Health minister Pi Lalrinpuiin Damdawi in kalthei tlangzarhin a vailiam

17 Aug 2026: Vawiin khan Mizoram sawrkara Health & Family Welfare Minister Pi Lalrinpuii chuan TATA AIG General Insurance Company Ltd aṭanga Corporate Social Responsibility (CSR) Healthcare Theme hnuaia Lunglei District tana dawn, damdawi in kal thei, Mobile Medical Unit (MMU) lirthei thar chu Civil Hospital Lunglei Auditorium-ah tlangzarhin, Lunglei District chhung hmun hrang hranga hriselna kaihhnawih hmalaknaa ṭangkai taka hman atan a vai liam.

MMU thar tlangzarh puala inkhawm buatsaihah Khuallian Pi Lalrinpuii chuan Sum leh pai tam tak senga Lunglei District mipuite hriselna atana MMU ruahmansaktu TATA AIG leh an thawhpui Swasti–The Health Catalyst te chungah leh a taka kalpuitu tur MFM te chungah lawmthu sawiin, H&FW hotute leh Lunglei District-a official-te, hriselna kawnga thawktu leh khawtlang hruaitute, he thil hlawhtlin nana tha thawhtu zawng zawng chungah lawm thu a sawi a ni.

Health Minister Pi Lalrinpuii chuan Mipuite’n hriselna kawnga enkawlna ṭha zawk an hmuh theih nan MMU chuan mipuite tan service a chhawp hnaihsak dawn tih sawiin, MMU-in a ken tel X-ray khawl, thisen dah ṭhatna leh natna endikna khawl hrang hrangte chu a ṭangkai dawn hle tih a sawi.

Health Minister chuan Chief Medical Officer (CMO) Office sak zawh loh chu sak zawh tuma hma lak mek anih thu leh pawisa pawh hmuh theih mai beisei a nih thu a sawi a. Civil Hospital Lungleia thawktu quarters sak ṭhatna tur pawh ruahmanna siam a nih thu leh ṭhenkhat chu theh luh a nih tawh thu sawiin, Critical Care Block (natna khirh bik veite awmna tur) pawh sum tam tak senga sak turin approval hmuh a nih tawh thu leh Ministry aṭanga sum tumsak tur a nih thu a sawi a. PM CARES aṭanga Civil Hospital Lungleia MRI khawl bun tur pawh a lo kal mek thu leh rei lo teah bun fel thuai beisei a nih thu sawiin, chhim lam mipuite tan hriselna kawnga hmasawnna lawmawm tak a nih tur thu a sawi bawk.

MMU Vehicle pakhat bakah hian Tlabung Block lam lawnga kal ngaiah MMU Boat pek belh tura Minister-in a dilna chu TATA AIG leh Swasti lam hotute chuan remtihsakin, Minister hian MMU Vehicle leh Boat chu ṭangkai taka hman atan a vai liam nghal.

Director of Health Services Dr Lily Chhakchhuak chuan hun kaihruaiin, Mobile Medical Unit chu hmun kilkhawr leh damdawi in awm lohnaa hriselna kawng hrang hranga hma lak nan leh rang taka thlen zung zung theih nan ṭangkai taka hman a nih tur thu a sawi.

He hunah hian Pu Devang Pandya, Vice President & Lead – CSR & Sustainability, Tata AIG, Mumbai chuan Tata AIG hnuaia North-East tana Corporate Social Responsibility (CSR) hma lakna chungchang sawiin, Pu Madhukar Sinha, President – Government & Rural Business, Tata AIG, Mumbai chuan North-East-a Tata AIG hma lakna hrang hrang a sawi.

MMU hi TATA AIG General Insurance Company Ltd-in CSR fund aṭangin a leina leh a cheibawlna sum tumin, Swasti-The Health Catalyst te nena thawk hova buatsaih a ni a. Mission Foundation Movement (MFM) chu a taka kalpuitu leh enkawltu (Implementing Agency) an ni.

Lunglei District tana ruahman MMU hi Tata Yodha Pick Up niin, a lirtheia hi cheng nuai 12 man a ni. Damlo enna khawl famkim nena thuam niin, X–Ray leh test-na chi hrang hrang bungrua cheng nuai 26 chuang hmanga thuam a ni a. A enkawltu tur thawktute rawihna pawh a keng tel nghal vek bawk. (DIPR)