Lunglei Dist-ah kumkhatah rubber quintal 1000 dawn thar chhuak

06 Feb 2026: Land Resources, Soil & Water Conservation Department (LRS&WC) hmalakna Chief Minister’s Rubber Mission Mizoram hnuaia Lunglei, Siaha, Lawngtlai leh Hnahthial District chhunga ṭhelret (rubber) chingtu leh ching turte tan vawiin khan Lunglei Convention Centre-ah rubber chin, enkawl, hnai leh sawngbawl dan zirhona, “Farmers Training on Scientific Rubber Cultivation, Harvesting Techniques, Post-Harvest Handling and Pest Management” buatsaih a ni a. LRS&WC Minister Pu Lalthansanga chu Khuallian niin, Lunglei South bialtu MLA Pu Lalramliana Papuia chu Khual Zahawm a ni.

Khuallian Pu Lalthansanga chuan CM Rubber Mission chu Chief Minister kaihhruaina hnuaia sawrkar hotulu ber aṭanga department zawng zawng tela kut hnathawktute tana hmalakna a nih avangin a namai lovin, a hlawhchham thiang lo tih sawiin, tih tak takna nena beih a, tihpuitlin ngei ngei a ngai tih a sawi a ni.

Minister Pu Lalthansanga chuan Rubber chingtu kal khawmte chu hlawhtlin tum ngei tura chahin, training chu a khuh hawnna chauh a ni tih hria a, mahnia inzir belh zel a, taima tak leh rinawm taka hna thawk turin a chah.

Khual Zahawm Pu Lalramliana Papuia chuan Mizoram sawrkar hmachhawp hrang hrang zingah CM Rubber Mission chu Chief Minister leh a changtu Minister te’n an tuipui tlat a nih thu leh ram tan hmasawnna nasa tak thlentu tura beisei a nih thu a sawi.

He hunah hian Lunglei Municipal Council Chairman Pu Lalzuithanga leh councillor-te, LRS&WC Director Er Vanlalmuanpuia Chhangte leh LRS&WC-a thawktute, Lungleia sawrkar official-te, MJA te, political party hruaitute leh rubber chingtute an tel.

CM Rubber Mission Phase-II hnuaiah hian rubber chinna atan Lunglei District-ah ram hectare 370-a zau, Hnahthial District-ah hectare 80, Lawngtlai District-ah hectare 80 leh Siaha District-ah hectare 20-a zau te ruahman a ni.

Lunglei District-ah rubber chinga buaipuitu kuthnathawktu 300 chuang awm mekin, kum khatah quintal 1,000 dawn an thar chhuak tawh a. A hralhnaah buaina awm lovin, an huanah ngei an hralh thei reng a. MIRSAC data aṭanga a lan danin, Lunglei District-ah hian rubber chin theihna hmun (potential area) — Class 1 square kilometre 1,033.23-a zau leh Class 2 square kilometre 640.39-a zau a awm. (DIPR)