DCSO Lunglei hnuaiah ration card 41,062 a awm

23 Oct 2026: Vawiin khan Lunglei District Development Co-ordination and Monitoring Committee (DISHA) chu an Chairman, Member of Parliament (Lok Sabha) Pu Richard Vanlalhmangaiha hovin Lunglei DC Conference Hall-ah an ṭhukhawm.

Lunglei DISHA ṭhutkhawmah hian Sawrkar kum kal mek 1st Quarter leh 2nd Quarter (April – September 2026) chhunga Lunglei District-a sawrkar laipui ruahmanna (centrally sponsored scheme) hnuaia hmasawnna hna hrang hrang kalpui dan thlirho niin, harsatna awmte leh a chin fel dan tur leh hmalak zui zel dan turte sawiho a ni.

Lunglei DISHA ṭhutkhawma tarlan a nih danin, PMGSY hnuaia Lunglei–Kawlhawk–Buarpui Road kilometre 66.500-a thui siam ṭhat mek chu 57% zawh tawh niin, Phairuang–Thenhlum (Upto Bolia) Road KM 48.770-a thui siam ṭhat mek chu 48% leh Phairuang–Thenhlum (Bolia to Thenhlum) Road KM 16.230-a thui siam ṭhat mek chu 49% zawh tawh a ni.

Tun dinhmunah DCSO Lunglei hnuaiah ration card 41,062 awmin, ration card-a hming chuang mi 1,47,595 an awm mek a; card 931 (member 1,979) chu ration khul nana hman theih loh (NER Card) a ni.

SBM (Urban) hnuaia bawlhhlawh sawngbawlna tur, cheng nuai 600 senga sak Lunglei Solid Waste Management Centre-I chu a sak hna 100% zawh tawh niin, khawl leh hmanraw mamawh bun chhoh mek a ni a. Cheng nuai 67.59 senga sak Tlabung Solid Waste Segregation Centre pawh 100% zawh tawh niin, cheng nuai 385 senga sak Lunglei Solid Waste Management Centre-II pawh 90% zawh tawh a ni a. Shelter for Urban Homeless (SUH) hnuaia cheng nuai 39.79 senga Christian Hospital Serkawn bula damlo awmpuitute riahna tur, ‘Patient Attendants Shelter’ sak mek chu 90% zawh tawh a ni bawk.