HPC Vice Chairman-in Coy thuneitute leh Engineer-te ko khawmin a zawtfiah

05 Nov 2026:  Vawiin khan Lunglei a Music Festival lian ‘Leitlangpui Music Festival’ nghahna hmun tur Lena Sports Stadium, Serkawn panna kawng, Christian Hospital Serkawn – DIET kawng siam mek chu HPC Vice Chairman Pu V Malsawmtluanga, Ward Councillor Pi Lalmuanpuii Renthlei, ZPM Southern Headquarters hruaitute, ZPM Ṭhalai Southern Headquarters leh PWD Lunglei-te chuan a hmunah an tlawh.

Helai kawng siam hi SLT Company khawih niin, a siamna tur hian Rs. Vbch 1.14 dah a ni.

Kawng siam mek hi SLT-te hian an insawi aia muanga thawh anih avangin Lunglei North Bialtu MLA, HPC Vice Chairman ni bawk chuan Company thuneitute leh Engineer-te chu an kawng siam mek leh an muanchan chhan; an hnathawhna hmunah ko khawmin a zawtfiah. SLT Company-te hian khawl lama an harsatna tawh leh kawngpui repair tur chu laih zau thar anih avangin kawngpui tihfai hi an tum aia a harsat thu an lo sawi a ni.

MLA, Pu MSTA chuan SLT Company-te chu an sawi ang leh an hun tiam anga kawng an siam lo chu a ngaihdan anih loh thu a hrilh a. Councillor, Local Council Serkawn te leh NGO hruaitute hnena thu dik tawklo an sawi fo chu ti tawhlo turin a hrilh a, an kawng siam mek chu Leitlangpui Music Festival 2026 neih ṭan anih hma ngeia zo turin a chah a ni.

Mizoram State University hmun tur Melte, Serkawn panna kawng widening khawih mekte chu a hmunah an enho nghal a. HPC Vice Chairman Pu MSTa chuan High Powered Committee, Lunglei chuan Lungleia MzSU nghah anih ngei theihna tur atana theihtawp a chhuahna chu a tawp thlenpui a tum thu a sawi a. Hemi atan hian HPC Fund hmang pawhin MzSU hmun tur panna kawng hi sum an neih ang angin a tihzau leh cheiṭhat hna nasa taka an thawh thu a sawi a, an la chhunzawm zel tur thu a sawi bawk.