Lirthei neite Sept 2026 ral hmaa garage nei vek tura tih an ni

13 July 2026: Vawiin chawhnu dar 1:00 khan Lunglei Municipal Council puipate chuan BoC Hall-ah thuthar thehdarhtute kawmin, Lunglei khawpuia Traffic Management chungchanga an hmalaknate an sawifiah.

LMC Chairman Pu Lalzuithanga chuan Traffic Management leh Sanitation hi kan ngaihpawimawh em em laiin hmalak chak erawh a har hle tiin, LMC huamchhunga lirthei neite chu September 2026 ral hmaa Garage nei vek tura tih an ni tih a sawi.

LMC Vice Chairman Pu K.Lalrinawma chuan LMC huamchhunga Traffic Management kalpui an tum dante tarlangin, LMC-in kum 2023 atanga kumin 2026 June ni 22 thlenga Parking Fee atanga sum a hmuh tawh zawng zawng chu Rs Nuai 39, Sing 9, Sang 6, 588 a ni a, heng sum hi mipui tana tangkai turin Traffic enkawlna tih changtlun nan leh kawng hrang hrangin hman a ni a ti a, tuna sum hman bang la awm chu Rs Nuai 7, Sing 5, Sang 4, 860 niin mipui tan Traffic Management atana tangkai turah hman chhunzawm zel tum a ni a ti.

Pu Awmtea chuan Parking Fee lak chungchangah Local Council-te’n an thawhpui that thu sawiin, Traffic Management kawngah hian mipuite nen theihtawp kan chhuahho loh chuan nakin lawkah chuan Lunglei khawpui hi lirthei mai ni lo, mihring chet vel nan pawh a hrehawm thei dawn a ni a ti. Kumin September thla chhunga Garage nei hman lo te hremna lekkawh dan tur chu ngaihtuah a la nih loh thu leh Local Council-te nen inrawn tlangin hremna dan chu siam a la ni ang a ti a. Traffic Police puitu tur Traffic Warden tur mi engemawzat training pek tawh niin sum awm dan a zirin lak an ni ang a ti bawk.

Vawiin thuthar thehdarhtute leh LMC puipate inkawm hian LMC huam chhunga Traffic enkawl dan fel leh tha zawk a awm theih nana hmalak tul an tihte an sawiho a ni.