ATL Road hnathawh mek leh Lunglei khawpui chhung kawng siam mek chungchang an sawi

24 Feb 2026: Vawiin chawhma dar 11:00 khan MJA Lunglei Member-te’n Er.SR.Lalramthanga E.E, PWD Road Division-I Lunglei chu a Office-ah kawmin, ATL Road Tlawng leh Pukpui inkar hnathawh mek leh Lunglei khawpui chhung kawng siam mek chungchang an sawipui.

Er.SR.Lalramthanga chuan Tlawng atanga Manguri Petrol Pump siam hnathawh mekah KM 1 a thui Concrete a lo siam tawh chu Concrete bawka siam tum a nih thu a sawi a, WBM 150mm phah hnuah Concrete nem deuh DLC 150mm phah leh a nih hnuah Concrete chang tha zawk PQC 225mm phah a ni ang a ti.

Tuna Kawng siamtu SLT Company ten an hnathawh mekah Alkatra luan hna chu WBM 150mm phah hnuah DBM 50mm phah leh niin hemi dawtah hian BC 40mm phah leh a ni a, vawikhatah WBM inches 6 a chhah zela phah an tum chu Department lamin rem ti lovin, inches 3 zela phah hnuah rap muk a chumi hnuah inches 3 dang phah belh tura an tih avangin hna a chak lutuk theilo niin E.E hian a sawi.

Lunglei khawpui chhung kawng Manguri Petrol Pump chhak atanga AOC thleng siam tur AOC lam atanga hna an thawh mek chu SASCI sum Rs vbc. 12 senna tur niin, sum hi la hmuh fel chiah loh anih avangin ATL Road siam mektu SLT Company te chu khawpui chhung kawng siam hna hi lo thawk tel lailawk rih mai tura ngen an nih thu leh an ni hian a ba in hna hi an thawk niin Er.SR.Lalramthanga chuan a sawi.