State University Demand Committee-in lawmthu a sawi

26 Feb 2026:- State University Demand Committee Lunglei chuan thuchhuah siamin, Ni 25 February, 2026 a ‘The Mizoram State University (Amendment) Bill 2026’ pass a ni chu lawmawm a tiin, he bill pass a nih theihna atana hmala tute zawng zawng chungah lawmthu a sawi a, H&TE Minister Dr. Vanlalthlana’n Cluster of Colleges zingah Mizoram Engineering College leh Lunglei Government College telh an nih tur thu a sawi chu State University Demand Committee Lunglei chuan lawmawm a tih thu a sawi a, chutih rualin Lungleia college dang Gov’t J.Buana College leh DIET Lunglei te chu ti changtlung a, a rang thei ang bera cluster of colleges zingah telh leh turin Mizoram Sorkar a ngen a, a tawp thlenga uluk taka a vil zel dawn thu a sawi.

The Mizoram State University (Amendment) Bill 2026 pass anih theihna atana hmalatute – Chief Minister Pu Lalduhoma, H&TE Minister Dr Vanlalthlana leh Lunglei MLA palite chungah State University Demand Committee Lunglei chuan lawmthu a sawi tih a tarlang.

State University din tur hi NEP (2020) thu anih avang chauhin Mizoram Sorkar chuan harsa tak chungin din a tum a. Hetiang a nih laia State University Bill sawihonaah Leader of Oppossition Pu Lalchhandama Ralte in Mizoram State University Headquarters Aizawla awm tur a pass tawh kaltlangpui nise, State University dang, Lungleia Headquarters awm tur din ni bawk rawh se tih, MNF MLA ten Resolution an thehluh vek thu a sawi chu State University Demand Committee Lunglei chuan pawi a tiin, State University pakhat din pawh a harsat laia a theih dawn loh tih hre reng chunga State University pahnih neih/siam an rawt chu Chhim lam mipuite zahlohna leh Lungleia State University din tur sawihnawm tum naah a ngaih thu a sawi.

Tin, MNF MLA Pu Ramthanmawia’n Ni 27, February 2026 a “Mizoram State University Headquarters Aizawla awm tura Mizoram Assembly in a pass tawh hi kaltlangpui nise, hemi rual hian Chhim bial mipuite duhdan leh beisei ang ngeiin State University dang, Lungleia Headquarters awm tur din ni bawk rawh se” tih Private Member Resolution put luh a tum pawh ‘The Mizoram State University (Amendment) Bill 2026’ Pass a nih tawh avang leh Resolution chu an pass pui dawn lo ni a a lan avangin kaltlangpui lo turin State University Demand Committee Lunglei chuan a ngen tih a sawi bawk.

Tun hnuah, Lungleia State University din chhoh tur chu tute mahin sawihnawm tawh lo tur leh Politics-a inbeih nan hmang tawh lo turin a ngen tih sawiin, Mizoramin State University tha tak leh changtlung tak a neih theih nana ngaihtuahna seng tlang tawh tawh zawk turin a ngen tih State University Demand Committee Lunglei chuan thuchhuah a siamah a tarlang a ni.