CM-in kum 2026-27 Mizoram sum ruahman Rs vbch 17,076 leh nuai 92 a pharh

26 Feb 2026:- Finance changtu Chief Minister Pu Lalduhoma’n kum 2026-27 Financial Year-a Mizoram sum ruahman cheng vaibelchhe 17,076 leh nuai 92 chu Assembly House-ah a pharh.

Kum kal lai 2025-26 budget aiin kumin budget hi cheng vaibelchhe 3057 nuai 8 in a tam zawk a, a punna hi za zela 14.94 a ni a, Budget Estimate 2024-25 zinga cheng vaibelchhe 15,621 leh nuai 48 chu house a pawm ngai a ni.

Pu Lalduhoma hian kumin Financial Year kal laia sum hman ruahman belhna Supplementary Demands for Grants 2025-2026 cheng vaibelchhe 3724 leh nuai 25 chu a pharh nghal bawk a. Sorkar inrelbawlna senso, sorkar hnathawk hlawh leh pension bakah hmasawnna thawhna tur atana sum hman tur ruahman (revenue expenditure) hi cheng vaibelchhe 17,127 leh nuai 30 a ni a. Budget pumpui aţanga chhutin za zela 82.53 a ni. Mipui hmasawnna atana sum ruahman (capital expenditure) atan cheng vaibelchhe 2658 leh nuai 56 dah a ni a, hei hi sum ruahman zawng zawng aţanga chhutin za zela 17.46 a ni.

Chief Minister chuan sawrkar laipui hmathlir Viksit Bharat tih hlawhtlinna kawnga a tam theih ang ber thawh ve an duh a ti a, kum 2047 ah India ram pumpui dehchhuah GSDP atanga 1% chu state atanga thawhchhuah ve an tum tih sawiin thil thar siamna leh tualchhunga tharchhuah tihpun lama hmasawnna chu an hmathlir pawimawh anih thu a sawi.

Chief Minister chuan chhiah lak lai mek tih pun tumna a awmlo tih sawiin Chhiah thar lak tumna a awmlo a ti a, Sawrkarin an dinhmun dik tak aia sang GSDP figure an nei thin chu tha anti lo a ti a, Tlahniam ta angin lan phah dawn mahse huaisen taka figure dik thei ang ber hmanga inteh a, nihna dik phochhuah an duh avangin kum 2026-27 GSDP chu cheng vaibelchhe 43817 leh nuai 9 anga chhut ani a ti a, kum kal mek atangin cheng vaibelchhe 4290 leh nuai 67 in a pung tih sawiin a punna chu za zela 10.85% ani tih a sawi.

Pu Lalduhoma chuan ZPM sorkar flagship programme (Bana Kaih ruahmanna) atan cheng vaibelchhe 350 dah a ni a ti aa, he ta tanga cheng vaibelchhe 150 chu thlai thlan bik leina atan a bik taka dah a ni tih sawiin MLA 40-te’n MLA Local Area Development Fund atana an hman tur cheng vaibelchhe 80 dah a ni tih sawiin kawng siamthatna atan cheng vaibelchhe 183 leh nuai 25 dah ani a ti bawk.

Chief Minister chuan State-ina hna pawimawh bik a kalpuina tur State Priority Project atan cheng vaibelchhe 100 dah a ni a ti a, Mizoram Universal Healthcare Scheme (MUHCS) bill pekna turin cheng vaibelchhe 130 an dah tih sawiin Social Welfare hnuaia Ruihhlo ngaite enkawlna Home chhawmdawl nan cheng vaibelchhe 70 dah a ni a ti bawk.

Pu Lalduhoma chuan Power & Electricity Department hnuaiah kawlphetha leina atan cheng vaibelchhe 550 dah ani a ti a, ruihhlo dona hmalakna Anti Narcotic Activities atan head thar hawngin cheng nuai 40 dah a ni a ti bawk. (AIR)