“Bawlhhlawh vanga FIR thehluh a ngai hi a zahthlak” – Pu JH.Kawllianmawia, Gen. Secy LDCC

17.8.2026: Pu JH.Kawllianmawia (Valtea) Gen. Secy Lunglei District Congress Committee (LDCC) chuan Lunglei khawpui chhung bawlhhlawh sawngbawlna LMC-in hman theiha an peih theih loh avangin tunhnaiah FIR hial ngaiin kan khawpui enkawltute chungah a thleng a, a zahthlakin a mualphothlak takzeta, hei hi engvang nge kan tih chuan, a veilotu leh a hringlotuin hna a enkawl avang a ni, a ti.

He thu hi vawiina Lunglei District Congress Committee-in Congress Bhawan Lungleia Political Session ah sawiin, LDCC Gen.Secy chuan Congress sawrkar lai khan Sazaikawn, Lungleiah khawpui bawlhhlawh sawngbawlna hi a bul tanin a hmun hma an lei a, Central-ah project pawh duan a ni, a ti.

Congress hun laia project siam chu MNF sawrkar khan NLCPR atangin nuai 600 an hmu a, ZPM sawrkarin a enkawl zui leh a ni, a ti. Chutiang anih tawh hnuah pawh tun thlenga hman theih tura peih a la ni lo hi sawrkar leh LMC inthlahdah vang liau liau a ni, a ti.

Pu Valtea chuan Congress sawrkar khan hmasawnna ruhrel hrang hrang a siam a. Hmalakna pawh a nei tam hle a, thalaite tan khawvel thar buatsaihin infiammite, sawrkar hna zawng ramchhung leh rampawn tan coaching leh training te a buatsaih thin a. Sumdawng leh hma la duh tak tak tante kawng a siamsak bakah kuthnathawktute tanpuina chhungkaw nuai 1 leh sing 5 tan NLUP a pe bawk a. In nei lo te tan hmun engemawzatah a saksak bawk a, tunah hian chhungkaw 1,096 an cheng a, mi harsa leh mi chhumchhia te tana Congress-in a hnathawh kha thlirletin Pathian pawh a lawm ang, a ti.

Pu ZD. Lalbiakenga, Secretary, LDCC chuan he hun hi a kaihruai a, Upa T. Lawmsanga, Organiser LDCC chuan hunserh a hmang a ni.