Leiminin in 3 a hnawl

14 July 2026: Tukin dar 5:00 bawr vel khan Tawipui South hmar lam khaw luh tantirh kawng chhak chu a min a, mual hi a chim avangin chhungkaw pathum, Pu F. Lalhredika, Pu Jethra leh Pi Hmingchhuangi (Esther Hotel) te in chu leimin hian a hnawl vek.

Nimin lamah lei hi min mai thei nia a lan avangin heng chhungkaw 3-te hi a theih ang anga bungrua lo inthiar chhuah lawkin, anmahni pawh insaseng tir an ni a, vanneihthlak takin thi leh hliam an awm lo.

Kawng thenfai hna hi vawiin dar 10:00 AM vel atang khan thawh tan ni mahse lei tawlh hi a tam tham avang leh lei hi tawlh belh thei reng anih bawk avangin kawng tlang hun tur hi sawi mai theih a la ni lo.

Hetianga kawng a pin avang hian Lunglei lam pan leh Lawngtlai lam pan tum lirthei thahnem tak chu Tawipui South-ah hian an tangkhang mek a ni.

Hemi chungchangah hian District Disaster Management Authority (DDMA) Lunglei chuan thuchhuah siamin, khualzinte him nan leh ṭul lova hun leh tha sen anih loh nan chinchang ngaihven hmasa lova he lai paltlang tura zin chhuak rih lo turin khualzinte an ngen.