangladesh mi leh sa ni ngeia hriatte paih turin ERO hnenah an thlen a, Midang hriatchhuah belh an awm anih chuan ziakin a hnena thehlut turin ERO Pu Moses Lalfakawma Tlau MCS chuan YMA hruaitute hi a hrilh a ni.