Khawpui chhung kawngpui siamṭhat hnathawh mek MLA-te’n an en

21 Feb 2026: Nimin khan Public Works Department (PWD) hnuaia Lunglei khawpui chhung kawngpui siamṭhat hna thawh mek chu Lunglei West bialtu MLA Pu T.Lalhlimpuia leh Lunglei South bialtu MLA Pu Lalramliana Papuia te chuan enin, department hotute leh hnathawktute nen ṭha tak leh chak zawka hna thawh a nih theih dan tur an sawiho.

MLA-te hi Lunglei Municipal Council (LMC) Vice Chairman Pu K. Lalrinawma bakah, PWD Lunglei Road Division-I Sr Executive Engineer Er SR Lalramthanga leh a thawhpuite’n an ṭawiawm a ni.

PWD Minister puitu MLA Pu T. Lalhlimpuia chuan Lunglei khawpui chhung kawngpui siamṭhat hna thawh mek chu fur hmaa zo hman ngei turin chak thei ang ber leh ṭha thei ang bera hma la turin thawktute a hriattir a. ATL Road siamṭhat hna thawktu contractor-te pawh chak tak leh ṭha taka hna thawk turin a chah bawk.

Lunglei khawpui chhung kawngpui siamṭhat hna hi February ni 19, 2026 (Ningani) aṭang khan thawh ṭan niin, AOC aṭanga Pukpui Manguri Petrol Pump chhak thleng, kilometre 12-a thui siam tur a ni a, ATL (Aizawl–Thenzawl–Lunglei) Road kawng siam ṭhat mek nen a inzawm chiah dawn a. Dense Bituminous Macadam (DBM) 50mm-a chhah chungah Bituminous Concrete (BC) 30mm-a chhaha phah hnan tur niin, tunah hian Lunglei AOC aṭanga Chanmari-a Pu Samson-a In zawn thleng DBM hi phah tawh a ni.

Veng chhung inkal pawhna kawngte pawh Paver Finisher len theihna chin chu Rs Vbch 5 bawr vela siamṭhat tura ruahman a ni bawk.

Speed breaker siam chu National Highway Inkaihhruaina Dan (NH Norms)-in a phal loh avangin kawngpui siam ṭhat hna thawh mekah hian khawtlang leh veng ṭhahnem ngaihnaa speed breaker siam tura lo nawr lo tur leh mahni thua lo siam ringawt lo turin MLA-te leh PWD hotute chuan khawtlang hruaitute leh mipuite an ngen bawk. (DIPR)