‘Guerilla Fighter atangin Chief Minister’ tih lehkhabu tlangzarh

13 July 2026: Vawiin dar 11:30am khan Aizawl Mizo Hnam Runah MNF President Pu Zoramthanga former chief minister, a piancham ni takah a lehkhabu buatsaih ‘Guerilla Fighter atangin Chief Minister’ tih chu former deputy chief minister Pu Tawnluia member NCC, GHQ chuan a tlangzarh.

He lehkhabu hi Saptawnga tihchhuah tawh a ni a, Pu Zoramthanga chuan a beisei phak bakin Mizoram chhung mai ni lo, ram pawn lam thleng pawha an hlutsak chu lawmawm a tih thu a sawi. Thangthar lo awm zel tur tan Mizo hnam movement chanchin mamawh lakkhawm theihna tur ‘Mizo Hnam Movement Dictionary’ tangkai tak anih ngei a beisei thu a sawi.

Pu Zoramthanga chuan lawmthu sawiin, a tirah chuan he lehkhabu hi ‘ka autobiography’ tih mai ka tum laiin; saptawnga min buatsaih saktu penguin hovin ‘from rebel to chief minister’ ti rawh min ti a. Keiin zalenna sualtu kan ni a, hel kan ni lo a, chutiang chu ka duh lo, ka ti a, ‘freedom fighter’ tih zawkte kan rel laiin, tuna a bu hming ‘Guerilla Fighter atangin Chief Minister’ tihah hian kan sirtluk ta a ni. Miin an chhiarin hrehawm an ti palh ang tih ka hlau hle a, mimal rilru tina zawngin thu pakhat mah ka ziak lovin ka hria a, a taka ka paltlang thudik tak, ka experience atanga ka ziah a ni, a ti.

Lehkhabu tlangzarhtu Pu Tawnluia former deputy chief minister, member NCC GHQ, Underground sorkara Army Chief lo ni tawh chuan, Pu Zoramthanga’n Mizo hnam tana zalenna sual laia sulsutu pawimawh tak a lo nih tawhna leh Mizoramin Chief Minister kan neih tawha thawk tha ber a lo nih tawhnate hi thangtharten an theihnghilh ngai loh tur thu a sawi.

Lehkhabu thlir lawkna neitu Dr.Zoramdinthara Associate Professor & Head of Department, Mizo department, MZU chuan, he lehkhabu hi thang leh thar lo awm zel turte tan Mizoramin zalenna a sual chungchangah lehkha rawn tlak berte zing ami a ni zel ang, a ti.

Inkhawm hi Dr.R.Lalthangliana MLA, Senior Vice President chuan kaihruaiin, Rev.B.Vanlalduha PCI chuan hunserh a hmang a ni.