ATL Road siam hna hun pek belhah an zo hman lo thei niin hria

22 April 2026:- MJA District Hqtrs, Lunglei chuan vawiin khan ATL Road siamtu SLT Infracon Pvt.Ltd te an inbunna hmun, Mausen daiah tlawhin, Site Engineer Argya Sasmal leh a thawhpuite chu an hriat duh hrang hrangte an zawt a. ATL Road Package 1 leh Package 2 viltu PWO SDO te nen an inkawm bawk.

MJA District Hqtrs Lunglei zawhna chhangin, ATL road siamtu SLT Company site Engineer leh a thawhpui te chuan, ATL Road bakah, Lunglei khawpui chhung siam hna thawk turin, a vaiin hna thawktu mihring 70 an neih mek thu an sawi a. An zinga mi 30 te chu West Bengal inthlang tur avangin April ni 20 khan an haw thu sawiin, April ni 25 ah midang an lo thleng dawn niin an sawi.

Khawpui chhung kawngpui siam chawlhsan a nihna chhan te, ATL road siam leh Khawpui chhung kawng siam a ruala kalpui thei tura inremna ziak a nih laia, pakhat zawk thawka pakhat zawk chawlhsan a nihna chhan, MJA zawhna chhangin SLT Company Site Engineer chuan, Kawng siamna tura Contract Estimate chu Revise tura sawrkar ngen an tum tih a sawi a. Tun hunah hian Diesel man bakah, Bitumen man leh Cement man te chu a san vek tawh thu sawiin, tuna Company in a chhek khawl sa hmangin ATL road Package 1 leh Package 2 te chu thawh phawt an tum tih a sawi a. Khawpui chhung kawng siamna atan chuan Kum2027 March thla thleng hun an neih thu sawiin, kumin kum tawp lamah Krismas hmaa zo hman turin chhunzawm an tum tih Site Engineer chuan a sawi a ni.

SLT Company Engineer chuan, An hnathawhna bulhnaia Lung chang tha hman tur a awm lo chu an harsatna leh, hna an thawh chak theih lohna chhan pakhat niin a sawi bawk.

ATL Road Package 1 leh Package 2 enkawltu PWD Engineer te pawh MJA Lunglei District hian titipuiin, kawng siam hnathawktu Company chuan Hmar lamah kawng siam hna thawh mek an neih avangin duh anga khawl leh bungrua an inchhawp tam tawk loh thu sawiin, sawlama an hna an zawh tawh thu leh, ATL road ah hmanrua leh mihring pawh tam zawk an inchhawp theih an beisei thu an sawi a. Lung tha lo an hman lohna turin theihtawp chhuaha an vil thu te, Concrete a kawng siam tur lai leh, Bitumen hmanga siam tur pawh Lung phah atanga uluk taka an thawhtir thu MJA Lunglei District member-te an hrilh a ni.

MJA District Hqtrs Lungleiin a hmuh dan :
1. Company-ten Contract an thawhin, Revise Estimate siam a ni thin chu, hun thenkhatah thil kal dan phung ni tho mahse, ATL road kawngpui siam hna leh, Lunglei khawpui chhung kawngpui siam hna thawhte tih khawtlai leh tih muan phaha, tluantling lova tawpsan lailawk nan Company-ten an hmang anih chuan, a lungawithlak dawn lo hlein MJA District Hqtrs Lunglei chuan a hria.

2. Company chuan ATL Road Package 1 leh Package 2 bakah, Lunglei khawpui chhung kawngpui siam turin mihring 70 a neih chu, chak zawka hna thawk turin a tawk zo lovin, MJA Lunglei District chuan a hmu a. Tuna khawl an inchhawp leh hmanrua an inchhawp te pawh, Contract Period chhunga hna thawh zawhna atan a bei tham deuhin a hmu a ni.

3. Company Engineer ten, ATL Road siam hna chu hun pek belh, December 2026-ah an zo hman lo thei tih an sawi chu tun huna mihring leh khawl an inchhawp dan atangin zo hman lo thei dinhmunah an ding niin MJA District Hqtrs Lunglei chuan a hmu.

4. Hetiang anih avang hian MJA District Hqtrs Lunglei chuan, ATL Road, Lunglei mipuite nghahhlelh leh enrawn bakah, Lunglei khawpui chhung kawngpui siam hna chak zawka SLT Company-ten an thawh theihna turin, 1) Hnathawktu tih pun, 2) Khawl tam zawk inchhawp, 3) Lung chang tha rang zawka phurh thlenna tur lirthei tam zawk kawl belh bakah, chhun lama hna thawktu tam zawk Site lama bun tirte an mamawh hlein a hria a ni.