Jt.YMA Zobawk chuan tukin zing dar 6:00 atang khan Total Bandh an tan

16 April 2026: Jt.YMA Zobawk chuan an lo tum lawk tawh angin tukin zing dar 6:00 atang khan an huam chhungah Total Bandh an buatsaih.

Jt.YMA Zobawk te hian an khaw chhunga National Highway NH2 laih chungchangah an ngennain awmzia a neih loh mai bakah an duh anga hnathawh a nih loh avanga Total Bandh hi buatsaih an ni tih an hruaitute chuan an sawi.

Total Bandh buatsaih an tum tih an hriat avang hian kawng siamtu Company NHIDCL lam chuan tunkar Thawhlehni atang khan hna thawk chhunzawmin khawlte pawh dah belh bawk mahse Jt.YMA Zobawk hruaitute chuan vawi tam tak an lo ngen tawhna chuan awmzia a neih ngai loh avang leh tun hma atang tawhin lungawilohna lantir an tum avang chauh a hna an thawk thin chu an hriatthiam tawh loh thu an sawi a ni. Tukin atanga Total Bandh an neih hian awmzia a neilo anih chuan hmalak zel dan tur ngaihtuah an tum tih an sawi bawk.

Total Bandh hian Medical Duty, Bawnghnute sem, Force lam duty, Official Duty, Zirlai Exam turte, Fire & Emergency Service, Damlohna avanga Damdawi In pan ngai, Thihna avanga kal chhuah ngai, Media leh PHE tui sem te a huam dawn lova Zobawk khaw chhunga sumdawnna hmun, Zirna In leh Sawrkar Pisa te chu khar vek niin, ram lama hnathawk turte pawh tumah chhuak lo turin an ngen a ni.

Zobawk khaw Hmar lam kawtchhuah leh Chhim lam kawtchhuah te an duty a, chanchin buatsaih lai hian boruak duhawm lo thleng a awm lo.